Keçən həftə Ermənistan Respublikası Milli Assambleyasının sədri Alen Simonyan Londonda Böyük Britaniyanın mədəniyyət naziri Con Uittinqdeyl ilə görüşüb.
“Armenpress”in Ermənistan Respublikası Milli Assambleyasının hesabatına istinadən verdiyi məlumata görə, Böyük Britaniya-Ermənistan parlament dostluq qrupunun uzun müddət üzvü olan nazir, guya “44 günlük hərbi təcavüz nəticəsində Dağlıq Qarabağda erməni mədəni irsinin azərbaycanlılar tərəfindən məhv edilməsi barədə kifayət qədər məlumatlı” olduğunu deyib. Guya Böyük Britaniyanın mədəniyyət naziri Azərbaycanı “hərbi təcavüzdə” və “erməni mədəni irsi”ni “dağıtmaqda, “fundmental insan hüquqları”nı pozmaqda ittiham edib. Doğrudanmı, Böyük Britaniyanın mədəniyyət naziri “Dağlıq Qarabağ” ifadəsi işlədib və Azərbaycanın “erməni mədəni irsini məhv etdiyini” deyib? Bu suala birmənalı cavab vermək olmaz, çünki informasiyanın əsli ilə tanış deyilik. Amma bu gün artıq “Dağlıq Qarabağ” adlı bir ərazi vahidinin olmadığı beynəlxalq aləmə məlumdur və artıq bir sıra rəsmilər bu ifadəni işlətməkdən imtina edib. Bu halda Böyük Britaniyanın mədəniyyət naziri niyə belə bir ifadə işlətsin ki? Adama qəribə gəlir. Amma bütün hallarda sözügedən ölkənin mədəniyyət nazirindən açıqlama tələb olunmalıdır ki, niyə belə həqiqətə uyğun olmayan informasiya səsləndirib, əgər səsləndirməyibsə, bu barədə Ermənistana irad bildirməlidir.
Bütün hallarda bu məlumatı erməni mənbələri yayıb və bunun dəqiq olması ciddi şübhələr doğurur. Amma mütləq şəkildə Böyük Britaniyanın mədəniyyət naziri buna reaksiya verməlidir. Təbii, belə deyibsə, Azərbaycan buna reaksiya verəcək, yox əgər belə deməyibsə, erməni KİV-ləri onun fikirlərini təhrif ediblərsə, buna Böyük Britaniyanın Mədəniyyət Nazirliyinin mövqeyi olmalıdır.
"Əgər nazirin fikri təhrif olunubsa, Böyük Britaniyanın Mədəniyyət Nazirliyi Ermənistan Milli Assambleyasına müraciət etməlidir ki, mediada gedən təxribatçı fikirlər yığışdırılsın"
AMEA-nın A.Bakıxanov adına Tarix İnstitutunun əməkdaşı, mədəni irs üzrə görkəmli mütəxəssis Faiq İsmayılov “Bakı-Xəbər”ə şərhində bildirdi ki, Ermənstan mətbuatının saxta xəbər yayması artıq bir “ənənəyə” çevrilib və onlar daim xarici ölkə rəsmilərinin açıqlamalarını saxtalaşdıraraq yayıyırlar. F.İsmayılov onu da qeyd etdi ki, bütün gerçəklik göz önündədir və britaniyalı nazirin reallıqları görməzdən gəlməsi şübhəli suallar doğurur. “Bütün dünya bilir ki, Ermənistan təcavüzkar ölkədir və Azərbaycan torpaqlarını işğal edib. Ermənistanın mədəni irsimizin başına gətirdiyi faciələr də məlumdur. Azərbaycan ərazisində heç bir erməni mədəni irsi olmayıb, ermənilərin öz adlarına çıxdıqları mədəni irs isə alban isidir ki, onun da qanuni sahibi bizik. Britaniyanın mədəniyyət naziri bunu bilməmiş olmaz. Böyük Britaniyanın mədəniyyət naziri gerçəkliyi bilib, lakin erməni təxribatına uyub belə bir açıqlama veribsə, mütləq şəkildə buna aydınlıq gətirməlidir və Azərbaycandan üzr istəməlidir. Yox, əgər o belə bir söz söyləməyibsə, onda erməni mediasına öz iradını bildirməlidir ki, səhvlərini düzəltsinlər. Erməni mətbuatı indiyə qədər çox insanların fikirlərini təhrif edib, amma buna görə heç kəs onlara irad bildirməyib. Amma fikrimcə, əgər nazirin fikri təhrif olunubsa Böyük Britaniyanın Mədəniyyət Nazirliyi Ermənistan Milli Assambleyasına müraciət etməlidir ki, mediada gedən təxribatçı fikirlər yığışdırılsın. Çünki bu çox ziyanlı fikirdir".
F.İsmayılov hesab edir ki, Azərbaycan tərəf erməni mediasında gedən hər bir anti-Azərbaycan xəbərinə ciddi yanaşmalı və xarici dövlət rəsmilərinin dilindən yayılan hər bir ifadəyə görə qarşı tərəfdən cavab tələb etməlidir. Böyük Britaniyanın Azərbaycandakı səfirliyinə də bu barədə məlumat verilməlidir ki, bu ölkənin mədəniyyət nazirinin belə bir ifadə işlədib-işləmədiyini araşdırıb məlumat versin. "Böyük Britaniyanın mədəniyyət naziri saxtakarlıq edib necə iddia edə bilər ki, Azərbaycan erməni irsini məhv edib? Azərbaycan heç kəsin irsini dağıtmayıb. Tam əksi baş verib. Britaniyalılar gəlib Qarabağda mənə tək bir dənə erməni mədəni irsinə aid abidə göstərsinlər, sonra biz onlarla söhbət edə bilərik. Təbii, varsa. Nə Qarabağda, nə onun əhatəsindəki Şərqi və Qərbi Zəngəzur ərazisində heç bir erməni mədəni irsi yoxdur, bugünə qədər də olmayıb. Onlar Azərbaycan torpaqlarını işğalda saxladıqları illərdə 20 kilsə tikiblər. Bu da qanunsuz sayılır, çünki 1954-cü ildə qəbul olunmuş Haaqa konvensiyanın müvafiq müddəasına görə, işğal olunmuş ərazilərdə bu və ya digər abidələrin tikilməsi yolverilməzdir. Ermənilər son 30 ildə orada nə tikiblərsə hamısı qanunsuzdur" - deyə F.İsmayılov bildirdi.
İradə SARIYEVA
