“Euronews” Şarl Mişeldən nümunə götürmədi - hansı “Dağlıq Qarabağ xalqı”?..

Ayrı-ayrı vaxtlarda anti-Azərbaycan təbliğatı və ermənipərəstliyi ilə ad çıxarmış “Euronews” kanalı arada-sırada balansı qorumağa cəhdlər etsə də, enində-sonunda yenə də bizə qarşı qərəzini büruzə verməyə bilmir.

Belə ki, “Euronews”un rus dilindəki 2 iyun buraxılışında Kişinyov görüşdən reportaj veren jurnalist "Dağlıq Qarabağ xalqı" ifadəsi işlətdi. Halbuki, belə bir ifadə də, belə bir xalq da yoxdur, Qarabağ iqtisadi rayonunda yaşayan ermənilər var ki, onlar da Azərbaycan torpağında yaşayırlar. Amma nədənsə, jurnalist “keşmiş Dağlıq Qarabağda yaşayan ermənilər” fikrini işlətmədi.

Bilirik ki, bir neçə gün əvvəl Aİ sədri Şarl Mişel  “keçmiş Dağlıq Qarabağ Muxtar Vilayətində yaşayan ermənilər” ifadəsini işlətməklə düzgün bir mövqe sərgilədi. Yəni hələ də oyuncaq “Dağlıq Qarabağ xalqı”  ifadəsindən bərk-bərk yapışıb onu buraxmaq istəməyənlər Ş.Mişelin yanaşmasına baxsınlar.

Bunlar yenə hansı uydurma “Dağlıq Qarabağ xalqı"ndan danışırlar?

“...Qəbuledilməz bir səhv hesab edilməlidir”

Politoloq Tural İsmayılov baki-xeber.com-a şərhində “təəssüflər olsun ki, beynəlxalq mediada hələ də ədalətsiz və məlumatsız bir şəkildə bölgə ilə bağlı “şərhlər” verilir. Ümumiyyətlə, beynəlxalq mediada sırf erməni lobbisinin maraqları prizmasında bölgənin taleyi, siyasi vəziyyəti, tarixi haqda səhih bilgilər olmadan məlumatlar vermək tendensiyasına rast gəlirik. Hesab edirəm ki, bu çox acı tendensiyalardan biridir”-deyə bildirdi.

T.İsmayılovun sözlərinə görə, nəzərə almaq lazımdır ki, dünyanın ən önəmli coğrafiyalarında və dünyanın ən vacib bölgələrində bu tip ədalətsizliklərə qlobal mətbuatda çox rast gəlinir. “Bu baxımdan da, “Euronews”un rus dilində buraxılışında “Dağlıq Qarabağ xalqı” ifadəsinin işlənməsi qəbuledilən bir hal deyil. Fikrimcə, bu, Azərbaycan coğrafiysının və həmçinin bölgənin reallığına qarşı edilən qəbuledilməz bir səhv hesab edilməlidir. Bu baxımdan, “Euronews” da daxil olmaqla beynəlxalq medianın bundan sonra bu məsələdə daha diqqətli olması vacibdir. Amma çox təəssüf, baş verən bütün tendensiyalar göstərir ki, diqqət və ehtiyat gözlənilmir. Bütün bunlar da bizim çoxdan öyrəşdiyimiz ədalətsizliyi, siyasi maraqlara xidmət etmək kimi reallıqları özündə ehtiva edir”- deyə politoloq vurğuladı.

İradə SARIYEVA