Mirzoyan ərazilərin qarşılıqlı rəqəmli tanınması üzərində yeni pozuculuğa başladı - Praqa bəyanatı kifayət deyil?

Məlum olduğu kimi, iyunun 12-də Vaşinqtonda Azərbaycan və Ermənistan xarici işlər nazirlərinin görüşü olacaq. Daha sonra, iyulun 21-də Brüsseldə Azərbaycan prezidenti İlham Əliyev və Ermənistanın baş naziri Nikol Paşinyan arasında görüş olacaq.

Hər zaman olduğu kimi, yenə erməni rəsmilər ziddiyətli fikirlər səsləndirirlər. Ermənistan xarici işlər naziri Ararat Mirzoyan iyunun 5-də parlamentdəki çıxışında demişdi ki, ərazi bütövlüyünün rəqəmlərlə göstəricisi gələcək sülh müqaviləsində olmayacaq: “Ermənistan ərazisinin 29,8 min, Azərbaycan ərazisinin isə 86,6 min kvadrat kilometr olmasına dair bəyanatlar siyasi bəyanatlardır. Söhbət ondan gedir ki, bu iki sosialist respublikası Sovet İttifaqının tərkibində olarkən mövcud olmuş sərhədlər daxilində Ermənistanın Azərbaycana və Azərbaycanın Ermənistana ərazi iddiaları yoxdur”.

Ancaq iyunun 7-də Mirzoyan tam əks mövqedən çıxış edərək, Azərbaycanı Ermənistanın ərazi bütövlüyünü tanımamaqda ittiham edib: “Siz düzgün diqqət etmisiniz ki, Azərbaycan prezidenti Ermənistan Respublikasının 29 min 800 kvadrat kilometrlik ərazi bütövlüyünü tanıdığını açıq bəyan etməyib”.

Praqa görüşündə Azərbaycan da Ermənistanın ərazi bütövlüyünü tanıyıb. Məgər bu kifayət deyil?

• “Azərbaycan beynəlxalq hüquqa hörmət edən ölkədir”

Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, Ermənistan rəsmilərin söz oyunu ilə məşğuldular: “Ermənistan rəsmiləri son dövrlərdə Azərbaycanın ərazi bütövlüyünü təsdiqləyən bəyanatlar səsləndiriblər. Hətta Ermənistan baş naziri Nikol Paşinyan da son çıxışlarında bir neçə dəfə Azərbaycanın 86.6 km olduğunu dilə gətirib. Ermənistan rəsmiləri Azərbaycanın ərazi bütövlüyünü SSRİ-nin tərkibində olduğu kimi tanımaq istəyirlər. Bu isə o deməkdir ki, Qərbi Azərbaycanı yenidən ermənilərdən azad etməyin sədalarını artıq onlar da hiss edir. Eyni zamanda onlar da yaşadıqları ərazilərin Azərbaycan ərazisi olduğunu qəbul edirlər. Ermənilər razılaşmaları əldən verməmək üçün tez-tez Azərbaycanın ərazi bütövlüyü haqqında danışıblar. Bu günlərdə Ermənistan xarici işlər naziri Ararat Mirozyan da öz müsahibəsində Azərbaycan ərazisinin 86,6 min kvadrat kilometr olmasını dilə gətirib. Bununla da o, Azərbaycanın nə qədər əraziyə sahib olduğunu diqqətə çatdırır, eləcə də sərhədləri göstərir. Ancaq Azərbaycan beynəlxalq hüquqa hörmət edən ölkədir. Qərbi Azərbaycana köç prosesi mənəvi və psixoloji hazırlıqla başlayıb. Biz artıq ata-baba yurdumuza köçmək haqqında düşünürük.  Cənab Prezident İlham Əliyev də qeyd edib ki, Qərbi azərbaycanlılar öz dədə-baba torpaqlarına qayıtmalıdırlar. Bu onların hüququdur, bütün beynəlxalq konvensiyalar bu hüququ onlar üçün tanıyır. Biz də Azərbaycan dövləti olaraq əlimizdən gələni etməliyik ki, bu hüququ təmin edək. Ancaq bu, o demək deyil ki, Azərbaycan Ermənistana yönəlik ərazi iddiaları ilə çıxış edirik. Biz deyirik ki, Qərbi Azərbaycandan qovulan soydaşlarımız öz yurdlarına qayıtmalıdılar. Bu onların hüququdur. Çünki həmin ərazilər bizim ata-baba yurdumuzdur. Ermənistan rəsmiləri isə rəqəmlər üzərindən söz oyunu ilə məşğuldular”.

Vidadi ORDAHALLI