Faiq Ələkbərli:“Bizim qanuni varlığımız 1925-ci ildə qeyri-qanuni şəkildə hakimiyyətə gətirilmiş ariyançıları və onların arxasında dayananları çox ciddi şəkildə narahat edir”
Molla rejiminin müstəqil Azərbaycan dövlətinə qarşı təxribatları davam edir. Ölkəmizin ərazi bütövlüyünü daim hədəfə alan mollaıstan dövlətimizin adını təhrif etməyə çalışır. Sanki Azərbaycan Respublikasının varlığı molların yuxusunu çoxdan ərşə çəkib. Çoxdan bəridir ki, molla rejimi uşaqların, gənc nəslin beynini zəhərləməklə məşğul olur.
Azad İran kanalı yazır ki, İran məktəblərində şagirdlərə Azərbaycanın adını “Bakı Respublikası” kimi təhrif etmək aşılanır. Qeyd olunana görə, əslən Təbrizdən olan, lakin İran hökuməti tərəfindən manqurtlaşmış paniranist və Azərbaycana qarşı qatı düşmən mövqeli ekspert Salar Seyfəddini “Tvitter”də yazıb: "Bu gördüyünüz İranın orta məktəblərindən birində coğrafiya fənninin sınaq vərəqələridir. Şagirdlərdən Xəzər dənizi ölkələrinin adlarını qeyd etmələri istənilib. Bir nəfərdən başqa bütün şagirdlər Türkmənçay müqaviləsi ilə İrandan ayrılmış Araz çayının şimalındakı ərazini “Bakı Respublikası” adlandırıb”.
Təsəvvür edin ki, bu nə deməkdir. Halbuki, Azərbaycan Demokratik Respublikası mövcud olanda heç dünya xəritəsində “İran” adlı dövlət olmayıb. Bu ad 1936-cı ildən sonra meydana çıxarılıb, lakin heç bir kökü, əsası olmayan sözdür.
- “Mollalar müstəqil Azərbaycan Respublikasını “Bakı Respublikası” adlandırıb dövlətimizin adını təhrif etməkdənsə, Pəhləvilər sülaləsinin qəsb etdiyi Qacarlar dövlətinə nə üçün 1936-cı ildə “İran” adı verildiyinə aydınlıq gətirsinlər”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini Faiq Ələkbərli “Bakı-Xəbər”ə şərhində bildirdi ki, İran adlanan ölkənin mətbuatının Azərbaycanın varlığına qarşı ittihamlarını, təhriflərini davam etdirməsi təbii qarşılanmalıdır. O hesab edir ki, onların ariyançılıq, faşizm düşüncəsində müstəqil, azad, ədalətli, türk hüquqlu bir Azərbaycan qəbuledilməzdir: “Tehran rejimi çox yaxşı bilir ki, yüz il bundan əvvəl hakimiyyətdə türklər olub, 1925-ci ildə hiylə və məkrlə Qacarlar türk sülaləsi devrilib, hakimiyyəti fars Pəhləvilər qəsb edib, onlardan 54 il sonra isə molla rejimi hakimiyyəti ələ keçirib. Bu gün onların böyük yanlışlıq edərək “Bakı dövləti”, “Aran” adlandırdığı Şimali Azərbaycan dövləti Cənubi Azərbaycanla birlikdə indi farsların “İran” adlandırdığı dövlətin qurucusudur, yaradıcısıdır. O dövləti biz azərbaycanlılar, biz türklər qurmuşuq. Sadəcə, 98 il bundan əvvəl Böyük Britaniyanın, Sovet Rusiyasının və digər qüvvələrin məhz birbaşa müdaxiləsi nəticəsində Azərbaycan türklərinin yaratdığı bir dövlət qanunsuz şəkildə bir qrup ariyançıya “bəxş” edilib. İndi onlar bizləri “Bakı Respublikası”, yaxud “Aran” adlandırmaqla, guya “İrandan ayrılmış bir