İran prezidenti İbrahim Rəisi və fransalı həmkarı Emmanuel Makron arasında telefon danışığı olub. İran mediası xəbər verir ki, tərəflər 90 dəqiqə danışıblar.
Söhbət zamanı Makron Parisin İran İslam Respublikası ilə əməkdaşlıq etmək niyyətində olduğunu vurğulayıb.
Prezidentlər iki ölkə arasında əlaqələrin inkişaf etdirilməsi yollarını da müzakirə ediblər. Həmsöhbətlər İran əleyhinə sanksiyaların ləğvi və regiondakı vəziyyətlə bağlı danışıqları davam etdirmək barədə razılığa gəliblər.
Bunların danışığının bu qədər uzun çəkməsi Ermənistana dəstək, Azərbaycana təzyiq yollarının axtarışı ilə bağlı ola bilərmi? Çünki hər iki ölkə birmənalı olaraq Ermənistana dəstək verir.
Siyasi şərhçi Sahil Kərimli “Bakı-Xəbər”ə açıqlamasında bildirdi ki, İran Prezidentinin Fransa Prezidenti ilə uzun-uzadı telefonla danışması, bölgədəki vəziyyəti müzakirə etməsi tərəflərin Cənubi Qafqazda baş verən proseslərə məkrli yanaşmasından xəbər verir: “ İran və Fransanın heç vaxt olmadığı kimi yaxınlaşması, Ermənistana havadarlıq etməsi bu ölkələrin bölgəmizə nüfuz etmə istəklərindən irəli gəlir. İş o yerə çatıb ki, Fransa prezidenti Makron İrana əməkdaşlıq təklifləri edir, əlaqələrin inkişaf etdirilməsi yolları müzakirə olunur. Məlumdur ki, İranın Avropa ilə münasibətləri daim düşmənçilik həddində olub. İndi necə olur ki, Fransa molla rejimi ilə yaxınlıq edir? Yayılan rəsmi məlumatlardan görünür ki, telefon danışığı zamanı İrana qarşı tətbiq edilən sanksiyaların ləğvi məsələsi də müzakirə edilib. Bütün dünya İranla düşmən olarkən, cinayətkar, terrorçu fars molla rejiminə lənətlər oxunarkən Parisin Tehranla mehriban münasibətləri sadəcə ikrah hissi yaradır. Bu durum Makronla Rəisinin riyakarlığının bariz nümunəsidir. Görünən odur ki, Azərbaycana qarşı bəslənən düşmənçilik hissi, bölgəmizdə gedən proseslərə nüfuz etmək, öz varlığını qoruyub saxlamaq cəhdləri İranla Fransanı qardaşlaşdırır. Ermənistan isə sadəcə bir vasitədir. Fransa və İranın əlində bir oyuncaqdır. Rəisi ilə Makron 90 dəqiqə yox, lap 3 saat danışsalar da, hansı mənfur planlar qursalar da istəklərinə nail ola bilməyəcəklər. Azərbaycan dövlətinin qətiyyəti və milli maraqlardan bir addım belə geri çəkilməməsi Parislə Tehranın planlarını alt-üst edəcək. Biz buna əminliklə inanırıq”.
Siyasi şərhçi hesab edir ki, hər üç ölkənin mahiyyəti faktiki olaraq eynidir: “Bir-birini yaxşı tapıblar. Görünən odur ki, Fransa, İran və Ermənistanın yürütdüyü riyakar siyasi kurs iflasa məhkumdu.
Hazırda Makron hakimiyyətinin dünyadakı nüfuzu olduqca aşağı səviyyədədir. Fransa lideri artıq əksər beynəlxalq dairələr tərəfindən ciddi qəbul edilmir. İranın molla rejiminin isə mahiyyəti həmişə göz önündə olub. Terrorçuluğa dəstək, öz vətəndaşlarına qəddarcasına divan tutmaq, insan hüquq və azadlıqlarını kobudcasına pozmaq və digər qeyri-insani hərəkətlər rəsmi Tehranın əsas prioriteti olub. Buna görə də artıq İran hakimiyyətinin legitimliyi ciddi sual altındadır. İranda hakimiyyətin tezliklə dəyişəcəyi, indiki İran adlanan ərazidə tamamilə yeni düzən yaranacağı və hətta bölgədə yeni dövlətlərin meydana gələcəyi artıq görünməkdədir”.
Məhəmmədəli QƏRİBLİ
