Ermənistan parlamentinin spikeri Alen Simonyan bəyan edib ki, kommunikasiyalar məsələsində Azərbaycan Rusiyanı dəvət etsə, onlar üçüncü ölkəni çağıracaqlar:
“Əgər Azərbaycan Ermənistan ərazisindəki kommunikasiyalara Rusiyanın nəzarətini istəyirsə, Ermənistan da üçüncü ölkəni cəlb etməyi tələb edə bilər. Rusiya Federal Təhlükəsizlik Xidmətinin nəzarəti ilə bağlı heç bir qərar yoxdur. Əgər Azərbaycan Rusiya tərəfinin nəzarəti həyata keçirməsini istəyirsə, o zaman Ermənistan tərəfi də üçüncü ölkənin iştirakını tələb edə bilər. Azərbaycan vətəndaşları Ermənistan vasitəsilə Naxçıvana getmək imkanı əldə edərlərsə, o zaman Ermənistan vətəndaşları da Azərbaycan ərazisindən keçə bilməlidirlər. Şərtlər eyni olmalıdır, Ermənistanın mövqeyi isə dəyişməz olaraq qalır”.
Bizi hədələyir ki, üçüncü ölkəni çağıracaqlar. Bu nə hədədi və üçüncü ölkə deyəndə kimi nəzərdə tuturlar?
Politoloq Rəşad Bayramov “Bakı-Xəbər”ə açıqlamasında bildirdi ki, dəhlizə Rusiya FTX-si tərəfindən nəzarət edilməsi 10 noyabr sənədində qeyd edilib: “Bunların hamısını tərəflər razılaşdırıb. Yəni bu gün Ermənistanın bəyanatı reallığı əks etdirmir. Onların dediyindən belə çıxır ki, güya Rusiyanın dəhlizə nəzarət etməsini yalnız Azərbaycan istəyir. Ermənistan bununla Qərb və ABŞ-ın adı ilə bizi təhdid etmək istəyir ki, onlar Rusiyanın bölgədən çıxmasına tərəfdardılar. Özlərini sırf antirus, onların buradan çıxarılmasını istəyən bir qüvvə kimi qələmə verirlər. Konkret olaraq 3-cü ölkə deyəndə Ermənistan Fransanı və ya Avropa İttifaqını nəzərdə tutur. İstəyirlər ki, onların səviyyəsində bir missiya regionda yerləşsin. Bir tərəfdən baxanda, bu bizim üçün böyük əhəmiyyət daşımır. Həmin ərazi yol statusunda olarsa, ora kimin nəzarət etməsini Ermənistan həll edəcək. Ancaq biz oranın dəhliz olmasını tələb edirik. Belə olan təqdirdə həmin dəhlizin statusu Laçınla eyni olmalıdır. Azərbaycanın razılığı olmadan Ermənistanın həmin dəhlizə kimi istədi dəvət etməsi yolverilməzdir”.
Politoloqun sözlərinə görə, artıq Ermənistan öz iddialarını ortaya qoyur və hesab edir ki, həmin dəhlizə nəzarət onda olmalıdır: “Xatırlayırsınıza, liderlərin Brüsseldəki son görüşündə Şarl Mişel bu dəhliz üzərində gömrük qaydalarının və ölkələrin suveren hüquqlarının tanındığını bildirdi. Eyni fikir təxminən Lavrov tərəfindən də səsləndirilmişdi. O baxımdan bu, Rusiya və Ermənistan arasında olan məsələdir. Əslində, məsələnin bu yerə gəlib çıxmasında Rusiyanın günahı çoxdur. Çünki Rusiya 10 noyabr anlaşmasının şərtlərini və bu əsasda Ermənistanın üzərinə götürdüyü öhdəlikləri yerinə yetirməsini təmin etməliydi, amma bunu etmir. Bu gün də artıq Ermənistan açıq formada Rusiyanın maraqlarına qarşı çıxır.
Məhəmmədəli QƏRİBLİ
