Ermənistanın keçmiş baş naziri Vazgen Manukyan bildirib ki, anklavların Azərbaycana verilməsinin heç bir hüquqi əsası yoxdur. O bildirib ki, Ermənistanın təslim olması növbəti müharibə üçün Azərbaycana daha sərfəli mövqelər yaradacaq.
Manukyan, həmçinin, Qarabağı təslim etməklə erməni xalqının sülh içində yaşaya biləcəyi fikrini absurd adlandırıb: “Ermənistanın Qarabağ xalqının müstəqillik hüququnun qəbulunu öz məqsədi kimi elan etməməsi artıq bizi bütün dünya qarşısında aşağılayır. Mən xüsusi olaraq hüquq-mühafizə orqanlarına müraciət edirəm. Siz Nikol Paşinyanı müdafiə etmək üçün and içmədiniz, Vətəni, dövləti, Konstitusiyanı və qanunları müdafiə etmək üçün and içdiniz. Nikol Paşinyanın etdiyi və etmək istədiyi şey, ilk növbədə, bizim Konstitusiyaya və qanunlarımıza ziddir. Nikol Paşinyanın özü artıq qeyri-legitimdir”.
Hiss olunur ki, ermənilər istər dövlətlərarası danışıqlarda, istərsə də ictimai müzakirələrdə anklavların geri qaytarılması ilə bağlı prosesdən yayınmaq üçün əsaslar axtarırlar. Şahinyan soyadlı bir kartoqraf isə müsahibəsində bildirir ki, 1920-30-cu illərin xəritələrində həmin anklavların Azərbaycana aid olduğuna dair heç bir dəlil yoxdur. Ermənilərin anklavlarla bağlı etdiyi cığallığın kökündə nə durur?
Hərbi-siyasi şərhçi Emin Həsənli “Bakı-Xəbər”ə açıqlamasında bildirdi ki, Ermənistan hər zaman müxtəlif bəhanələrlə danışıqları pozur: “Onlar yaxşı başa düşürlər ki, Azərbaycan bir kəndini belə güzəştə getməyəcək. Bu ərazilər Azərbaycanındır və hamısı qayıtmalıdır. Bu ərazilər həm Qazax, həm də Naxçıvan istiqamətində çox strateji ərazilərdir, strateji yolların üzərindədirlər. Ona görə ermənilər 70-ci illərin xəritələrinə görə bu əraziləri qaytarmayacaqlarsa, Azərbaycan SSRİ-yə daxil olma xəritəsini müzakirə edə bilər. Həmin məsələ ilə avtomatik Zəngəzur, Göyçə Azərbaycanın olar. 1918-ci ildə İrəvan və ətrafı 20 min km onlara verildi. Yəni bu məsələlər müzakirə oluna bilər. Azərbaycan qalib dövlətdir. Ermənistan məğlub dövlətdir. Yenə də SSRİ dağılarkən olan məsələnin birdəfəlik öz həllini tapması lazımdır. Azərbaycan böyük güzəşt edir, ancaq Ermənistan bunu başa düşmür. Ermənistan ərazisi bu dəqiqə tanınmamış bir ərazi kimidir. Ermənistan həmçinin “çıxarışsız” torpaq hesab olunur. Azərbaycan Ermənistana bütünlüklə köçürülə bilər. Qaldı o kəndlərə, aydın məsələdir ki, ermənilər soyqırım törədiblər. Qazaxın kəndi ilk və son soyqırım törətdikləri kənddir. Onların hansı faciələr törətməsini hər bir kəs yaxşı bilir. Bu bizim tariximizin bir hissəsidir. Sayca Xocalı böyük olduğuna görə biz Xocalını götürürük. Amma Qaradağlıda da, Kəlbəcərdə də belə böyük faciələr olub. Bunlar hamısı azad edilməlidir və sakinlər hamısı öz kəndlərinə qayıtmağı gözləyirlər. Bu kəndlər Azərbaycanın əraziləridir. Bu kəndlər niyə bu vəziyyətə düşüb? Ona görə ki, onun ətrafı zaman-zaman Ermənistana verilib. Hamısının birbaşa gediş-gəliş yolları var idi. Necə ki, Naxçıvanla Azərbaycan arasında gediş-gəliş var idi. 1920 - ci ildə Mehri rayonu, Zəngəzur, Göyçə Ermənistana verildi. Qərbi Zəngəzurla Göyçənin Ermənistana verilməsi kimi. Qazax rayonunun ətrafındakı ərazilər də, yüksəkliklər də Ermənistana verildi. Ermənistan bu əraziləri özü qaytarmasa, Azərbaycan ordusu o torpaqları və ora gedən yolları azad edəcək. Bunun başqa bir yolu yoxdur”.
Məhəmmədəli QƏRİBLİ