hissə” olaraq təqdim etməklə öz qanunsuz əməllərini gizlətmək, ona hansısa bir don geydirmək istəyirlər. Ancaq bir həqiqətdir ki, bizim bu gün mövcud olan Azərbaycan Respublikası məhz hüquqi anlamda Səfəvilərin, Bayandurluların, Baharlıların, Əfşarların, hətta Qacarların davamıdır, özünü “İran İslam Respublikası” adlandıran ölkə yox. Bizim qanuni varlığımız 1925-ci ildə qeyri-qanuni şəkildə hakimiyyətə gətirilmiş ariyançıları və onların arxasında dayananları çox ciddi şəkildə narahat edir. Əslində hüquqi və mənəvilik baxımından da gerçək olaraq Azərbaycan Respublikası daha hüquqi xarakter daşıyır, nəinki İran adlanan ölkə. Ona görə də, molla rejimi orta məktəblərdə Azərbaycan Respublikasını “Bakı dövləti” olaraq qələmə verməklə öz daxilindəki qısqanclığı, xəbisliyi büruzə verir. Mollalar müstəqil Azərbaycan Respublikasını “Bakı Respublikası” adlandırıb dövlətimizin adını təhrif etməkdənsə, Pəhləvilər sülaləsinin qəsb etdiyi Qacarlar dövlətinə 1936-cı ildə nə üçün “İran” adı verildiyinə aydınlıq gətirsinlər. Çünki 1925-ci ilə qədər “İran” adlanan ölkə Qacarlara məxsus məmləkətlər (Məmalik-i Məhrusə-yi Qacar) adlanırdı. Amma qanuni şəkildə dövlətin adı Qacariyyə (Qacarlar) idi. Bu dövlətin də qurucusu Azərbaycan - türklər idi...”
Qacarların dörd əsas məmləkətinin birincisi və ən vacibi Azərbaycan idi deyən alim qeyd etdi ki, mollalar bundan danışsınlar. Necə oldu ki, Azərbaycan türklərinin yaratdığı dövləti 1925-ci ildə Böyük Britaniyanın köməyi ilə mənimsədilər? “Bu suala cavab versinlər. O zaman hakimiyyəti devirəndən sonra Rza adlı birisi Pəhləvi soyadı götürüb özünü şah elan etdi, onda Qacarlara yaxın olanlar ona dedilər ki, sənin hakimiyyətin qanunsuzdur. Yəni onun hakimiyyəti legitim olmayıb.
Biz bu gün onların “Bakı Respublikası”, “Aran” adlandırdığı yerlərdə varlğımızı hüquqi şəkildə sürdürməklə bu hüququmuzu Təbrizdə və Tehranda da bərpa edəcəyik. Molla rejimi özünün və Pəhləvilərin xarici qüvvələrin əli ilə necə hakimiyyətə gəldiklərini yaxşı bilirlər. Yeri gəlmişlən, Azərbaycan Milli Hökumətinin 1945-1946-cı illərdə qurucusu və baş naziri olan Seyid Cəfər Pişəvəri də Pəhləvilərin qanunsuz şəkildə Qacarların yerinə hakimiyyətə gətirildiyi barədə danışmışdı. Bu gün mollalar nələrsə uydurur, şagirdlərə Azərbaycan Respublikasının adını təhrif edərək təqdim edirlər. Amma bir şeyi bilməlidir ki, bizim yüzminlərlə balalarımız, güney azərbaycanlı uşaqlar, şagirdlər, türklər Azərbaycanın bütövləşməli olduğunu yaxşı bilir. Onlar milli kimliklərini yaxşı bilirlər. Azərbaycan türklərinin övladlarının düşüncəsinə molla rejimi heç cür təsir edə bilməz, çünki onlar öz tarixlərini bilirlər, babalarının qurduğu dövlətin ariyançılart tərəfindən qəsb edildiyi barədə məlumatları var”-deyə F.Ələkbərli qeyd etdi.
İradə SARIYEVA
.jpg)