Ukrayna telekanalları önəmli bir məqama diqqəti yönəldiblər. Qeyd olunur ki, 24 fevral 2022-ci ildə müharibə başlayandan sonra Prezident İlham Əliyev xaric MDB dövlət başçılarınından heç biri Rusiyanın qorxusundan Ukrayna prezidenti Vladimir Zelenski ilə görüşməyə cəsarət etməyib. Müxtəlif vaxtlarda onunla təmas qurmaqdan yayınıblar. Hesab ediblər ki, bu, Rusiya hakimiyyətinin xoşuna gəlməyəcək.
Həqiqətən də Azərbaycan həm Ukraynaya humanitar yardım göstərir, həm də iki ölkənin dövlət başçıları Kişinyovda yüksək səviyyədə bir araya gəlib. Ukrayna prezidenti Zelenski dəfələrlə bununla bağlı Prezident İlham Əliyevə təşəkkür edib. Ermənistan baş naziri Nikol Paşinyan Ukrayna müharibəsində Rusiyanın müttəfiqi deyilik desə də, bu ölkə nə humanitar yardım edir, nə də Paşinyan Zelenski ilə bir araya gəlir. Üstəlik, Ermənistan Ukraynaya qarşı istifadə edələn İranın zərbə dronlarının Rusiyaya daşınmasında iştirak edir.
“Bəzi dövlət başçılarından fərqli olaraq, Ukrayna məsələsində aydın siyasi mövqe ortaya qoyur”
Məsələ ilə bağlı “Bakı-Xəbər”ə açıqlama verən siyasi ekspert Elşad Həsənovun fikrincə, həqiqətən də MDB ölkələrinin əksəriyyəti Zelenski ilə görüşməyə cəsarət etmir: “Ancaq həmin dövlətlərdən fərqli olaraq, Prezident İlham Əliyev Ukrayna məsələsində müstəqil siyasət yeridir. Dəfələrlə Azərbaycan Ukraynaya humanitar yardım göstərib. Azərbaycan birmənalı olaraq Ukraynanın ərazi bütövlüyünü dəstəkləyir. İyunun 1-də Kişinyovda keçirilən tədbir çərçivəsində Prezident İlham Əliyev Ukrayna prezidenti ilə yüksək səviyyəli görüş keçirdi. Zelenski humanitar yardımlara görə Azərbaycana öz minnətdarlığını bildirdi. Azərbaycanda Ukraynadan olan uşaqlara göstərilən qayğıya görə xüsusi təşəkkür etdi. Prezident İlham Əliyev bir daha Ukraynanın ərazi bütövlüyünü dəstəklədiyini bəyan etdi. Bu da beynəlxalq hüquqa uyğun bir addımdır. Prezident İlham Əliyevin yeritdiyi siyasət və 44 günlük müharibədə göstərdiyi cəsarət, siyasi ustalıq dünyanın bir sıra mərkəzlərində xüsusilə təhlil olunur. Azərbaycan bir sıra faktorlara görə Ermənistana qalib gəldi. Birincisi, beynəlxalq hüquq Azərbaycanın xeyrinə idi. İkincisi, ötən illər ərzində güclü və peşəkar ordu yaradıldı. Üçüncüsü, Azərbaycana Prezident İlham Əliyev kimi böyük siyasətçi rəhbərlik edirdi. Bütün bunların sayəsində ərazilərimizi işğaldan azad etdik. Bu səbəbdən Prezident İlham Əliyev tam müstəqil siyasət yeridir və kimdənsə çəkinmir. Bəzi dövlət başçılarından fərqli olaraq, Prezident İlham Əliyev Ukrayna məsələsində aydın siyasi mövqe ortaya qoyur. Bu ölkənin ərazi bütövlüyünü birmənalı dəstəkləyir. Bu da onun böyük liderliyindən xəbər verir. O üzdən, Əliyevi Paşinyanla heç cür müqayisə etmək olmaz. İlham Əliyev Azərbaycanı Cənubi Qafqazın lider dövlətinə çevirdi. Ermənistan isə vəziyyətə uyğun olaraq kiminsə yedəyində getməyə adət edib. Prezidentimiz müharibə başlamazdan əvvəl 2022-ci ilin yanvarında Ukraynaya rəsmi səfər etdi. Azərbaycan Rusiyaya tətbiq olunan sanksiyalardan yayınmır. Ancaq Ermənistan praktiki olaraq sanksiyalardan yayınır və bunu Ukrayna ilə Qərb də bilir”.
Vidadi ORDAHALLI
