Bakı-İrəvan sülh sazişinə mane olan tərəflər - Azərbaycanın dəqiq etirazı...

Azərbaycan xarici işlər naziri Ceyhun Bayramov jurnalistlərə açıqlamasında bildirib ki, Ermənistan-Azərbaycan münasibətlərinin normallaşması üçün müxtəlif tərəflər var və bu müxtəlif tərəflərin fərqli maraqları, davranışları ola bilər:

“Biz onu da görürük ki, hətta bütün tərəflərin yanaşmaları bu sülh prosesinin irəli aparılmasında və iki ölkə arasında ən tez və qısa bir zamanda razılığın əldə olunmasına xidmət etmir. Onlara dərhal adekvat cavablar verilir. Azərbaycan tərəfi öz gündəliyinə sadiqdir və təbii ki, bu və digər tərəflərin addımlarından asılı olmayaraq, Azərbaycanın dövlət maraqlarına cavab verən formada, beynəlxalq hüququn norma və prinsiplərinə cavab verən formada öz siyasətimizi davam etdirəcəyik”.

Ceyhun Bayramovun nəzərdə tutduğu sülhə mane olan tərəflər kimdir?

Siyasi şərhçi Sahil Kərimli “Bakı-Xəbər”ə açıqlamasında bildirdi ki, Ermənistan-Azərbaycan münasibətlərinin normallaşmasına əngəl törədənlər ilk növbədə Fransa, İran, Avropadakı bəzi dairələr və Rusiyanın müəyyən siyasi qüvvələridir: “Aydın məslədir ki, Ermənistana havadarlıq edən bu dairələr prosesdə öz maraqlarını güdürlər. Hər nə qədər Cənubi Qafqazda sülh və təhlükəszilik, bölgədə sabitlik və əminamanlıq bəyanatları səsləndirsələr də, reallıq ortadadır. Məsələn, konkret olaraq Fransa Makronun timsalında Cənubi Qafqaza nüfuz etməyə, regiona təsir imkanları qazanmağa çalışır. Qarabağda yaşayan erməni əsilli vətəndaşlarımızın təhlükəsizliyini və hüquqlarını əlində bayraq edən rəsmi Parisin əsas istəyi əslində başqadır: Azərbaycana müəyyən təsirlər göstərmək və bölgədə gedən proseslərə müdaxilə etmək. İrana gəldikdə isə, molla rejimi də bölgəmizdəki yeni reallıqları həzm edə bilmir. Tehran da itirilmiş nüfuzunu qoruyub saxlamağa, proseslərdə söz sahibi olmağa can atır. Burada əsas məqam İranın iqtisadi maraqlarıdır. Azərbaycanın təşkilatçılığı ilə açılacaq Zəngəzur dəhlizi layihəsində fars rejimi də iqtisadi dividendlər qazanmağa çalışır. Rusiyanın əksər siyasi dairələri də həddən artıq canfəaşanlıq göstərir, yeri gəldi-gəlmədi, Ermənistanın müdafiəsinə qalxır. Sirr deyil ki, Rusiya, Ukrayna ilə müharibədə düşdüyü çətin və acınacaqlı duruma baxmayaraq, Qafqazdakı maraqlarını qorumaq istəyir. Bütün bu ziddiyətli məqamlar Ermənistanla Azərbaycan arasında vəziyyəti daha da gərginləşdirir, sülh prosesinə ciddi zərbələr vurur. Yəni danışıqlar prosesində özünü vasitəçi kimi göstərməyə çalışan ölkələr əslində məsələni qəlizləşdirir. Son günlər suveren Azərbaycan ərazilərində fəaliyyət göstərən qanunsuz erməni silahlı dəstələrinin fəallığı, hərbi təxribatlar törətməsi təsadüfi deyil. Məlum siyasi dairələrin diqtəsi ilə bilərəkdən gərginlik artırılır. Bütün hallarda ortada Azərbaycanın həm siyasi, həm də hərbi qətiyyəti ortadadaır. Azərbaycan Prezidenti cənab İlham Əliyev bütün platformalarda ölkəmizin milli maraqlarını qətiyyətlə qoruyur və mövqeyindən bir addım belə geri çəkilmir. Əminliklə demək olar ki, istənilən müdaxiləyə və təxribatlara baxmayaraq, sonda qalib tərəf yenə Azərbaycan olacaq”.

Məhəmmədəli QƏRİBLİ