Məlum olduğu kimi, Paris Şəhər Şurası yekdilliklə Qarabağda yaşayan ermənilərə təcili yardımın göstərilməsi haqqında qətnamə qəbul edib. Qətnamənin məqsədi Qarabağda yaşayan ermənilərə "humanitar yardım" göstərilməsidir.
Bu isə o deməkdir ki, milyonlarla insanın ölümünə səbəb olan, humanislik anlayışdan bixəbər olan Fransa ermənilərin uydurduğu "humanitar böhran" yalanına dəstək olmağa, hər kəsi bu yalana inandırmağa çalışır.
Azərbaycanın Dövlət Sərhəd Xidmətinin bölmələrinin Laçın-Xankəndi yolunun başlanğıcında qurduğu sərhəd-buraxılış məntəqəsi vasitəsilə erməni əsilli şəxslər heç bir maneə ilə üzləşmədən günün istənilən saatında istifadə etdikləri halda, onların nəzarət-buraxılış məntəqəsindən rahat keçidi üçün hər bir şəraitin yaradıldığına baxmayaraq, Fransa bu addımı ilə Azərbaycana qarşı açıq təxribata davam etməkıə yanaşı, separatizmi dəstəklədiyini növbəti dəfə nümayiş etdirmiş olur.
Onu da qeyd edək ki, Fransa tərəfindən bu cür qərar və qətnamələr çox olub. Lakin uydurma yalanlarla qəbul edilən qətnamə, qərarlar reallıq qarşısında acizdir və buna görə də heç bir təsir gücünə sahib olmur.
“Qarabağ ermənilərinin hansısa dərdi, humanitar yardıma ehtiyacı varsa Azərbaycan dövləti sağ olsun, Azərbaycan dövləti onların problemini həll etməkdən çəkinən deyil”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, humanitar yardımın göstərilməsi nəcib bir əməldir. Bu barədə qərar verilməsi də xoşdur. Paris Şəhər Şurasının üzvləri həqiqətən hesab edirlər ki, Qarabağdakı ermənilərə yardım göstərmək lazımdırsa, etsinlər: “İlk öncə onlar bilməlidir ki, həmin yardımlar əvvəlcə Azərbaycana göndərilməlidir. Dövlətimiz müvafiq şəkildə həmin yardımları məqsədəuyğun bilsə, Qarabağdakı ermənilərə çatdıra bilər. Eyni zamanda, Paris Şəhər Şurasının belə bir qərar qəbul etməsinin hansı zərurətdən yarandığı da naməlumdur. Maraqlıdır, Qarabağda yaşayan ermənilərin nə problemi var ki, onların imdadına Paris Şəhər Şurası yetir? Hansısa ölkənin bir şəhərinin bəlli olmayan şurası Azərbaycan dövlətindən güclüdümü ki, onlar bu problemləri həll etmək istəyir? Adıçəkilən şura bu suallara cavab verməlidir”.
Siyasi şərhçinin sözlərinə görə, Qarabağ ermənilərinin hansısa dərdi, humanitar yardıma ehtiyacı varsa Azərbaycan dövləti sağ olsun. Azərbaycan dövləti onların problemini həll etməkdən çəkinən deyil: “Paris Şəhər Şurasının belə bir cəhd etməsi düzgün deyil. Yardıma ehtiyacları varsa, buyursunlar Bakıya müraciət etsinlər”.
Günel CƏLİLOVA
