Azərbaycan vətəndaşı olan tələbənin İranda əsassız olaraq “casusluq”da ittiham edilərək həbsə atılması, eləcə də digər olaylar, xüsusən də bu ilin əvvəlində İrandakı səfirliyimizə terror hücumunun edilməsi dövlətimizi tədbirlər görməyə vadar edir.
Məlum olduğu kimi, Azərbaycan Xarici İşlər Nazirliyi ölkə vətəndaşalrına İranla bağlı çağırış edib. “Cari ilin yanvar ayında Azərbaycanın İrandakı səfirliyinə qarşı törədilmiş terror aktı və bunun nəticəsində İrandakı məhdud diplomatik təmsilçiliyimiz nəzərə alınmaqla, Azərbaycan vətəndaşlarına zəruri olmadığı təqdirdə İrana səfər etməməyi, səfər edənlərin isə yüksək ehtiyatlılıq nümayiş etdirmələri kəskin şəkildə tövsiyə olunur”-deyə XİN-in çağırışında qeyd olunub.
Qeyd olunub ki, hazırda İranda olan Azərbaycan vətəndaşlarından mühafizə və təhlükəsizlik qaydalarına riayət etmələri tələb olunur.
Azərbaycan vətəndaşlarını İranda əsasən hansı təhlükə gözləyə bilər? Söhbət hansı təhlükədən gedir ki, bizim XİN bu dərəcədə xəbərdarlıq edib?
“Orada Azərbaycan vətəndaşlarının hər cür şərlənib böhtana məruz qala biləcəyi istisna deyil”
BAO sədrinin müavini, əslən Güneydən olan Babək Türkoğlu “Bakı-Xəbər”ə şərhində bildirdi ki, Azərbaycan XİN-in çağırışı səbəbsiz deyil və İran adlanan ölkədə vətəndaşlarımızı böyük təhlükələr gözləyə bilər. “Yadıma bir-iki il əvvəl Təbrizin Tərbiyət Xiyabanında yerləşən otellərindən birində baş verən qətl hadisəsi düşdü. Həmin vaxt o otellərindən birində rejim tərəfindən bir Azərbaycan vətəndaşı qətlə yetirilmişdi, amma onunla bağlı saxta intihar sənədləşməsi həyata keçirdilər. Molla rejimi çox təhlükəlidir, onun yürütdüyü siyasətə qarşı çıxanlara qarşı çox amansız davranır. Cənublu soydaşlarımız öz haqlarını tələb edərkən onlara kəsilən cəzalar sizə də məlumdur. Təsəvvür edin ki, bu gün molla rejimi az qala özünü “Allahın yerinə qoyur”. Bu rejim islam dinini öz məkrli siyasətlərinə alət edib. Bir insan haqq sözünü deyəndə onu “Allaha qarşı müharibə açır” iddiası ilə ağır şəkildə cəzalandırırlar.
Bu gün Azərbaycan Respublikasının Tehrandakı səfirliyi bağldır, səfirliyə edilən terror hücumundan sonra səfirlik bağlandı. Heç olmasa ayda bir dəfə fars-molla rejiminin muzdluları Azərbaycan konsulluğunun qarşısında “aksiya” keçirirlər, çalışırlar ki, Təbrizdəki Azərbaycan konsulluğunun fəaliyyətini məhdudlaşdırsınlar. Səfirliyimiz bağlı olduğu üçün orada vətəndaşlarımız problemlər yaşaya bilər. O üzdən Azərbaycan dövləti öz vətəndaşlarını uyarır və ora getməməyə açğırır. Molla rejimi əslində mahiyyətcə terrorçu bir rejim olduğuna görə, Azərbaycan dövlətinə qarşı məkrli niyyətlərini günahsız vətəndaşların üzərindən həyata keçirə bilər. Ehtimal var ki, Tehran rejimi öz çirkin niyyətlərini vətəndaşlarımıza qarşı yönəltsin. Azərbaycan vətəndaşları üçün İran adlanan ölkə böyük təhlükə mənbəyidir. Təxminən iki ay əvvəl iki nəfər naxçıvanlını da saxlamışdılar, deyirdilər ki, onlar özləri ilə Azərbaycan Bayrağı gəzdirir. Əlbəttə ki, Azərbaycan Bayrağını gəzdirəcəklər, Azərbaycan vətəndaşı olaraq bayrağımızı gəzdirmək onun haqqıdır. Bu müqəddəs bayraq Azərbaycan vətəndaşınındır. Orada ən kiçik bir bəhanə ilə Azərbaycan vətəndaşlarının başına böyük bəlalar açıla bilər. Çünki bu rejim başdan-ayağa şərə bürünüb və mahiyyətcə terrorçu rejimdir. Orada Azərbaycan vətəndaşlarının hər cür şərlənib böhtana məruz qala biləcəyi istisna deyil. Bu baxımdan Azərbaycan XİN-in çağırışları tamamilə əsaslıdır. Molla rejimi Azərbaycan dövlətinə qarşı məkrli siyasət yürütdüyündən, Azərbaycan vətəndaşlarına qarşı hər cür çirkin oyunlar oynana bilər, bu istisna deyil”.
B.Türkoğlu qeyd etdi ki, hazırda Azərbaycan vətəndaşı olan tələbə Fərid Səfərlinin başına gətirilənlər bir örnəkdir və molla rejiminin simasını ifşa edir. O vurğuladı ki, bu rejim tələbənin ailəsinin ondan xəbər tutmasına şərait yaratmır, başına hansı bəlalar gətirilib, bilinmir və bu da onun ailəsində və ictimaiyyətdə nigarançılıq yaradır. “Ona görə də belə bir zamanda Azərbaycan vətəndaşlarının İrana səfər etməsi çox təhlükəlidir.
Mən özüm də Azərbaycan vətəndaşlarından, soydaşlarımdan insanlığın tapdalandığı İran adlanan millətlərin zindanina getməməyi və getdiyi halda hər hansı ağıla gəlməz təhlükələrə qarşı diqqətli olmalarını xahiş edirəm. Hər addımda diqqətli olmaq tələb olunur. Çünki molla rejimi yürütdüyü çirkin siyasətlə etimadı qırıb və öz mahiyyətini büruzə verib”-deyə bldirən Türkoğlu hesab edir ki, molla rejiminin qondarma casus ittihamları bu sistemin, rejimin özünü ifşa edir.
Leyla QARAXANLI
