Rusiya sülhməramlıları bölgəyə sülhü təmin etmək adı ilə müvəqqəti yerləşdirilsə də, təəssüf ki, biz onları birmənalı olaraq erməni separatçılarının müdafiəçisi, himayəçisi sifətində görürük.
Dəfələrlə, müxtəlif sosial şəbəkələrdə, informasiya resurslarında Rusiya sülhməramlı kontingentinin müşayiəti ilə Xankəndiyə silah-sursat daşındığını əks etdirən videogörüntülər yayılıb. Sülhməramlıların bu davranışları ciddi tənqid edilib. Buna baxmayaraq, yenə də onlar öz işlərindədir.
Müdafiə Nazirliyinin yaydığı məlumata görə, iyunun 8-i saat 07:40-da Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri tərəfindən Azərbaycan Ordusunun Şuşa şəhəri istiqamətində yerləşən mövqeləri də atəşə tutulub. Bölmələrimiz tərəfindən qeyd olunan istiqamətlərdə adekvat cavab tədbirləri görülüb.
Azərbaycan ordusunun son zamanlar bu şəkildə intensiv atəşə tutulması onun nəticəsidir ki, hələ də Rusya sülhməramlıları separatçıların silahlanmasına şərait yaradır.
Mətbuatda yayılan son görüntülərə görə, Rusiya sülhməramlı kontingenti tərəfindən qeyri-qanuni erməni silahlı dəstələri üçün daşınan hərbi yüklərin mühafizəsi davam etdirilir.
Təqdim edilən videogörüntüdə sülhməramlıların ZTR-82A zirehli texnikasının müşayiəti ilə Xankəndi-Kərkicahan-Xəlfəli yolu ilə ermənilərin 4 ədəd yük “KamAZ”ı, 1 ədəd çən olan “KamAZ”ı və 1 ədəd UAZ-ın hərəkəti aydın görünür.
Hərbi kolonla ermənilərin döyüş mövqelərinə təminat daşınması icra edilir.
Sülh danışıqlarının indiki mərhələsində sülhməramlıların bu təxribatı nəyə xidmət edir?
“Sülh danışıqları nə qədər intensiv şəkildə gedəcəksə, bir o qədər intensiv şəkildə Rusiya onu pozmağa cəhd göstərəcək”
Mövzuya şərh verən politoloq Mehman İsmayılov “Bakı-Xəbər”ə “Avropa İttifaqının və ABŞ-ın vasitəçilik missiyasının intensivləşməsi, danışıqların intensiv şəkildə sülhə doğru irəliləməsi Rusiya Federasiyasının planlarına daxil deyil. Rusiya Güney Qafqazda sülhün bu şərtlərlə olmasının, ümumiyyətlə sülh prosesinin olmasının tərəfdarı deyil. Azərbaycan ərazisindən separatizmin kökünün tamamilə kəsilib atılması Rusiyanın maraqlarına cavab vermir. Rusiya separatizmi müdafiə edir, Ermənistanın sülhə gəlməsinə imkan vermir. Delimitasiya, demarkasiya proseslərinin həyata keçiriməsini istəmədiyi üçün mütləq separatizmi qüvvətləndirir ki, Azərbaycan bu separatizm dalğasından yaxasını qurtara bilməsin. Rusiyanın təxirə salınmış ermənilərə “status” verilməsi məsələsi də bu məqsədə xidmət edir. Əgər Rusiya 2025-ci ilə qədər sülh müqaviləsinin imzalanmasına imkan verməsə, belə ümid edirlər ki, yenə də Azərbaycan ərazisində - Qarabağda özlərinin dağıdıcılıq missiyasını sülhyaratma bəhanəsi adı altında davam etdirə biləcəklər”-deyə şərhində bildirdi.
M.İsmayılov hesab edir ki, İran, Rusiya və Fransa sülhün yaranmasına, sülh müqaviləsinin imzalanmasına nəinki qəti şəkildə səy göstərmirlər, hətta var gücləri ilə buna maneçilik törədirlər. “Rusiya Azərbaycanın ərazisində problem var ikən burada qala bilir. O mexanizmləri qorumağa çalışır ki, Azərbaycan ərazisində qalıb bütöv Güney Qafqazı və Azərbaycanı öz təsir zonasında saxlaya bilsin. Ona görə də separatçıları qızışdıracaq, mitinqlər təşkil edəcək, Ruben Vardanyan kimi murdar ünsürləri qızışdıracaq, erməni əhalinin Azərbaycanla reinteqrasiyasına imkan verməyəcək, sülh müqaviləsinin imzalanmaması üçün daim çatışmalar çıxaracaq, Ermənistanı silahlandıracaq, ümidləndirəcək. Bu, Rusiyanın indiyə qədər həyata keçirdiyi siyasətin tərkib hissələridir. Ona görə də sülh danışıqları nə qədər intensiv şəkildə gedəcəksə, bir o qədər intensiv şəkildə Rusiya onu pozmağa cəhd göstərəcək”-deyə M.İsmayılov vurğuladı.
Leyla QARAXANLI
