Ermənipərəst senatorlar yenə çirkin kampaniya ilə məşğuldurlar. Ənənəvi olaraq yenə erməni lobbisi bir qrup senatoru satın alaraq bundan öz mənfur məqsədləri üçün istifadə etməyə çalışır.
Bir qrup respublikaçı və demokrat senator Azərbaycanın Laçın yolunun “blokadası” kontekstində Bayden administrasiyasını ölkəmizin rəsmilərinə qarşı sanksiyalar tətbiq etməyə və Azərbaycana bütün hərbi yardımı dayandırmağa çağıran ikipartiyalı qanun layihəsi təqdim ediblər. Həmin layihədə deyilir: “Bu, blokada humanitar böhran yaradıb, Qarabağın 120 min ermənisini ərzaq, dərman və digər ilkin tələbat mallarından məhrum edib. Qətnaməmiz aydın göstərəcək ki, Birləşmiş Ştatlar Azərbaycanı məsuliyyətə cəlb etmək üçün addımlar atmalıdır. Biz Azərbaycanı düşünülmüş bu humanitar böhrana son qoymağa çağırmaqda həmrəyik”.
Bu dərəcədə yalan olarmı? Hansı blokadadan söhbət gedə bilər ki, gün ərzində Ermənistandan Qarabağa və əks istiqamətdə normal gediş-gəliş təmin olunur?
Məsələ ilə bağlı baki-xeber.com-a açıqlama verən politoloq Tural İsmayılov hesab edir ki, bəlli senatorlar erməni lobbisinin əlində alətə çevriliblər: “Məsələ ondadır ki, Birləşmiş Ştatlardakı erməni diasporu tarixboyu reallıqları görməzdən gəlib. Onların ötən bu dövr ərzində ən böyük məqsədlərindən biri hər zaman ədalətsizliyə xidmət etməkdən ibarət olub. Eyni zamanda, Azərbaycana qarşı birtərəfli, qəbuledilməz qərəzli mövqe nümayiş etdirmələri birinci dəfə deyil baş verir. Bütövlükdə isə hesab edirəm ki, bu gün ABŞ-ın Azərbaycanla Ermənistan arasında münasibətlərin normallaşdırmaqla bağlı ortaya səmimi mövqe qoyduğu bir dövrdə, iradə nümayş etdirdiyi bir vaxtda belə çağırış qəbuledilməzdir. Bəzi senatorların vəziyyəti gərginləşdirmək üçün atdığı addımlar əsla qəbul oluna bilməz. Nəzərə almaq lazımdır ki, bu gün Azərbaycan öz ərazilərində qanuni şəkildə sərhəd-buraxılış məntəqəsi yaradıb. Bu sərhəd-buraxılış məntəqəsi hansısa bir formada Xankəndidə yaşayan ermənilərin humanitar böhranla üzləşməsinə səbəb ola bilməz. Əslində Birləşmiş Ştatlardakı senatorlar beynəlxalq hüquq, ədalətdən dəm vursalar da, açıq şəkildə beynəlxalq hüquqda tanınmış Azərbaycan ərazilərinə qarşı təxribatçı fəaliyyətlə məşğuldurlar. Bu da əsla qəbul edilən deyil. Bəzi senatorlar ABŞ-ın dövlət maraqlarını erməni lobbisinə satıblar. Halbuki, regionda Azərbaycanın ABŞ üçün strateji önəmi daha böyükdür. Ancaq müəyyən senatorlar öz şəxsi maraqlarından çıxış edərək növbəti gərginlik yaratmaq istəyirlər. Bütün bunların fonunda hesab edirəm ki, ermənipərəst senatorların çağırışları bir nəticə verməyəcək. Yəni, Azərbaycana qarşı hansısa sanksiya qəbul olunmayacaq”.
Vidadi ORDAHALLI
