ATƏT-in Minsk Qrupu 30 il boyunca Azərbaycana addım atmağa imkan vermədi. Lakin Azərbaycan öz haqq davasını özü həll etdi. Bunu Türkiyə Prezidenti Rəcəb Tayyib Ərdoğan Prezident İlham Əliyev ilə birgə mətbuata bəyanatla çıxış edərkən bildirib.
“Qərarlı və inanclı olduğunuz zaman nəticə əldə edə bilirsiniz. Azərbaycan da bu nəticəni əldə etdi”, - deyə R.T.Ərdoğan əlavə edib.
O da məlumdur ki, bizə düşmən olan dairələr hələ də Türkiyənin Azərbaycana hərbi yardım etdiyini və ona görə də İkinci Qarabağ müharibəsində qalib gəldiyini deyirlər. Müharibə dövründə Türkiyənin diplomatik, siyasi, mənəvi dəstəyi, təbii ki, oldu. Ancaq müharibə dövründə Türkiyə hərbi yardım etmədi. Azərbaycan bir sıra ölkələrdən, o cümlədən Türkiyədən silah alıb. Ancaq bu o demək deyil ki, Türkiyənin hərbi yardımı sayəsində Azərbaycan müharibədə qalib gəlib. O baxımdan Ərdoğan çox doğru olaraq vurğuladı ki, Azərbaycan öz haqq davasını özü həll etdi. Ərdoğanın bu açıqlaması həm də ermənilərin “Türkiyə Qarabağ müharibəsində gizli iştirak etdi” iddialarına cavabdır. Bütün bu deyilənlərin fonunda, Ərdoğan bununla nə demək istədi?
“Ərdoğan bununla nəinki ermənilərə, eyni zamanda onları himayə edən dövlətlərə və dairələrə açıq mesaj verdi”
Sözügedən məsələ ilə bağlı “Bakı-Xəbər”ə açıqlama verən hərbi ekspert Ramil Məmmədli hesab edir ki, Ərdoğan bununla nəinki ermənilərə, eyni zamanda onları himayə edən dövlətlərə və dairələrə açıq mesaj verdi: “Həqiqətən də 44 günlük Vətən müharibəsi dönəmində və ondan sonrakı dövrdə erməni təbliğatı, onları himayə edənlər bütün təbliğat fəaliyyətlərini bunun üzərində köklədilər. Guya Türkiyənin silahlı qüvvələri, zabitləri vuruşaraq əraziləri ələ keçirdilər. Əsasən bunu uydururlar ki, Türkiyə Suriyada döyüşən islamçı radikalları Qarabağa gətirərək aktiv döyüşlərə cəlb edib. Günü bu gün də həmin təbliğat davam edir. Hətta tanınmış erməni analitiklərindən olan Vladimir Poqosyan hər dəfə utanmadan deyir ki, 44 günlük müharibədə Türkiyənin 650 nəfər xüsusi təyinatlısı həlak olub. Bunlar bu dərəcədə xəstə məxluqdular. Məgər, Türkiyə tərəfdən kimsə gəlib döyüşsəydi və yaxud da həlak olsaydı bunu gizlətmək olardı? Bu mümkün olan iş deyil. Azərbaycan Ordusu öz gücü, canı-qanı bahasına əraziləri işğaldan azad edib. O baxımdan Ərdoğanın səsləndirdiyi fikirlər həqiqəti əks etdirir. Azərbaycan özü öz gücü hesabına ərazilərini azad edib. Azərbaycanın Ordu quruculuğunda Türkiyənin yardımı olub və bunu heç kəs danmır. Hər il iki ölkənin ordu birləşmələrinin genişmiqyaslı birgə təlimləri keçirilib. Həmin təlimlər müharibədən sonra da davam etdirilir. Türkiyə modeli əsasında Azərbaycan Ordusu qurulur və s. Bunda da heç bir qəbahət yoxdur. Hər bir müstəqil dövlətin kiminlə müttəfiqlik, əməkdaşlıq etməsi onun öz daxili işidir. Ermənilər və onları himayə edən dairələr dünyada belə bir saxta rəy formalaşdırmaq istəyirlər ki, guya Azərbaycan Türkiyənin hesabına müharibəni uddu. Əlbəttə ki, bütün bunların heç bir əsası yoxdur. Azərbaycan uzun hazırlıqdan sonra və yaranan əlverişli geosiyasi vəziyyətdən düzgün istifadə edərək işğala son qoydu. Bütün bu uğurların əldə olunmasında Ali Baş Komandan İlham Əliyevin müstəsna rolu olub”.
Vidadi ORDAHALLI
