Azərbaycan Respublikasının xarici işlər naziri Ceyhun Bayramovla İran İslam Respublikasının xarici işlər naziri Hüseyn Əmir Abdullahian arasında telefon danışığı baş tutub.
Telefon danışığı zamanı, Azərbaycanla İran arasında münasibətlərin cari vəziyyəti, bəzi mövcud problemlər və onların həlli məsələləri müzakirə edilib. Qeyd edilən istiqamətlərdə iki ölkənin aidiyyəti qurumları arasında danışıqların və qarşılıqlı təmasların davam etdirilməsinə dair razılıq ifadə olunub. Telefon danışığı zamanı həmçinin bir sıra regional məsələlər ətrafında fikir mübadiləsi aparılıb.
Bu danışıqlar nə vəd edir və İran -Azərbaycan münasibətlərinin normallaşması üçün rəsmi Tehran hansı addımları atmalıdır?
Müstəqil siyasətçi Mirkazım Seyidov “Bakı-Xəbər”ə açıqlamasında bildirdi ki, belə telefon danışıqları keçmiş aylarda da olub, ancaq münasibətlərin normallaşmasına müsbət təsir etməyib: “Azərbaycanın İranla heç bir problemi yoxdur, bu ölkənin daxili məsələlərinə qarışmaq marağında deyil. Amma İranın hərbi-siyasi və dini rəhbərliyi hər zaman Azərbaycanın daxili məsələlərinə qarışmağa, ölkəmizdə siyasi vəziyyətə təsir etməyə çalışıb.
Ölkəmizin daxili işlərinə qarışmamaqla bağlı İrana dəfələrlə xəbərdarlıq edilsə də, Tehran məqsədyönlü şəkildə xəbərdarlığımıza məhəl qoymayıb.
Azərbaycan heç vaxt nə İran, nə Rusiya, nə də hər hansı dövlətin vassalı olmayacaq. İran rəhbərliyi, həqiqətən Azərbaycanın siyasi, iqtisadi və hərbi inkişafını həzm edə bilmir. Ona görə ki, regionda qüdrətli Azərbaycan İranın maraqları üçün münasib deyil.
Halbuki Azərbaycan bütün hallarda İranla münasibətləri qonşuluq çərçivəsində inkişaf etdirmək, normallaşmaq məqsədi güdüb. Azərbaycan Prezidenti İlham Əliyev öz açıqlamalarında qeyd edib ki, Azərbaycan İranla münasibətlərdə problemlər görmək istəmir. İranda qərarları həmin ölkənin Xarici İşlər Nazirliyi vermir. İranda Azərbaycanla bağlı qərarları güc strukturları – İran İslam Keşikçiləri Korpusu və ona aid strukturlar verirlər. Deməli, münasibətlərin normallaşması üçün bu strukturların qərar verməsi lazımdır. Onlar qərar vermədən İran Xarici İşlər Nazirliyi istəsə belə münasibətləri normallaşdıra bilməyəcək. Ola bilər ki, nazirlərin telefon danışığından sonra növbəti təxribatla üzləşək. İki ölkə arasında ortaq layihələrin icrası vacibdir. Ancaq münasibətlərdə gərginlik azalmadan, İrandakı bütün strukturlar Azərbaycanın daxili işlərinə qarışmaqdan vaz keçməyincə, təxribatlarını durdurmadıqca, ortaq iqtisadi layihələrin reallaşması çətin olacaq. Azərbaycan səfirliyinə edilən hücumun araşdırılması barədə Bakıya müfəssəl məlumat verilməlidir”.
Məhəmmədəli QƏRİBLİ
