Elşad Musayev: “Çünki sərt davransa Ermənistanı birdəfəlik itirə bilər”
Məlum olduğu kimi, bu günlərdə Ermənistan Təhlükəsizlik Şurasının katibi Armen Qriqoryanın 10 noyabr 2020-ci il razılaşmasına zidd olaraq bəyan etdi ki, Azərbaycanla kommunikasiyalar açılacağı təqdirdə, Zəngəzurdan keçən yola Rusiya yox, yalnız Ermənistan nəzarət edəcək. Halbuki, razılaşmada həmin yolun Rusiya FTX-si tərəfindən mühafizə olunması öz əksini tapıb.
Ancaq təəccüblüdür ki, Rusiyanın buna münasibəti çöx yumşaq oldu. Zaxarova keçirdiyi ənənəvi brifinqdə suallara cavab verərkən dedi ki, sözügedən məsələdə Rusiya dialoqun tərəfdarıdır. Bir kəlmə demədi ki, bu, üçtərəfli razılaşmaya ziddir: “Birincisi, yaxşı olardı ki, Ermənistanın adını çəkdiyiniz yüksək vəzifəli rəsmisi hər halda seçim etsin: ya normal dialoq, belə bir dialoq nəinki mümkündür və hətta olmalıdır, çünki bizim Ermənistan tərəfi ilə belə bir təcrübəmiz var, ya da bax belə bəyanatlar. Biz birincini seçirik”.
Maraqlıdır, Rusiya Ermənistanın atdığı addımlara, sərt ritorikaya niyə hər dəfə yumşaq və dözümlü münasibət sərgiləməkdə davam edir?
- “Ukraynada ciddi problemlə üzləşdiyi üçün istəmir ki, İrəvanla körpüləri tam yandırsın”
Sözügedən məsələyə aydınlıq gətirən Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bunun səbəbini bir sıra amillərlə əlaqələndirdi: “Doğrudan da Ermənistan Təhlükəsizlik Şurasının katibi Armen Qriqoryanın bununla bağlı mövqeyi çox sərt idi. O deyir ki, kommunikasiya xətləri açılacağı halda, onlara nəzarəti Ermənistan həyata keçirəcək. Bu, həqiqətən də üçtərəfli razılaşmanın şərtlərinə ziddir. Çünki yola nəzarət Rusiyanın əlində olmalıdır. Əslində o dövrdən 3 ilə yaxın vaxt keçib. Bu müddət ərzində həm regionda, həm də dünyada reallıqlar xeyli dəyişib. Ermənistan görəndə ki, bütün böyük güclər, maraqlı qüvvələr Zəngəzur dəhlizinin açılmasında maraqlıdır, ritorikanı dəyişdi. İndi Zəngəzur dəhlizinin açılmasına razılıq verir, amma deyir bu mənim nəzarətimdə olmalıdır. Burada digər səbəblər də var. Məsələ ondadır ki, ABŞ-da keçirilən görüşdə Ermənistanın qarşısına şərt qoyuldu. Ya Qərbin tərəfində durun, ya da Rusiyanın yanında yer alın. Ona görə də Ermənistanın bu yöndə Rusiyaya müqaviməti artır. Bir tərəfdən, Ermənistan Zəngəzurdan keçən yola dəhliz statusunun verilməsini istəmir. Digər tərəfdən, veriləcəyi halda ona özü nəzarət etmək istəyir. İstəkləri o idi ki, Laçın yolunda əvvəlki sərbəstlik olsun. Rusiyanın buna sərt cavab verməməsinin bir səbəbi onunla bağlıdır ki, Ukraynada ciddi pronlemlə üzləşiblər. Bu baxımdan istəmir ki, Ermənistanla körpüləri tam yandırsın. Çünki sərt davransa Ermənistanı birdəfəlik itirə bilər. Onsuz da Paşinyan bunu arzulayır. Çünki o dəqiqə Rusiyanın yerini Qərb dolduracaq. Ancaq onu da nəzərə almaq lazımdır ki, Ermənistana Rusiyanın təsir rıçaqları çoxdur. Bu təsir vasitələrindən istifadə edib, Ermənistanı cəzalandıra bilər. Sadəcə, mövcud reallıqlarla əlaqədar Rusiya sərt addımlar atmaq istəmir”.
Vidadi ORDAHALLI
