Paşinyan "sərhədlərdə təhlükəsiz zona" çağırışının əsas hədəfini ağzından qaçırdı - strateji yüksəkliklər...
Ermənistan Baş naziri Nikol Paşinyan Moldovada erməni icması ilə görüşündə deyib ki, Azərbaycana kəndləri qaytarmağa hazırdırlar:
“Bəs siz Ermənistana torpaqları qaytarmağa hazırsınızmı? Razısınızsa, onda elə bu dəqiqə mübadilə edək. Bizim hər zaman nəsə vermək haqda arzulamağımız doğru deyil. Biz verməyə və almağa hazırıq. Ermənistanın maraqlarından vaz keçmirik: bütün sərhəd boyu hərbsizləşdirilmiş zona yaratmağı təklif edirik; eskalasiya və aqressiv siyasət üçün bütün mümkün səbəbləri aradan qaldırmağa çalışırıq”.
Yəqin ki, Paşinyan yalnız anklavların mübadiləsini nəzərdə tutmur. Həm də Azərbaycanın şərti sərhəddə əldə etdiyi yüksəkliklərin Ermənistana verilməsini istəyir. Onun ritorikasından bu qənaət hasil olurmu?
Hərbi-siyasi şərhçi Emin Həsənli “Bakı-Xəbər”ə açıqlamasında bildirdi ki, Paşinyan bir-birinə zidd açıqlamalar verir: “Gün ərzində onun iki görüşü olarsa, Ermənistanda başqa bir açıqlama verir, parlamentdə başqa bir açıqlama verir. Yəni açıqlamalarını təhlil edəndə görürük ki, o nə istədiyini bilmir. Ermənistan müstəqil dövlət deyil, onun rəhbəri müstəqil qərar verə bilmir. Uzun müddət Rusiyadan asılı olub, oranı Rusiya səfiri idarə edib. İndi Amerikadan, Fransadan, Qərbdə olan erməni diasporundan asılıdır. Ona görə də, nə istədiyini bilmir. Bir müddət əvvəl həqiqətləri dedi və qeyd etdi ki, Ermənistan torpaqları kupçasız torpaqlar kimidir, çıxarışı yoxdur. Azərbaycan istədiyi vaxt buranı “işğal” edə bilər. Belə fikirləri səsləndirirərək özünü acınacaqlı durumda göstərməyə çalışır. Ancaq hələ sərhədlər müəyyənləşməyib. Ermənistan özü 10 noyabr şərtlərinə əməl edib, Qarabağdan separatçıları çıxarmır. 10 mindən artıq üzvü olan silahlı dəstə var və bu dəstə ərzaqla, silahla təmin edilir. Ermənistan Azərbaycana vurduğu zərbəni etiraf etmir. İndi sülhdən danışır. Danışanda da elə fikirlər irəli sürür ki, o fikirlərlə razılaşmaq mümkün deyil. Cümləsinin bir hissəsi Azərbaycanın ərazi bütövlüyü ilə bağlı həqiqəti əks etdirirsə, digər tərəfdən də Qarabağda yaşayanların hüquq və təhlükəsizliyini ortaya qoyur. Hansı hüquq və təhlükəsizlikdən danışılır? Azərbaycanın Konstitusiyası var. O Konstitusiyada Azərbaycan vətəndaşlarının hüquqları bərabərdir. Qanun bütün vətəndaşların təhlükəsizliyini təmin edir. Azərbaycan dövlətinin ən ali məqsədi vətəndaşlarının hüquq və azadlıqlarını təmin etməkdir. Ona görə də, bir daha xatırladıram ki, Paşinyan nə danışdığını bilmir və müxtəlif fikirlər irəli sürür. Əslində həqiqəti özü də, Ermənistanda yaşayanların böyük əksəriyyəti də bilir. Onlar yaxşı bilirlər ki, uzaq məsafə deyil. Bir əsr, iki əsr öncə yaşayanlardan eşidiblər ki, Göyçə - Zəngəzur, İrəvan Azərbaycanın olub. Orda azərbaycanlıların böyük əksəriyyəti 87-88- ci illərə qədər yaşayıb. Yaxşı olar ki, Paşinyan bunları gündəmə gətirsin. Təbiidir ki, anklavlarla bağlı məsələni ortaya atır ki, qeyri-müəyyənlik olsun. Azərbaycan onların heç bir ərazisini işğalda saxlamır. Paşinyan sərhəddəki yüksəklikıəri deyirsə, bu, demarkasiya və delimitasiyaya aid olan məsələdir. Paşinyan rasional mövqe ortaya qoysa yaxşı olar”.
Məhəmmədəli QƏRİBLİ
