Qarabağda erməni terrorçuları tərəfindən həm dinc əhalinin, həm də hərbi əsirlərin kütləvi şəkildə qətlə yetirilməsi danılmaz faktdır. İşğaldan azad edilən torpaqlarımızda aparılan quruculuq işləri zamanı aşkarlanan kütləvi məzarlıqların sayının artması onu deməyə əsas verir ki, ermənilər azərbaycanlılara qarşı yüzlərlə soyqırımı həyata keçiriblər.
Aşkarlanan məzarlıqların Birinci Qarabağ müharibəsi zamanı itkin düşmüş, öldürülmüş hərbçilərə, mülki şəxslərə aid olduğu qeyd edilir. 44 günlük Vətən müharibəsindəki qələbədən sonra Prezident
İlham Əliyevin tapşırığına əsasən, işğaldan azad edilmiş ərazilərdə Birinci Qarabağ müharibəsi zamanı itkin düşmüş vətəndaşların ehtimal edilən məzar yerlərinin müəyyən edilməsi istiqamətində axtarış tədbirləri həyata keçirilir. Minaların basdırılmasına görə hər yerdə qazıntı işləri aparmaq hələlik mümkün deyil. Lakin minalardan təmizlənmiş ərazilərdə qazıntılar nəticəsində belə məzarlıqlar aşkarlanır.
Kütləvi məzarlıqlar bir daha Azərbaycanın necə azğın düşmənlə üz-üzə qaldığını, Ermənistan hərbçiləri tərəfindən beynəlxalq humanitar hüquq normalarının necə kobud şəkildə pozulduğunu aydın göstərir. İnsanlıq əleyhinə törədilmiş bu cinayətlər erməni xislətini bir daha ortaya qoyur.
Məlumat üçün qeyd edək ki, növbəti kütləvi məzarlıq Şuşada aşkar olunub. Kütləvi məzarlıq Şuşa türməsinin ərazisində aşkar olunub. İlkin məlumata görə, qalıqların ən azı 4 nəfərə aid olduğu ehtimal edilir. Kütləvi məzarlığın Şuşa həbsxanası ərazisində aşkarlanması onu göstərir ki, qanunsuz olaraq həmin yerdə saxlanmış azərbaycanlılar dəhşətli işgəncələrə, qeyri-insani rəftara məruz qalıb.
“Kütləvi məzarlar sayəsində aydın olur ki, həmin şəxslər eyni anda öldürülüb”
Siyasi şərhçi Azər Həsrət “Bakı-Xəbər”ə açıqlamasında qeyd etdi ki, işğaldan azad edilən ərazilərdə yenidənqurma işləri aparıldıqca kütləvi məzarların aşkar olunacağı gözlənilirdi: “Ötən 30 il ərzində Ermənistan tərəfi azərbaycanlıları girov götürüb, həbs edib, bir sözlə, onlara olmazın işgəncəni verib. Əsir götürülən 4000 şəxs haqqında məlumat yoxdur. Onlar itkin düşmüş şəxslər sayılır. Əminik ki, həmin şəxslər ermənilər tərəfindən vəhşicəsinə qətlə yetirilib. Öldürüldükdən sonra da izlərin itməsi üçün müəyyən tədbirlər görüblər. Həmin tədbirlər çərçivəsində meyitləri toplu şəkildə basdırıblar”.
Həmsöhbətimiz hesab edir ki, Qarabağ ərazisində aşkar olunan kütləvi məzarlıqlarla bağlı dünya ictimaiyyəti tərəfindən sərt reaksiya verilməlidir. Ancaq biz bunun əksini müşahidə edirik.
A.Həsrət onu da əlavə etdi ki, kütləvi məzarlıqların aşkar olunması bir sıra faktların üstünü açır: “Bu məzarlar sayəsində aydın olur ki, həmin şəxslər süni şəkildə eyni anda öldürülüb. Onların hansı şəkildə öldürülməsi aidiyyəti qurumlar tərəfindən araşdırılacaq. Ancaq bizim ehtimalınız ondan ibarətdir ki, o adamlara kütləvi şəkildə işgəncə verilib, kütləvi şəkildə edam edilib və kütləvi şəkildə də eyni məzara basdırılıblar. Bunu ancaq cinayətkar edə bilər. Azərbaycan tərəfi müvafiq beynəlxalq qurumlar arasında bu kimi faktları ictimailəşdirməlidir. Ermənistan etdiyi əməllərə görə həm cavab verməlidir, həm də cəzalandırılmalıdır”.
Siyasi şərhçinin sözlərinə görə, ermənilərin bir yox, bir neçə dəfə azərbaycanlılara qarşı soyqırım etdiyini görürük. Qubada, Şamaxıda və Bakıda da soyqırımlar törədilib. Ermənilər üçün spesifik xüsusiyyətlərdən biri odur ki, beynəlxalq hüquq və humanitar qaydalara qəti şəkildə əməl etmirlər. Bunun da ən bariz nümunəsi ermənilərin soyqırım aktlarından sonra geridə iz kimi qoyduğu toplu məzarlıqlar və insanlar üzərində işgəncə metodlarıdır. Adətən aşkar olunan kütləvi məzarlar erməni vandalizmini sübut edir.
Günel CƏLİLOVA
