Xarici İşlər Nazirliyinin mətbuat katibi Ayxan Hacızadə Fransa Prezidenti Emmanuel Makron tərəfindən Azərbaycan və Ermənistan liderləri arasında Kişinyov görüşünün nəticələrinə dair yayılmış bəyanata cavab olaraq deyib ki, Fransa tərəfindən belə davranışın sərgilənməsi ilk hal deyil və bu, Azərbaycanla Ermənistan arasında sülh prosesinə, bölgədə sülh və sabitliyə heç də müsbət töhfə vermir.
O qeyd edib ki, Kişinyovda Avropa Siyasi İcması sammiti çərçivəsində Azərbaycan Prezidenti və Ermənistanın Baş naziri arasında Aİ Şurasının Prezidenti Şarl Mişelin, Fransa Prezidentinin və Almaniya Kanslerinin iştirakı ilə görüşün yekunları üzrə mətbuata açıqlama, ənənəyə uyğun olaraq, Brüssel formatının təşkilatçısı kimi Şarl Mişel tərəfindən verilib: “Daha sonra Fransa Prezidenti tərəfindən birtərəfli qaydada görüş barədə verilmiş açıqlama tərəflərin mövqeyini əks etdirmir və təhrif edir”. Rusiyanın “İnterfaks” Agentliyinin yaydığı məlumata görə, Yelisey sarayının rəsmi saytı Kişinyov görüşü barədə Makronun qeyri-dəqiq və təmayüllü bəyanatını yayıb. Makron bəyanatında bildirib ki, Kişinyovda tərəflərə hərbi əsirlərin tezliklə azad edilməsi barədə çağırış edildi, habelə Qarabağda yaşayan ermənilərin hüquq və təminatlarının müəyyən edilməsinin vacibliyi qeyd olundu. Görüş barədə mətbuata açıqlamanı razılaşnaya görə Şarl Mişel edib. Ancaq Mişel Makronun dediklərinə bənzər heç nə demədi. Makronun isə dedikləri tamamilə təxribatdı.
Məgər Azərbaycanda hərbi əsir var ki, Azərbaycana onların azad edilməsi barədə çağırış edilsin? Məgər Qarabağ ermənilərinin hüquq və təminatları barədə müəyyən edilməmiş nəsə qalıb ki? Bu məsələ Azərbaycanın daxili işi deyil ki? Həm də Qarabağ ermənilərinin hüquqları ilə bağlı məsələnin beynəlxalq formatlarda müdafiə cəhdlərinin Azərbaycan üçün “qırmızı xətt” olduğunu Makron bilmir?
“O, nəyin bahasına olursa-olsun, Fransanın Qarabağla bağlı danışıqlar masasında yerini bərpa etmək istəyir”
Sözügedən məsələni “Bakı-Xəbər”ə şərh edən politoloq Elşən Manafov hesab edir ki, Makron məqsədyönlü şəkildə belə təxribat xarakterli açıqlamalarla çıxış edir: “Makron Qərbin bölgədəki maraqlarının təmsilçilərindən olaraq, nəyin bahasına olursa-olsun, Fransanın Qarabağla bağlı danışıqlar masasında yerini bərpa etmək istəyir. Bütün bu təxribat xarakterli açıqlamalar, reallıqla uzlaşmayan mövqe buna hesablanıb. Halbuki, ATƏT-in Minsk Qrupunun fəaliyyətinə qeyri-rəsmi də olsa xitam verildikden sonra, Fransanın sözügedən məsələnin həllində danışıqlara təsir imkanları xeyli məhdudlaşıb. Bu isə Azərbaycan prezidenti İlham Əliyevin incə və uzaqgörən siyasət sərgiləməsi hesabına baş verib. Məhz ölkə başçısının uğurlu siyasəti sayəsində Paris “izqoy” durumuna düşüb. Ona görə ki, Makron bütün körpüləri yandıraraq tərəfsiz mövqe tutmaqdan kənara çıxıb. Fransanın münaqişə tərəflərinə münasibətdə qeyri-adekvat mövqeyi, bəyənatlarındakı erməni təəssübkeşliyi, Fransa Senatının qondarma “DQR” in “müstəqilliyini” tanıması Makronun danışıqlardan uzaqlaşdırılmasının əsas səbəblərindəndir. Hərbi əsirlərin dəyişdirilməsi ilə bağlı təklifləri müzakirəyə cıxarmaqla isə Fransa sadəcə danışıqlardakı itirilmiş mövqelərini bərpa etmək və Rusiyanı danışıqlardan uzaqlaşdırmaq istəyir. Bu isə real görünmür. Ona görə ki, Fransa Azərbaycanda nüfuzunu itirib. Parisin tərəfsiz olacağına inam qalmayıb. Regionda Türkiyə amilinin rolu artır və bu dövlət Azərbaycanla müttəfiqdir. Belə olan halda Fransanın nəyisə dəyişə bilməsi real görünmür. Fransa regionda nüfuzunu qorumaq istəyirsə, o zaman birmənalı olaraq ermənipərəst mövqedən çıxış etməsinə son qoymalıdır. Ən azından tərəfsiz və ədalətli mövqe sərgiləməlidir. Ancaq hələ ki, Makron hakimiyyətinin timsalında bunun elementləri özünü göstərmir”.
Vidadi ORDAHALLI
