2024-cü ildə keçiriləcək Ağır Atletika üzrə Dünya çempionatının yeri müəyyənləşib. Bu barədə qərarı Beynəlxalq Ağır Atletika Federasiyası verib. Qurum yarışın təşkilatçılığına 3 namizəd arasında seçim edib.
İcraiyyə Komitəsinin Kubadakı iclasında dünya çempionatının Bəhreyndə keçirilməsi qərara alınıb. Digər namizədlərdən biri Ermənistan isə İrəvanda keçirilən ağır atletika üzrə Avropa çempionatında baş verənlərə görə səsvermədə Asiya ölkəsinə uduzub. Beləliklə, 2024-cü ildə keçiriləcək ağır atletika üzrə dünya çempionatı Ermənistanda keçirilməyəcək.
Xatırladaq ki, aprelin 14-də Ermənistanın paytaxtı İrəvanda keçirilən ağır atletika üzrə Avropa çempionatının açılış mərasimində Azərbaycan Bayrağı yandırılıb. Ermənistanda Azərbaycana qarşı etnik zəmində nifrət və düşmənçiliyin təcəssümü olan həmin faktla bağlı Baş Prokurorluğun İstintaq idarəsində Cinayət Məcəlləsinin 12.2, 283.2.1 (zor tətbiq edilməklə milli nifrət və düşmənçiliyin salınması), 12.2, 283.2.2 (qulluq mövqeyindən istifadə etməklə milli nifrət və düşmənçiliyin salınması) və 12.2, 324-cü (Azərbaycan Respublikasının Dövlət Bayrağı barədə təhqiredici hərəkətlər) maddələri ilə cinayət işi başlanıb.
Bayraq yandıran Ermənistana beynəlxalq ictimaiyyət tərəfindən sərt reaksiyanın verilməsi gözlənilən idi.
“Ağır atletika üzrə Avropa çempionatının Ermənistanda keçirilməsi idmanın humanist və insanpərvər prinsiplərinin tapdalanması demək olardı, sevindirici haldır ki...”
Siyasi şərhçi Tural İsmayılov “Bakı-Xəbər”ə açıqlamasında qeyd etdi ki, İrəvanda keçirilən ağır atletika üzrə Avropa çempionatının açılış mərasimində baş verən biabırçılıqdan sonra o ölkənin iç üzü dünyaya bəlli oldu: “Məlum yarışdan sonra Ermənistanın heç bir formada beynəlxalq yarış, tədbirlər keçirmək kimi qabiliyyətinin olmadığı bir daha məlum oldu. Dəfələrlə, Ermənistan müxtəlif platformalardakı tədbirlərdə nifrət aşılayan məsələləri xüsusi qabardıb. Azərbaycan əleyhinə kin-küdurətlərini nümayiş etdiriblər. Ölkəmizin apardığı səylər nəticəsində Beynəlxalq İdman Federasiyası məlum hadisə ilə bağlı obyektiv qərar verdi. Ağır atletika üzrə Avropa çempionatının Ermənistanda keçirilməsi idmanın humanist və insanpərvər prinsiplərinin tapdalanması demək olardı. Bu baxımdan da hesab edirəm ki, beynəlxalq aləmdə Ermənistanın imici bir daha yerlə-yeksan oldu. Bir daha sübut olundu ki, Ermənistanın hansısa layihə və ya prosesdə iştirak etməyə hüququ çatmır”.
Günel CƏLİLOVA
