Rusiya Baş nazirinin müavini Aleksey Overçuk bildirib ki, 3 ölkə rəsmilərindən ibarət işçi qrupun iclasında Azərbaycanla Ermənistan arasında sərhəd buraxılışı barədə texniki detallar müzakirə ediləcək.
A.Overçuk Zəngəzur yolu ilə bağlı müzakirələrdən söz açıb və bunları qeyd edib: “Burada pasport yoxlanışı, gömrük nəzarəti və beynəlxalq sərhədlərdə mövcud olan digər bütün nəzarət növləri tətbiq ediləcək. Bu gün tərəflər Azərbaycanın şərq rayonları ilə Naxçıvan arasında dəmiryolunun salınması danışıqlarına çox yaxınlaşıblar. Həmçinin Ermənistanın Naxçıvan, Zəngəzur, ümumilikdə Azərbaycan vasitəsilə Rusiya, İran və başqa ölkələrə gediş-gəlişi mümkün olacaq. Tərəflər Azərbaycanın qərb rayonları ilə Naxçıvan arasında dəmir yolu əlaqəsinin bərpasına yaxındır”.
Rusiya xarici işlər naziri Sergey Lavrov hələ aylar öncə belə bir açıqlama vermişdi ki, Naxçıvana gedən dəmir yolunun texniki iqtisadi əsaslandırması demək olar qurtarıb. İndi avtomobil yolu üzərində düşünülür. Ancaq Overçuk deyir ki, indi tərəflər Naxçıvana dəmir yolunun salınması danışıqlarına çox yaxınlaşıblar. Görünən odur ki, iki Rusiya rəsmisinin dediklərində bir ziddiyət var. Bütün bunları necə anlamaq olar?
“Yolların, dəmir yolunun və bütövlükdə kommunikasiyaların açılmasında hansısa ciddi problem yoxdur, amma...”
Məsələ ilə bağlı “Bakı-Xəbər”ə açıqlama verən “SƏS” Media Qrupunun rəhbəri, politoloq Bəhruz Quliyev buna bir neçə aspektdən yanaşdı: “Rusiya Prezidenti Vladimir Putin, Azərbaycan Prezidenti İlham Əliyev və Ermənistan Baş naziri Nikol Paşinyan görüşündə sülh müqaviləsi və kommunikasiyaların açılması haqqında sazişlərin imzalanmasına olan ümidlər özünü doğrultmayıb. Bunun əvəzinə növbəti dəfə qarşılıqlı iddialar irəli sürülüb. Paşinyan Rusiyanı Laçın dəhlizindən sərbəst hərəkətin təmin edilməsi üzrə öhdəliklərini yerinə yetirməməkdə ittiham edib. Öz növbəsində, Rusiya baş nazirinin müavini Aleksey Overçuk jurnalistlərə bildirib ki, Rusiya, Azərbaycan və Ermənistan rəsmilərindən ibarət işçi qrupun iclasında Azərbaycanla Ermənistan arasında sərhəd buraxılışı barədə texniki detallar müzakirə ediləcək. A.Overçuk Zəngəzur yolu ilə bağlı müzakirələrdən söz açaraq deyib ki, Ermənistanın Naxçıvan, Zəngəzur, ümumilikdə Azərbaycan vasitəsilə Rusiya, İran və başqa ölkələrə gediş-gəlişi mümkün olacaq. Bu ziddiyyətlər ondan qaynaqlanır ki, Lavrovun dedikləri bir neçə ay bundan öncə danışıqlar prosesinə uyğun olaraq səslənib. Rusiya Federasiyasının Baş nazirinin müavini Aleksey Overçukun isə səsləndirdiyi fikirlər bu günlərdə Moskvada baş tutan görüşlərin nəticəsi olaraq diqqətə çatdırılıb. Yəni bütün bu deyilənlər hər hansı formada yolun açılması və yaxud kommunikasiyanın təmin olunması üçündür. 2020-ci ilin 10 noyabrında imzalanmış üçtərəfli bəyannamədə də göstərilir ki, dəmir və quru yolu dəhliz olaraq açılacaq. Yolların, dəmir yolunun və bütövlükdə kommunikasiyaların açılmasında hansısa ciddi problem yoxdur. Amma hansı formada bərpa olunacağı isə danışıqlar predmetinə uyğun olaraq öz həllini tapacaq”.
Vidadi ORDAHALLI
