Mübariz Göyüşlü: “Birinci dəfə deyil ki, İran Azərbaycan vətəndaşını qondarma casusluq ittihamı ilə həbs edib”
İranda itkin düşdüyü bildirilən Almaniyanın Yena Universitetinin azərbaycanlı tələbəsi, 27 yaşlı Fərid Səfərliyə casusluq ittihamı irəli sürülüb. Bu barədə mətbuata açıqlamasında anası Dilarə Əsgərova məlumat verib.
O bildirib ki, Fərid Səfərli İranda həbs edilib: “Bu gün Azərbaycan Xarici İşlər Nazirliyindən mənə məlumat verildi ki, İran tərəfi onlara rəsmi cavab verib. Cavabda qeyd edilib ki, Fərid Səfərli İranda casusluq ittihamı ilə həbs edilib. Hətta bizim konsulluq tərəfindən Fəridlə bir neçə dəfə telefon danışığı olub. Hazırda biz Fəridlə görüş tələb edirik. Konsulluğumuz da bu barədə İranın aidiyyəti qurumlarına müraciət edib”.
Dilarə Əsgərova qeyd edib ki, oğluna verilən ittiham əsassızdır: “İttiham saxtadır, oğlum casusluq etməyib. Biz verilən ittihamları qəbul etmirik”.
Qeyd edək ki, Fərid Səfərli fevralın 20-də eyni universitetdə təcrübə keçmiş həkim sevgilisini görmək üçün Tehran şəhərinə gedib. F.Səfərli martın 5-də Almaniyaya qayıtmalı olsa da, geri qayıtmayıb. Martın 4-dən etibarən Fəridin telefonu sönüb, onunla əlaqə tamamilə itib.
“Tərəfimizdən 9 mart tarixli mətbuat açıqlamasında qeyd olunduğu kimi, Fərid Səfərli barədə məlumat Xarici İşlər Nazirliyinə daxil olan gündən, yəni 9 mart tarixindən etibarən vətəndaşın aqibətinin müəyyən edilməsi və İran tərəfindən məsələyə aydınlıq gətirilməsi məqsədilə, müvafiq olaraq İranın ölkəmizdəki səfirliyinə nota ünvanlanıb”. Bu barədə isə Azərbaycan Respublikasının Xarici İşlər Nazirliyinin Mətbuat xidməti idarəsinin rəisi Ayxan Hacızadə Azərbaycan Respublikasının vətəndaşı Fərid Səfərlinin İranda həbs olunması ilə bağlı yerli medianın sualına cavabında bildirib. “Tərəfimizdən edilmiş çoxsaylı müraciətlərdən sonra İran tərəfi, notamıza cavab olaraq, Fərid Səfərlinin həbs olunaraq, ona qarşı cinayət işi başladıldığını bildirib. Bu barədə, Fərid Səfirlinin ailəsinə müvafiq məlumat verilib. Məlum terror hadisəsi ilə bağlı Azərbaycanın İrandakı diplomatik təmsilçiliyinin məhdud olmasına baxmayaraq, Fərid Səfərli barədə məlumat verildiyi ilk gündən etibarən, həm Xarici İşlər Nazirliyi tərəfindən, həm də Təbrizdəki Baş konsulluğumuz tərəfindən İranın aidiyyəti qurumları ilə müzakirələr aparılmaqdadır. Bununla yanaşı, Fərid Səfərlinin ailəsi və özü ilə mütəmadi əlaqə saxlanılır. Yaxın zamanlarda Təbrizdəki Baş konsulluğumuz tərəfindən Fərid Səfərli ilə görüşün keçirilməsi üçün tədbirlər görülür”, - XİN rəsmisi qeyd edib.
- “Təəssüflər olsun ki, İran hökuməti belə bir siyasi “mübarizə” metodu seçir, belə bir yolu izləyir”
İranın azərbaycanlı tələbəyə qarşı irəli sürdüyü ittihamın əsassız olduğunu deyən Müasir İnkişaf Birliyinin sədri, siyasi şərhçi Mübariz Göyüşlü “Bakı-Xəbər”ə bildirdi ki, bu ölkə zaman-zaman Azərbaycan vətəndaşlarına qarşı əsasalandırılmamış casusluq ittihamı irəli sürüb. “Birinci dəfə deyil ki, İran Azərbaycan vətəndaşını qondarma casusluq ittihamı ilə həbs edib. Azərbaycan vətəndaşlarının İranda həbs olunması məsələsi ilə qarşılaşmışıq, zaman-zaman bu istiqamətdə problemlər çıxıb. Azərbaycan dövlətini, ictimai qurumların, aktivistlərin dəstəyi ilə o həbs olunanlar ölkəmizə qaytarılıb. Təəssüflər olsun ki, İran hökuməti belə bir siyasi “mübarizə” metodu seçir, belə bir yolu izləyir. 27 yaşlı Fərid Səfərlinin “casus” olmasına qətiyyən inanmıram. 27 yaşlı Azərbaycan vətəndaşının həbsində hansısa “casusluq” motivinin olması inandırıcı görünmür, bunu Azərbaycan və İran arasında gərgin münasibətin təzahürü kimi görürəm. Bunu İran tərəfin növbəti anlamsız, mənasız siyasi təzyiq vasitəsi, siyasi davranış olaraq qiymətləndirirəm. Yəni bunun mahiyyəti belə görsənir”-deyə M.Göyüşlü qeyd etdi.
M.Göyüşlünün fikrincə, qonşu ölkə əgər bu cür vasitələrlə Azərbaycana siyasi təzyiqlər etmək istəyirsə yanılır. Bunun Azərbaycan ictimaiyyətində İranla bağlı ictimai rəyin, münasibətin daha da sərtləşməyə səbəb olduğunu deyən M.Göyüşlü bildirdi ki, Azərbaycanın aidiyyəti qurumları artıq bu məsələni nəzarətə götürüblər və prosesə müdaxilə ediblər. M.Göyüşlünün sözlərinə görə, Azərbaycan qurumlarının səyi ilə tezliklə F.Səfərlinin azad olunaraq Azərbaycana gəlişinin və təhsilini davam etdirmək üçün ali təhsil aldığı ölkəyə dönüşünün təmin ediləcəyini müşahidə edəcəyik. “Düşünürəm ki, İranın müvafiq qurumları bu məsələlərə köklənməkdənsə, bizim səfirliyə qarşı terror hücumunun daha obyektiv araşdırılmasına səy göstərsələr daha yaxşı olar”- deyə M.Göyüşlü əlavə etdi.
Əli TURABOV
.jpg)