“...Eyni zamanda, biz müdafiə sənayesi sahəsində əməkdaşlığı müzakirə etdik. Artıq qeyd etdiyim kimi, birgə hərbi təlimlərin sayının artırılması məsələsini müzakirə etdik, buna ehtiyac var. Çünki dünyada vəziyyət dəyişir, qeyri-sabitlik nöqtələri artır, ona görə də güclü hərbi potensial müstəqilliyin və ərazi bütövlüyünün qarantıdır”.
Bu fikirləri Prezident İlham Əliyev iyunun 15-də Pakistanın Baş naziri Məhəmməd Şahbaz Şərif ilə mətbuata bəyanatında səsləndirib.
Azərbaycan Prezidenti dedi ki, iki ölkə arasında hərbi əməkdaşlığın daha da gücləndirilməsinə ehtiyac var.
Vətən müharibəsindən sonra Azərbaycan və Pakistan arasında hansı yeni imkanlar açılıb ki, Azərbaycan Prezidenti bu məsələnin üzərində xüsusi dayanıb? Burada hansı təhlükələrdən söhbət gedir ki, bu, əməkdaşlığın dərinləşməsini labüd edir?
“...Azərbaycanın Güney Qafqazda yaratdığı geosiyasi reallığı qəbul etməyən İran, Ermənistan, Rusiya və Fransa bütün gücləri ilə mövcud güc balansını dəyişməyə çalışırlar”
Politoloq Mehman İsmayılov “Bakı-Xəbər”ə şərhində bildirdi ki, Azərbaycan Prezidentinin Azərbaycan-Pakistan hərbi təlimlərinin intensiviliyinin artmasının vacibliyini söyləməsinin ciddi əsasları var: “44 günlük Vətən müharibəsindən sonra Azərbaycanın Güney Qafqazda yaratdığı geosiyasi reallığı qəbul etməyən İran, Ermənistan, Rusiya və Fransa bütün gücləri ilə mövcud güc balansını dəyişməyə çalışırlar. Ermənistanın Hindistandan silah alması, Hindistanın Ermənistanı silahlandırmaq niyyətlərinin açıq-aşkar ortaya çıxması, raketlərin, zirehli texnikanın Ermənistana göndərilməsi, bir tərəfdən Fransanın, o biri tərəfdən İranın Ermənistanı silahlandırması, tank əleyhinə raketlər, dronlar verməsi, Ermənistan ərazisində dron zavodunun inşası barədə danışıqların aparılması kimi məsələlər gerçəkdən bölgədə Azərbaycanın yaratdığı bu geosiyasi reallığı həzm edə bilməyən qüvvələrin mövcud balansı pozmaq cəhdləridir. Bu baxımdan Azərbaycanın həm İsraillə, həm Türkiyə ilə getdikcə sıxlaşan hərbi-siyasi əməkdaşlığı mövcuddur. Digər tərəfdən Azərbaycanın Pakistanla da strateji əlaqələrinin və hərbi-siyasi müstəvidə münasibətlərinin intensivləşib gücləndirilməsinə, sıxlaşdırılmasına ehtiyac var. O səbəbdən Azərbaycan Prezidenti söyləyir ki, Azərbaycan-Pakistan hərbi təlimlərinin daha sıx keçirdilməsi, saylarının artırılması, təbii ki, çox vacibdir. Bu, pozucu qüvvələr tərəfindən güc balansının Azərbaycanın əleyhinə dəyişdirilməsinin qarşısını almaq cəhdləridir. Azərbaycan imkan verməməlidir ki, bölgədə güc balansı dəyişsin. Bir tərəfdən Azərbaycan-Türkiyə hərbi-siyasi ittifaqını reallaşdıran Şuşa bəyannaməsinin imzalanması, digər tərəfdən Azərbaycan-İsrail münasibətlərinin getdikcə intensivləşməsi, sıxlaşması, Azərbaycanın ən modern İsrail silahlarını almaqda davam etməsi, digər tərəfdən Türkiyə-Azərbaycan təlimləri, Pakistan-Türkiyə-Azərbaycan təlimləri, bütün bunlar güc balansı Azərbaycanın əleyhinə dəyişməsin deyə atılan ciddi addımlardır”.
M.İsmayılov hesab edir ki, bunun üçün bu gün bölgədə çox ciddi hadisələr baş verir. O vurğuladı ki, Fransa, Rusiya, İran bütün gücləri ilə Ermənistanı sülhə gəlməyə qoymur. “Paşinyanın Qarabağ da daxil olmaqla Ermənistanın Azərbaycanın ərazi bütövlüyünü tanıdığını bəyan etməsi Rusiyanı, Fransanı, İranı dəhşətli dərəcədə narahat edir ki, Ermənistan Azərbaycanın ərazi bütövlüyünü tanısa Rusiyanın Güney Qafqazdakı mövqelərinə ağır zərbə vurulacaq. O səbəbdən də Azərbaycan bir tərəfdən Avropa İttifaqı və ABŞ-ın moderatorluğu vasitəsilə siyasi, diplomatik çabalarını intensivləşdirir, digər tərəfdən də öz hərbi gücünü artırmağa doğru gedir. Azərbaycan öz hərbi gücünü artırmalıdır, daim hərəkətdə olan modern ordu konsepsiyası həyata keçirməlidir. Üstəlik də Pakistanla Hindistanın münasibətlərinin gərginləşməsi fonunda, təbii ki, Azərbaycanın Pakistanla yaxınlaşması davam etməlidir. Azərbaycan-Türkiyə-İsrail-Pakistan strateji əməkdaşlığı, münasibətləri, dostluğu və qardaşlığı genişləndirilməlidir. Bu çox vacib məsələdir. Bu baxımdan, Prezident Pakistanla hərbi təlimlərin genişləndirilməsinin vacibliyini zamanında çox konseptual şəkildə ortaya qoyub”- deyə M.İsmayılov vurğuladı.
Əli TURABOV
