Türkiyə prezidenti Rəcəb Tayyib Ərdoğanın andiçmə mərasimində Azərbaycan prezidenti İlham Əliyevin arxasında Ermənistanın baş naziri Nikol Paşinyanın əyləşməsi diqqət çəkib.
Mərasimdə ön sıranın mərkəzində Azərbaycan və Türkiyənin birinci xanımları, solda Azərbaycan lideri İlham Əliyev, sağda isə Türkiyə prezidenti Rəcəb Tayyib Ərdoğan əyləşib.
Qeyd edək ki, Ərdoğanın andiçmə mərasimində iştirak etmək üçün bir çox dünya liderləri və siyasətçiləri Ankarada olub. Beştəpədə keçirilən mərasimə 21 dövlət başçısı və 13 baş nazir qatılıb.
Paşinyanın İlham Əliyevin arxasında əyləşdirilməsində hansısa bir mesaj əlamətləri varmı, yoxsa adi protokol qaydasına əməl olunub?
Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov “Bakı-Xəbər”ə açıqlamasında bildirdi ki, əgər Ərdoğanın dəvəti əsasında Paşinyan ora gedibsə, qonaqların hər birinə hörmətlə yanaşmağa çalışıblar: “Amma içlərində fərqlənən də olmalıdır. Azərbaycan prezidenti ilə Ermənistan baş naziri arasında mütləq fərq olmalıdır və oldu da. Pakistan baş naziri də Paşinyanla eyni cərgədə oturmuşdu, amma sonra yerini dəyişdi. Mən düşünürəm ki, bu bir mesaj da ola bilər, adi bir protokol qaydası da ola bilər. Çünki orda 78 dövlət və hökümət başçısının nümayəndələri iştirak edirdi. Amma hər halda, Afrika dövlətlərinin başçılarını ön sıralarda otuzdurub, Ermənistan dövlətinin baş nazirini İlham Əliyevin arxasında otuzdurursa, bu da bir mesajdır. Bu o deməkdir ki, sənə baş nazir kimi hörmət edirik, amma İlham Əliyevdən sonra. Düşünürəm ki, orda verilən mesaj dünyəvi mesaj idi. Ermənistana və Paşinyanın özünə də verilən bu mesaj anlaşılan idi. Sonra yemək zamanı Paşinyanın da adını çəkərək ona da təşəkkür etməsi ikibaşlı bir gediş idi. Sonda demək istəyirəm ki, artıq növbəti sülh danışıqları prosesində bu danışıqlar, görüşlər Ankarada ola bilər. Paşinyan da ayağını yavaş - yavaş ora açdığına görə, ehtimal var ki, bu görüşlər Ankarada da keçirilə bilər”.
Ermənistan baş naziri Nikol Paşinyanın Azərbaycan lideri İlham Əliyevin arxasında - Prezidentin mühafizə xidmətinin rəisi, general Bəylər Əyyubovla ikinci sırada yan-yana oturrması da diqqət çəkib. Daha dəqiqi, Paşinyanla general Bəylər Əyyibovun arasında bir nəfər əyləşib.
Digər maraqlı məqam: zala daxil olan Ərdoğan dövlət və hökumət başçıları ilə bir-bir görüşüb, ancaq İlham Əliyevlə qucaqlaşması böyük alqışa səbəb olub. Həmin an arxada oturan Paşinyan da Ərdoğanla Əliyevin bu səmimi görüşünə əl çalıb və prosesi diqqətlə müşahidə edib.
Məhəmmədəli QƏRİBLİ
