Zatulin Ermənistan və Rusiyada da “persona-non-qrata” elan edildi...
Rusiya Dövlət Dumasının “Vahid Rusiya” fraksiyasının deputatı, MDB işləri üzrə komitə sədrinin birinci müavini Konstantin Zatulin maraqları tələb etdikdə mənsub olduğu komandanı satmağa hazır olduğunu əməlləri ilə təsdiqləyib.
Erməni lobbisinin direktivləri əsasında fəaliyyət göstərən Zatulin bu vaxta kimi Rusiyanın müxtəlif ölkələr, o cümlədən Azərbaycanla münasibətlərinə xələl gətirməyə çalışıb. Fikirləri, yol verdiyi qanunazidd hərəkətlər bu şəxsin konkret olaraq erməni lobbisinin təlimatları əsasında fəaliyyət göstərdiyini nümayiş etdirir.
Növbəti dəfə o, Rusiyaya qarşı xəyanət sayıla biləcək fikirlərin müəllifi kimi artıq rus ictimaiyyətində tənqid hədəfinə çevrilib. Belə ki, bu günlərdə Zatulin “Bizə hansı Ukrayna lazımdır?” forumunda çıxış edib. Rusiyanın Ukraynada keçirdiyi “xüsusi əməliyyat”ın məqsədlərinin heç birinin nəticə vermədiyini, bəzilərinin isə mənasını itirdiyini bildirib. Zatulin qeyd edib ki, Rusiyanın sakitləşməsi və mütləq qalib gələcəyini düşünməsi üçün hələ tezdir: “Bu xüsusi hərbi əməliyyatın məntiqinə gəlincə, siz başa düşürsünüz, bu ondan ibarət idi ki, - əgər mən düzgün başa düşdümsə, bu planları oxumamışam, - o, ondan ibarət idi ki, bizim gücümüzün tətbiqindən sonra çox tez müddətdə Ukrayna dövləti parçalanır və Minsk razılaşmalarını həyata keçirməyə çalışarkən, çox qurban vermədən 8 il ərzində əldə olunmayanlara nail olmaq mümkündür. Təəssüf ki, bu plan iflasa uğradı. Özü də həmin plan, sadəcə, qeyri-real idi. Beləliklə, indi başqa plana keçməliyik. Hərbi əməliyyatın əvvəlində rəsmi olaraq bəyan edilmiş məqsədlərimiz nə idi? Hamınız xatırlayırsınız: denasifikasiya, demilitarizasiya, Ukraynanın neytrallığı və bütün bu müddət ərzində əziyyət çəkən Donetsk və Luqansk sakinlərinin müdafiəsi. Bu bəndlərdən hansı üzrə bugünə kimi nəticələr əldə etmişik? Heç biri. Üstəlik, bəzilərinin heç bir mənası yoxdur. Məsələn, “Ukraynanın neytrallığı”. Bu tələbin mənası nədir? Hazırda heç nə. O mövcud olmağa davam edərsə, artıq neytral olmayacaq”. Zatulin forumda səslənən “Ukraynanın dövlətçiliyi artıq mövcud deyil” tezisi ilə razılaşmayıb. O, Ukraynanın qalacağına əmindir: “Çünki ukraynalıların aldıqları dəstəklə bunun öhdəsindən gəlmək üçün güc kifayət etmir”. Zatulinin sözlərinə görə, Rusiya müharibəni dayandıra bilməz: “Əgər biz indi atəşi dayandırsaq, bu, o öhdəliyin, lap əvvəlində olan planın məğlubiyyəti olacaq. Ukrayna olmasaydı, şad olardım, amma Rusiya Federasiyası Ukraynanın onun tərəfində olmasını istəyirsə, onda siz həmişə deyə bilməzsiniz ki, Ukrayna və ukraynalılar yoxdur”. İndiki halda Zatulinin belə çıxışı Rusiyaya xəyanət hesab edilir.
