Azərbaycanın İrandakı səfirliyinin fəaliyyətinin bərpası üçün şərtlər diplomatik missiyaya qarşı terror aktı işi üzrə istintaqın başa çatması, cinayətin icraçılarının və sifarişçilərinin məsuliyyətə cəlb edilməsindən ibarətdir.
Bu barədə Azərbaycan Xarici İşlər Nazirliyinin rəsmi nümayəndəsi Ayxan Hacızadə iyunun 12-də jurnalistlər üçün brifinqdə İran XİN-in mətbuat katibi Nasir Kənaninin fikirlərini şərh edərkən bildirib: “Terror aktını törədənlərin və sifarişçilərin məsuliyyətə cəlb olunmasıdır. Onlar ən sərt şəkildə cəzalandırılmalıdır. Azərbaycan tərəfi əmin olmalıdır ki, səfirliyin təhlükəsiz fəaliyyəti üçün şərait mövcuddur. İran tərəfi bununla bağlı tam zəmanət verilməlidir”.
İranlı diplomat bildirib ki, Bakı və Tehran gərginliyi azaltmaq üçün bir sıra addımlar atıblar. Onun sözlərinə görə, hazırda tərəflər danışıqlar mərhələsindədir ki, “gərginlik mərhələsindən yeni mərhələyə keçsinlər, Azərbaycanın Tehrandakı səfirliyi yenidən açılsın”.
“İndiki situasiyada Tehranda səfəriliyimizin fəaliyyəti təhlükəsizlik müstəvisində risqlidir”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, təhlükəsizlik tam təmin olunmadan səfirliyimizin yenidən fəaliyyəti mümkün görünmür: “Əvvəla, İranda səfirliyimizin fəaliyyətə başlaması üçün, hesab edirəm ki, Tehran tərəfinin arqumentləri yetərli deyil. İlk növbədə Tehran terroru rəsmən qəbul etməli, Azərbaycandan üzr istəməli və terrorçunu ölkəmizə təhvil verməlidir. İndiki situasiyada Tehranda səfəriliyimizin fəaliyyəti təhlükəsizlik müstəvisində risqlidir. Problem ondadır ki, Tehranın Azərbaycana qarşı destruktiv siysəti davam edir. Münasibətlər hələ ki, Tehran tərəfindən yalnız bəyanatlarda əks edilir. Konkret realda Tehran rejimi qeyri-obyektivdir. Fars şovinizmi Azərbaycana qarşı münasibətdə çalışır ki, səfirliyin açılmasına nail olsun. Ancaq Azərbaycanın buna getməsi risqlidir. Çünki Tehranın Azərbaycana qarşı hibrid və informasiya müharibəsi davam edir. Səfirliyimiz onda açıla bilər ki, Tehran rejimi Azərbaycanın təkliflərini icra etsin. Ancaq müşahidələr göstərir ki, İran hakimiyyəti heç nə olmamış kimi davranır. Onların istintaqı da manipulyasiyadır. Hesab edirəm ki, Azərbaycan özü də istintaq prosesində iştirak etməli idi. Belə olsaydı, o zaman araşdırmanın obyektiv olacağına inanmaq olardı. Tehran rejimi problem olmadığı görüntüsü yaradır, amma reallıq tamam fərqlidir. Ona görə də İran Azərbaycanı təhlükəsizliklə bağlı əmin etmək üçün konkret addımlar atmalıdır. Yalnız bütün bunlardan sonra münasibətlər normallaşa bilər”.
Vidadi ORDAHALLI
