“Zəngəzur dəhlizinin açılmasında əsas əngəl İrandır”. Bu sözləri Türkiyə prezidenti Rəcəb Tayyib Ərdoğan Azərbaycana səfəri zamanı jurnalistlərə açıqlamasında deyib. "Azərbaycan və İran əhalisinin əksəriyyəti müsəlman olan ölkələrdir. İranın burada belə münasibətdə olması həm Azərbaycanı, həm də bizi narahat edir.
Əslində bu, onları da narahat etməlidir. Əgər Zəngəzur dəhlizinin açılmasına müsbət yanaşsalar, bu gün Türkiyə-Azərbaycan-İran həm avtomobil yolu, həm də dəmir yolu ilə bir-birinə inteqrasiya olunar, bəlkə də Pekin-London xətti açılardı", - deyə o əlavə edib.
Ərdoğanın açıqlamasını mühüm çağırış hesab edən eskepertlər hesab edir ki, doğrudan da bu ideya meydana çıxandan molla rejimi daim onun əleyhinə çıxıb və bununla da bölgədə anormal ab-havanın hökm sürməsinə çalışıb.
Qasım Hacıyev: “Cənab Ərdoğan tamamilə haqlıdır və o ünvanı dəqiq göstərib”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Türkiyə Prezidentinin açıqlaması tamamilə doğrudur və İranın Zəngəzur dəhlizinin açılmasına mane olduğunu bütün dünya bilir: “İran bölgədə nəyə mane olmur ki, Zəngəzur Dəhlizinin açılmasına da maneçilik törətməsin? Mütəmadi olaraq Azərbaycan dövlətinin milli maraqlarına qarşı dayanan İran Zəngəzur dəhlizini özünün qırmızı xətti hesab edir. Niyə? İran özünü müsəlman ölkə elan etsə də, həmişə anti-müsəlman mövqeyi sərgiləyib. Bu gün də, keçən dövrdə də bizim üçün bu ölkə ilə Ermənistan arasında fərq yoxdur. Biz nə siyasi, nə də başqa mənalarda İradan heç bir dəstək görməmişik, İran həmişə öz can qardaşı erməninin yanında olub. İran irticaçı dövlətdir və hakimiyyəti də mürtəcedir. Biz onlardan müsbət heç nə gözləmirik. Azərbaycan dövlətini, dövlətçiliyini o qədər qısqanır ki, o da Ermənistan kimi bizim tarixi torpaqlarımıza qarşı iddia irəli sürür. İran türk xalqını sevmir, ona görə də bizə həmişə mane olmağa çalışırlar. İran adlnan dövlət Azərbaycanın bütün layihələrinə təxribatçı və düşmən mövqeyindən yanaşıb. Eləcə də Zəngəzur dəhlizinə qarşı çıxır. Cənab Ərdoğan tamamilə haqlıdır və o ünvanı dəqiq göstərib”.
Q.Hacıyev qeyd etdi ki, bu gün Azərbaycan-Türkiyə birliyi olmasaydı, İran daha dəhşətli təxribatlar törədərdi. Türkiyə və Azərbaycanın birliyi nəticəsində İran da, Ermənistan da, Zəngəzur dəhlizinə qarşı çıxan digəriləri də geri çəkiləcək və bu möhtəşəm layihə tam olaraq icra ediləcək.
Samir Adıgözəlli: “Gerçəklik budur ki, İran rəsmi surətdə bu dəhlizin açılmasına hər vəchlə mane olmağa çalışır”
İSBAM sədri Samir Adıgözəlli də bizimlə söhbətində bildirdi ki, Türkiyə prezidenti dünya siyasətini dərindən bilən, gedən prosesləri düzgün qiymətləndirən bir şəxsiyyətdir. “Dəfələrlə bəyan edilib ki, Zəngəzur dəhlizindən təkcə Azərbaycan deyil, bütün region dövlətləri fayda götürəcək. Lakin İranın bu məsələdə mövqeyi aydındır, o bütün gücü ilə prosesə əngəl törədir. Türkiyə prezidenti İranın son dövrlər yürütdüyü siyasəti təhlil edərək bu qənaətə gəlib ki, İran bu layihənin gerçəkləşdirilməsinə mane ölkədir. Gerçəklik budur ki, İran rəsmi surətdə bu dəhlizin açılmasına hər vəchlə mane olmağa çalışır. İran rəsmiləri hər addımda bunu bəyan edirlər. Fikrimcə, İran Azərbaycanı Naxçıvanla birləşdirən Zəngəzur dəhlizinin açılmasını ona görə istəmir ki, türklərlə əhatə olunmaqdan çox qorxur. Amma hesab edirəm ki, həm Azərbaycanın, həm də Türkiyənin səyləri, birliyi nəticəsində İranın müqavimətini qırmaq mümkün olacaq və bu dəhliz açılacaq”-deyə S.Adıgözəlli qeyd etdi.
Leyla QARAXANLI
