XVIII əsrin sonundan XX əsrin 20-ci illərinə qədər indi İran adlanan ölkədə və Cənubi Azərbaycanda hakimiyyətdə olmuş azərbaycanlı-türk mənşəli Qacarlar sülaləsi tarixdə özünəməxsus iz qoyub. Molla rejimi Qacarları farslaşdırmaq, bu sülaləni ariyançılara bağlamaq üçün əlindən gələni edir.
Qacarları guya bir İran sülaləsi olduğunu, farsçılığa xidmət etdiyini iddia etmək istəyirlər. Son zamanlar molla rejimi əlində olan sosial şəbəkə hesablarında, xüsusən də teleqram kanallarında, youtube-da Qacarlar sülaləsinin təbliğinə başlayıb. Tehran rejimi Qacarları elə reklam edir ki, guya bu sülalənin onlara bir aidiyyəti var. Böyük Azərbaycan hökmdarı Ağa Məhəmməd Şah Qacar tərəfindən əsası qoyulan Qacarlar sülaləsi uzun illər hakimiyyətdə olub, 200 ilə qədər bir dövr ərzində hökmranlıq edib.
Molla rejiminin Qacarlar sülaləsini süni şəkildə təbliğ etməsində məqsəd nə ola bilər?
“Bütün hallarda, ideoloji təxribatların qarşısını almaq üçün tədbirli olmaq lazımdır”
AVCİYA-nın vitse-prezidenti, tarixçi, professor Məhərrəm Zülfüqarlı “Bakı-Xəbər”ə açıqlamasında bildirdi ki, Azərbaycan tarixinin ən şərəfli səhifələrindən biri Azərbaycan sülalələrinin böyük dövlətləri idarə etməsidir ki, bu dövlətlər də Hulakilərdən sonra Qaraqoyunlu, Ağqoyunlu dövlətlərindən sonra Səfəvilər dövlətidir: “Səfəvilərdən sonra Nadir şah Əfşarın rəhbərliyi ilə Əfşarlar sülaləsi hakimiyyətə gəlib. Nadir şahın ölümündən sonra parçalanma olub və Azərbaycan ərazisində 20 xanlıq yaranıb, onun 12-si Şimali Azərbaycanda, 8-i isə Cənubi Azərbaycanda olub. Mərkəzi hakimiyyətin bərpası uğrunda üç qüvvə arasında mübarizə gedib. Bu mübarizə Kərim xan Zənd, Qacarlar və Nadir şah Əfşarın əmisi oğlu, Urmiya xanı İbrahim xanın qüvvələri arasında baş verib. “Nəhayətdə Qacarlar qalib gəlib. Qacarlar Mərkəzi hakimiyyəti, yəni indiki İran və Cənubi Azərbaycan ərazində Səfəvilərin qurduğu dövləti bərpa etdilər. Lakin rus-Qacar müharibəsində ruslar qalib gəldiyi üçün Şimali Azərbaycan çar Rusiyası tərəfindən işğal olundu və bu səbəbdən dövlətin bir hissəsi Rusiyanın əsarəti altına düşdü. Qacarlar 1925-ci ilə qədər bu gün İran adlanan ölkədə hakimiyyətdə olublar. Qacarların sonuncu şahı Əhməd şah Pəhləvilər tərəfindən devirildikdən sonra fars sülaləsi hakimiyyətə gəldi. Bu gün nəyə görə Qacarlar sülaləsi molla rejimi tərəfindən təbliğ olunur? Bilirsiz ki, siyasətdə tez-tez dəyişikliklər olur. Əlbəttə ki, molla rejimi Qacarları Azərbaycan-türk sülaləsi kimi təbliğ etmir. Ola bilsin ki, Qacarların devrilməsində İngiltərənin “böyük” rolu olub. Yəni ingilislərin köməyilə Pəhləvilər hakimiyyətə gəlib. Çox ehtimal ki, Qərbə qarşı mübarizə aparan molla rejimi bu təbliğatla Azərbaycan türklərini öz tərəfinə çəkmək istəyir, yəni sizin fəxr etdiyiniz Qacarlar sülaləsini o zaman hakimiyyətdən ingilislər devirib. Bunu da o səbəbdən edir ki, Azərbaycan türkləri Qərbə inteqrasiya etməsinlər. Hesab edirəm ki, ancaq soydaşlarımızın Qərbə inteqrasiyasının qarşısını almaq məqsədilə bunu edirlər.
Bilirsiz ki, Pəhləvilər dövründə də eyni siyasət gedirdi, Azərbaycan məktəbləri yox idi, indi də yoxdur. Sadəcə, azərbaycanlıların süni şəkildə farslaşdırma siyasəti o zaman da vardı, indi də var. O zaman Pəhləvilər azərbaycanlıları farslaşdırmaq istəyirdi, indi isə bunu Tehran rejimi edir. İndiki sosial durumla bağlı əhalinin yaranan çətinliklərini bir az səngitmək üçün Cənubi Azərbaycan əhalisini, bu gün İran adlanan ölkədə yaşayan türkləri Qərbə, xüsusən də İngiltərəyə qarşı qoymaq üçün Qacarların təbliğatını apara bilərlər. Necə oldu türk sülaləsi hakimiyyətdən getdi, burada ingilislərin “rolu” nədən ibarət olub?”.
M.Zülfüqarlı hesab edir ki, rejimin bu təbliğatının heç bir təsiri yoxdur, çünki XXI əsrdir, Cənubi Azərbaycan ziyalıları da nəyin nə olduğunu yaxşı bilirlər. M.Zülfüqarlının sözlərinə görə, bütün hallarda, bu məsələləri diqqətdə saxlamaqn vacibdir ki, ideoloji təxribatlar baş verməsin: “Bütün hallarda, ideoloji təxribatların qarşısını almaq üçün tədbirli olmaq lazımdır ki, Cənubi Azərbaycan əhalisi gələcəkdə hansısa təbliğatlara uymasın və öz halal haqlarını mübarizə ilə tələb etsinlər... Bu onların haqqıdır”.
Molla rejiminin əhaliyə milli deyil, dini baxımdan yanaşdığını deyən M.Zülfüqarlının sözlərinə görə, bu hökumət elə hesab edir ki, bütün müsəlmanlar bir millətdir, onlar fars dilində oxumalıdır, xristianlar, yəhudilər isə başqa dinlərə aid olduğu üçün öz dillərində oxuya bilərlər. Bununla da islam pərdəsi altında farslaşdırma siyasətinin həyata keçirildiyini qeyd edən M.Zülfüqarlı hesab edir ki, bu indiyə qədər alınmayıbsa, indən sonra da alınan deyil. M.Zülfüqarlının sözlərinə görə, demokratiya qələbə çalarsa soydaşlarımız öz halal haqlarına qovuşa bilər.
“Azərbaycan Xalq Cümhuriyyətinin və hazırda onun varisi olan Azərbaycan Respublikasının İngiltərə ilə münasibətləri yaxşı olub, indi də yaxşıdır. Hətta 44 günlük Vətən müharibəsi gedişində BMT Təhlükəsizlik Şirasının Azərbaycan əleyhinə qətnamə qəbuluna İngiltərənin veto qoyması mane oldu. İran rejimi buna da kölkə salmaq üçün bu cür təbliğata üstünlük verə bilər” - deyə professor Zülfüqarlı qeyd etdi.
İradə SARIYEVA
