Ölkənin baş naziri Nikol Paşinyanın Azərbaycanla sülh müqaviləsi imzalamasına mane olmaq üçün Ermənistan İnqilabi Federasiyası - “Daşnaksütyun” xalq üsyanına hazırlaşır və müqavimət cəbhəsi yaradır.
“Daşnaksütyun” Ali Orqanının yeni seçilmiş nümayəndəsi İşxan Saqatelyan bu xüsusda keçirdiyi mətbuat konfransında bildirib ki, ölkə daxilində müqavimət olmasa, Ermənistanın baş naziri bu sənədi imzalayacaq, çünki Paşinyanla Əliyev arasında prosesin tamamlanması ilə bağlı razılaşma var və bu il ərzində proses başa çatmalıdır: “Paşinyanın elan etdiyi sülh müqaviləsi deyil, bu, yeni bir təslimiyyətdir. Və sənəd imzalansa, bunun erməni xalqı üçün fəlakətli və faciəli nəticələri olacaq. İstəsəniz, bunun qarşısını almağın yeganə yolu xalq üsyanının təşkili və müqavimət cəbhəsinin formalaşdırılmasıdır. Biz buna nail olmalıyıq və hazırda əsas vəzifəmiz bu sənədin imzalanmasının qarşısını almaqdır. Ona görə də xalq üsyanı təşkil etmək, xalqı mübarizəyə cəlb etmək lazımdır”.
Saqatelyan bildirib ki, “Daşnaksütyun”un xalqı necə səfərbər etmək fikri var, lakin onlar əvvəlcə bütün ideyalarını parlament və parlamentdənkənar qüvvələrlə müzakirə edəcək, yalnız bundan sonra “döyüşə” çıxacaqlar. İşxan Saqatelyan şərtləri dəqiqləşdirməsə də, aksiyaların yayda başlayacağını təsdiqləyib: “Nikol Paşinyanın Qarabağı Azərbaycana təslim etmək mandatı yoxdur. Bu, xalqımızın qəzəbinə, müqavimətinə və üsyanına layiq olan tamamilə anti-konstitusion, dövlət əleyhinə, qeyri-qanuni prosesdir. Xalqımızın taleyini bir nəfər həll edə bilməz. Biz isə hər şeyi edəcəyik, bu vəziyyətdən çıxmaq üçün hər cür mübarizə aparacağıq. Hazırda konkret bir gün, vaxt, məkan deyə bilmərəm, amma çox dəqiq deyirəm ki, biz bu işə bütün gücümüzü sərf edəcəyik. Ən azından xalqımızın bu prosesə qarşı olduğunu ifadə edən addımlar görəcəksiniz”. İşxan Saqatelyan digər siyasi qüvvələrlə müzakirələrə başlayıb-başlamamaları ilə bağlı məsələyə toxunmayıb, sadəcə qeyd edib ki, hazırda bütün qüvvələrin vəzifəsi gözlənilən fəlakətin bütün nəticələrini insanlara izah etməkdir. O vurğulayıb ki, son üç ildə uğursuzluqlarının əsas səbəbi bu təhlükələri kütlələrə izah edə bilməmələri və onları mübarizəyə cəlb edə bilməmələridir. Ancaq son bir ildə vəziyyət dəyişib: “Əgər keçən il Nikol Paşinyan “plankanın” aşağı salınmasından danışırdısa, sonra biz təhlükələri çox açıq şəkildə bəyan edib döyüşə çıxmışdıqsa, o zaman çoxları baş verənlərdən dərindən xəbərsiz idi və bizi hakimiyyət uğrunda mübarizədə ittiham edirdi. İndi isə hesab edirəm ki, hər kəsə aydındır, həmin şəxs Azərbaycanın tərkibində Qarabağı tərk etmək yolunda olduğunu aydın şəkildə bəyan edib. Bu isə bütün erməni xalqı, o cümlədən Ermənistan Respublikası və dövlətçiliyimiz üçün fəlakətli və faciəli nəticələrə gətirib çıxaracaq”.
İşxan Saqatelyanın sözlərinə görə, Paşinyan təslim olmağı təklif edir. O qeyd edir ki, buna qarşı çıxmaq üçün “Daşnaksütyun”un, xalqın resursları var: “Ermənistan Respublikasının hakimiyyət orqanları ölkəmizin ərazi bütövlüyünü təmin etmək, Ermənistan vətəndaşı olan bir erməninin təhlükəsizliyini təmin etmək əvəzinə aşağıdakı düsturu təklif edir: ölkənin bir hissəsini xilas etmək üçün təslim olmaq. Biz inanırıq ki, bu, özünü məhv etmək yoludur. Erməni xalqının öz vətəni uğrunda döyüşmək, onu müdafiə etmək, düşmənə təslim olmamaq üçün resursu, imkanı var. Biz alternativin olduğuna inanırıq”. Bu arada iqtidar əmin edir ki, müxalifətin qarşıdakı aksiyaları onları narahat etmir. Bundan başqa, parlamentin sədri Alen Simonyan “Daşnaksütyun”a xoş yay arzulayıb: “Yaxşı, uğur qazansınlar, uğur qazansınlar, iki-üç faizdən çox səs toplayıb, davam etsinlər. Hətta Robert Köçəryan da, məndə olan məlumata görə, onlarla heç bir şəkildə ünsiyyət qurmaq istəmir. İstədiklərini etsinlər... Yayınız xoş keçsin”. Qeyd edək ki, daşnakların sülh prosesinə qarşı çıxması, ölkəni yeni fəalkətə yuvarlaması Ermənistanda da xoş qarşılanmır. Elə bu fonda Nikol Paşinyanın rəhbərlik etdiyi hakim “Vətəndaş Müqaviləsi” Partiyasından olan deputat Akop Aslanyan qeyd edir ki, “Daşnaksütyun” Partiyasının fəaliyyəti qadağan olunmalıdır. Onun sözlərinə görə, “Daşnaksütyun” Ermənistanın müxtəlif rayonlarındakı yerli təşkilatlarını bağlayıb. A.Aslanyan bunu dürüstlük kimi qiymətləndirib. O vurğulayıb ki, ölkədə “Daşnaksütyun”un fəaliyyət göstərməsi üçün qanuni əsas yoxdur. O deyib ki, partiya fəaliyyətini bərpa etmək üçün qurultay keçirməlidir, ancaq daşnaklar bunu etməyib: “Bəli, “Daşnaksütyun” antierməni təşkilat olduğuna görə fəaliyyətini dayandırmalıdır. Bunu yalnız mən demirəm, tanınmış insanlar da bu fikirdədir”.
O, “Daşnaksütyun” Partiyasını xaricə casusluqda ittiham edib və bununla bağlı əlavə araşdırmalar apardığını, materiallar topladığını deyib. Qeyd edək ki, “Daşnaksütyun” Partiyası 1890-cı ildə Tiflisdə yaradılıb. 1994-cü il dekabrın 28-də Ermənistanın o vaxtkı prezidenti Levon Ter-Petrosyanın sərəncamına əsasən, siyasi partiyalar haqqında qanunu pozduğu üçün fəaliyyəti qadağan olunub. Fəaliyyətində “Daşnaksütyun” terrora daim üstünlük verib. Bu dəfə onun məqsədlərinə çatmaq üçün Ermənistan daxilində terrora əl atması istisna olunmur.
Nahid SALAYEV
