Azər Həsrət: “Faktiki olaraq, fars molla rejimi bizə qarşı düşmən siyasəti yürüdür”
Gedişat göstərir ki, İran ora səyahət etmək istəyən insanlar üçün çox təhlükəli bir ölkədir. Maraqlıdır, bugünə qədər saysız xarici ölkə vətəndaşları molla rejimi tərəfindən "casus" ittihamı ilə həbs olunub. Bu ölkədə itkin düşənlər də az olmayıb. Lakin buna görə Tehran rejimi özünü günahkar bilməyib, əksinə, qanunsuz əməllərini davam etdirib, əcnəbilərə qarşı "ovçuluq" edib. Bildiyimiz kimi, bir neçə ay əvvəl İrana səfər edən Azərbaycan vətəndaşı Fərid Səfərlinin əvvəlcə itkin düşmə xəbəri yayıldı, Azərbaycan hökumətinin ciddi səyləri nəticəsində İran F.Səfərlini həbs etdiyini açıqladı. Guya Fərid ora "casusluq" etmək üçün gedibmiş. Bu rejim bunu əslində özündən, öz varlığından şübhə duyduğu üçün edir. Yoxsa normal ölkə nəyə görə hamını casus donunda görməlidir ki? "
MOUZE Teleqram kanalı indiyə qədər molla rejiminin "casus" ittihamı ilə həbs etdiyi Azərbaycan vətəndaşlarının siyahısını yayıb. Kanalın bilgisinə görə, İrana işləmək üçün gedən azərbaycanlı alim Rəşid Əliyev də 2008-ci ildə qondarma casusluq ittihamı ilə həbs olunmuşdu.
Bundan başqa, Azərbaycanın iki gənc şairi Fərid Hüseyn və Şəhriyar Del Gerani (Hacıyev) 2012-ci il mayın 2-də İranda həbs olunmuşdu. İrana ədəbi müsabiqədə iştirak üçün gedən gənc şairlər İran təhlükəsizlik qüvvələri tərəfindən qondarma ittihamla həbs olunmuş, üç ay orada həbsdə saxlanmışdı.
Digər azərbaycanlı alim Xalidə İsmayılova (Xalid) və onun sürücüsü Şamxal Hüseynov da 2013-cü il aprelin 30-da ETTALAT tərəfindən qondarma casus ittihamı ilə saxlanılmışdı. Yəni belə hallar indiyəcən bir neçə dəfə təkrarlanıb, molla rejimi xeyli vətəndaşımıza qarşı "casus" ittihamı irəli sürüb. Bu nə ilə bağlıdır, səbəb nədir?
“Bunlar hamısı molla rejiminin mahiyyiyyətindən doğan yanaşmalardır”
Siyasi şərhçi Azər Həsrət baki-xeber.com-a "Biz bu siyahıya "Azadlıq" qəzetinin baş redaktoru Qənimət Zahidi də əlavə edək. Bu hadisələrdən xeyli öncə Qənimət Zahid də eyni qaydada saxlanılmışdı. Hətta ona ETTALAT-lə işbirliyi haqda bir sənəd də imzaladılmışdı. Qənimət Zahid könüllü şəkildə imzalayaraq oradan qurtulmuşdu və Azərbaycana keçən kimi də ovaxtkı Milli Təhlükəsizlik Nazirliyinin müvafiq qurumuna bu haqda məlumat vermişdi.
Yəni İran İslam Cumhuriyyəti adlı şeytan yuvası xarici vətəndaşlara qarşı bu cür əməlləri gen-bol istifadə edir. Özəlliklə, Azərbaycan vətəndaşlarına qarşı bunun edilməsi bir daha ondan xəbər verir ki, bu şeytan yuvası Azərbaycan Respublikası ilə normal qonşuluq münasibətləri qurmaq fikrində deyil. Yəni İranı idarə edən fars molla rejimi istər Güney Azərbaycanda, istərsə də Quzey Azərbaycanda bizi həzm edə bilmir. Etmək də istəmir. Siz fikir versəniz görərsiz ki, bizə qarşı bu əməlləri törətməklə bərabər, fars-molla rejimi Güney Azərbaycandakı soydaşlarımızı da daimi repressiyalara məruz qoyur, onlar daim “ikinci növ vətəndaş” kimi münasibət görür. Hətta adi bir hadisə deyim: bu günlərdə Güney Azərbaycanda bir sıra yaşayış məntəqələrini sel basdı, evlər dağıldı, vətəndaşların harayını biz Quzey Azərbaycanda eşidirik, amma Tehran rejimi orada bunu eşitmək istəmir. Soydaşlarımız təbii fəlakətlə üzləşəndə belə İran İslam Cumhuriyyəti öz vətəndaşlarına qayğı göstərmir”.
A.Həsrət vurğuladı ki, bu ilin yanvarında Xoyda baş verən zəlzələ zamanı da molla rejimi soydaşlarımızı taleyin ümidinə buraxdı, onlara kömək etmək istəyən digər soydaşlarımızın da qarşısını kəsdi. “Faktiki olaraq, fars molla rejimi bizə qarşı düşmən siyasəti yürüdür. Bu siyasətin də qarşısının alınması o zaman mümkün olacaq ki, müstəqil bir dövlət kimi Güney Azərbaycan Cumhuriyyəti qurulacaq, soydaşlarımız öz hüquqlarını özləri təmin edəcəklər. Belə olanda isə Azərbaycan Respublikasından ora gedib-gələnlərin problemləri olmayacaq. Əlbəttə ki, “casus” ittihamları qondarmadır, qondarma olduğuna heç kəsin şübhəsi yoxdur. Gedənlərimiz, orada tutulanlarımız, sonradan azadlığa çıxanlarımız birmənalı şəkildə bu ittihamları rədd edirlər, üstəlik araşdırmalar da göstərir ki, o adamların casusluqla yaxından-uzaqdan əlaqəsi olmayıb. İndi də bir gənc tələbəni həbs ediblər, adını da “casus” qoyublar. Yəni bunlar hamısı da molla rejiminin mahiyyiyyətindən doğan yanaşmalardır”-deyə qeyd edən A.Həsrət bir daha vurğuladı ki, Güney Azərbaycan müstəqil dövlət olduqdan sonra bu kimi problemlər kökündən həll olunacaq.
İradə SARIYEVA
.jpg)