“Vedomosti” nəşrinin bir neçə mənbəyə istinadən yazdığına görə, Zatulinin çıxışına görə “Vahid Rusiya”da məsləhətləşmələr başlayıb və o, Dumadakı bir sıra vəzifədən məhrum edilə, fraksiyadan çıxarıla bilər. Qeyd edək ki, Zatulin Dumanın “Vahid Rusiya” fraksiyasının üzvü olsa da, partiyanın üzvü deyil. “Vahid Rusiya”dakı mənbələr vəziyyətlə fraksiya rəhbərinin birinci müavini Vyaçeslav Makarovun məşğul olduğunu bildirib. Partiyadakı mənbələrdən birinin bildirdiyinə görə, deputatın cəzalandırılması üçün müzakirə edilən variantlar arasında Zatulinin Dövlət Duması komitəsi sədrinin birinci müavini vəzifəsindən məhrum edilməsi və “Vahid Rusiya” sıralarından çıxarılması da var. Nəşrin həmsöhbətinin sözlərinə görə, “Vahid Rusiya” Zatulinin açıqlamaları ilə bağlı çoxdan boğaza yığılıb. Məsələn, o, Putinin 2021-ci ilin dekabrında təqdim etdiyi vətəndaşlıq haqqında qanun layihəsini tənqid edib.
Hələlik “Vahid Rusiya” məsləhətləşmələrə başlayıb, partiyadakı iki mənbə və Prezident Administrasiyasına yaxın həmsöhbət “Vedomosti”yə bildirib ki, Zatulinin cəzalandırılması mütləqdir. Xatırladaq ki, Zatulin dəfələrlə Ermənistanın işğal siyasətinə bəraət qazandıran hərəkətləri ilə Azərbaycan ictimaiyyətinin haqlı qınaq və narazılığına səbəb olub. O, erməni diasporundan aldığı sifarişi yerinə yetirərək işğal faktını legitimləşdirmək üçün səy göstərib. Digər bir nüans isə ondan ibarətdir ki, bir çox siyasi dairələr tərəfindən təxribatçı kimi tanınan Zatulin həmişə etnik zəmində qarşıdurmaları qızışdırmaq, qondarma, separatçı rejimlərə dəstək verməklə məşğul olub və bu fəaliyyətinə görə bəzi dövlətlər tərəfindən “persona non-qrata” elan olunub. Zatulin ermənipərəst fəaliyyətə o qədər aludə olub ki, bu zaman o, hətta öz ölkəsinin maraqlarına belə qarşı çıxıb. Onu da qeyd edək ki, Zatulin indiki Ermənistan hakimiyyətinə də sadiq olduğunu göstərməyə çalışsa da, Nikol Paşinyan hakimiyyəti onu qəbul etmir. Hətta Zatulinin Ermənistana girişinə qadağa qoyulub. Özü də bu qadağanın müəllifi şəxsən Paşinyan özüdür. Belə ki, qadağa səbəbi barədə danışarkən Paşinyan Zatulinin ötən il dərc olunmuş və deputatın təhlükəsiz dəhlizin təmin edilməsindən danışdığı müsahibəsinə işarə edib: “İnsanlar çıxıb deyirlər ki, Ermənistan dəhliz vəd edib və bu dəhlizi təmin etməlidir. Bu, ermənipərəst mövqedirmi?”. Xatırladaq ki, ötən il “Yerkir Media” telekanalına müsahibə verən Zatulin Nikol Paşinyanı Ermənistan ərazisindən “dəhliz” açmaq üçün sənəd imzalamaqda ittiham edib. Beləliklə, hərəkətləri ilə Zatulin təkcə Azərbaycanda yox, eləcə də Ermənistanda və artıq Rusiyanın özündə də arzuedilməz şəxsə çevrilib. Çünki o, heç kimə sadiq deyil.
Nahid SALAYEV
