“...Bu gün, eyni zamanda, müdafiə və müdafiə sənayesi sahələrində gələcək planlar haqqında danışdıq. Məmnuniyyətlə qeyd olundu ki, bu il 16 birgə hərbi təlim keçiriləcəkdir, onlardan 6-sı artıq keçirilmişdir. Mən İkinci Qarabağ müharibəsindən sonra demişdim ki, Azərbaycan Ordusu bundan sonra Türkiyə modeli əsasında inkişaf edəcək və biz bunu indi əyani şəkildə görürük. Bu dəstəyə görə də Sizə özəlliklə təşəkkürümü bildirmək istəyirəm...”
Bu barədə Azərbaycan Prezidenti İlham Əliyev iyunun 13-də Türkiyə Prezidenti Rəcəb Tayyib Ərdoğan ilə mətbuata bəyanatında bildirib.
Azərbaycan ordu quruculuğunda Türkiyə modeli hansı nəticələrə, hansı üstünlüklərə gətirib çıxarıb?
"İslahatlar aparılacaq, artıq ştatlar ləğv olunacaq, çünki ordu sistemində çox ciddi ştat israfçılığı var"
Tanınmış hərbi ekspert İbrahim Rüstəmli "Bakı-Xəbər"ə şərhində "Əvvəla, çox ciddi üstünlüklərə nail olacağıq və çox ciddi yeniliklərə imza atacağıq. Türkiyə modelində əsas istiqamətlərdən biri də kadr potensialının gücləndirilməsidir. Bir zamanlar Səməd bəy Mehmandarov öz çıxışında deyirdi ki, ordu qazanc yeri deyil, orduya vətənini, torpağını sevən vətənpər insanlar gəlməlidir. Təqribən belə bir məsələ olacaq. Birincisi kadr potensialının gücləndirilməsi istiqamətində işlər davam etdiriləcək. Yəni vətəninə, dövlətinə, xalqına təmənnasız xidmət edən insanların ordu quruculuğu prosesində yaxından iştirakının yüksək təmin olunması məsələsində çox ciddi irəliləyişlər olacaq. İslahatlar aparılacaq, artıq ştatlar ləğv olunacaq, çünki ordu sistemində çox ciddi ştat israfçılığı var. Hələ ki, kadrlar düzgün yerləşdirilməyib...bu sahədə islahatlar daim aparılmalıdır. Gün dəyişdikcə tələblər də dəyişir, bu baxımdan, ordunun komplektləşdirilməsi məsələsində də prinsiplər dəyişir"- deyə bildirdi.
Sovet dövründə Stalinin dilindən məşhur olan və tez-tez işlədilən "kadrlar hər şeyi həll edir" fikrini nümunə gətirən İ.Rüstəmlinin sözlərinə görə, bizim orduda da vətənpərvər, öz işini öz sənətini yaxsi bilən, öz işinə və dövlətinə bağlı olan kadrlardan çox şey asılıdır. "Hər şey deyil, amma çox şey asılıdır. Təəssüf edirəm ki, məsələn, Nəcməddin Sadıxovun vaxtında yüzlərlə, minlərlə Azərbaycanın vətənpərvər zabitini ordudan didərgin saldılar. Nə demək istəyirəm? Türkiyə modelinin əsas özəlliyi nədən ibarətdir? Əvvəla, Türkiyə ordusu beynəlxalq standartlar səviyyəsində qurulan, NATO standartlarına cavab verən ordudur. Bilirsiz ki, NATO-nun əsas aparıcı gücü də Türkiyə kontingentindən ibarətdir. NATO-nu NATO edən elə Türkiyə Silahlı qüvvələridir. Bu beynəlxalq təcrübənin Azərbaycan ordusuna etap edilməsi, bununla yanaşı həm də cəbbəxanamızın daha mükəmməl, daha müasir silahlarla təminatı məsələsinin gündəmə gətirilməsi çox ağır, çox çətin, çox mürəkkəb proseslərin içində olduğumuz bir vaxtda ordumuzun döyüş hazırlığını, müdafiə potensialını ikiqat artıracaq. Bilirsiz ki, kommandolar hazırlanır, xüsusi təyinatlılarının maddi-texniki bazası gücləndirilir, onların sayı artırılır. Yəni sırf peşəkar ordu yaradılır. Cənab prezident də öz çıxışlarından birində çox haqlı olaraq deyib ki, biz bu günün yox, həm də gələcəyin müharibəsinə hazır olmalıyıq. Çünki biz dörd tərəfdən düşmən əhatəsindəyik, burada marağı olan ölkələrin Cənubi Qafqazda hansı oyunlar oynadıqlarını görürük. Bir tərəfdən Fransa, bir tərəfdən Rusiya, bir tərəfdən İran və s... oyunlar oynayır. Belə bir vaxtda Azərbaycan öz ordusunu gündən-günə modernləşdirməlidir və biz bu kurs ilə də gedirik. Yəni Türkiyə modelinin Azərbaycan Ordusuna tətbiqi bizim Ordumuzun döyüş hazırlığınını, müdafiə qabiliyyətini ikiqat artıracaq"- deyə İ. Rüstəmli vurğuladı.
İradə SARIYEVA
