“Rusiya Zabitləri” Ümumrusiya Təşkilatının Rəyasət Heyətinin üzvü polkovnik Levon Arzanov cinayət motivli açıqlama verib: “Azərbaycanın yaxın gələcəkdə “Dağlıq Qarabağ”dan olan 120 min (?) erməniyə qarşı həyata keçirəcəyi kütləvi etnik təmizləmənin dünya şahidi olacaq. Moskvada keçirilən sammit göstərdi ki, Ermənistan və Azərbaycan liderləri eyni məqsəd güdürlər”.
Dövlət Dumasının MDB işləri üzrə komitəsi sədrinin birinci müavini Konstantin Zatulin isə sülh müqaviləsinin imzalanmasının “ Artsax” və onun əhalisi üçün hansı nəticələrə gətirib çıxaracağını izah edib:
“Onun fikrincə, saziş Dağlıq Qarabağın statusu ilə bağlı gələcək müzakirələrin üstündən xətt çəkir və Rusiya sülhməramlılarının regiondan çıxarılmasını nəzərdə tutur, çünki Azərbaycan buna çalışır”.
Deputat 1915-ci ildə Osmanlı İmperiyasında baş verənlərə bənzər bir ssenari proqnozlaşdırıldığını deyib:
“Eyni zamanda, Zatulin indi Azərbaycan və İranın qarşıdurmasından faydalanan Qərbə arxalanmamağa çağırıb. Və bu oyunda ABŞ bir çox şeylərə, o cümlədən ermənilərin ”Artsaxdan” deportasiyasına göz yumacaq”.
Göründüyü kimi, hər iki Rusiya təmsilçisi Azərbaycanı ağır bəşəri cinayətdə ittiham edir. Məhz bu açıqlamalara görə Azərbaycan onlara qarşı cinayət işi qaldıra bilərmi?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, belə bir həssas məqamda Rusiyanın rəsmi şəxslərinin bu cür açıqlamalar verməsi Ermənistan və Azərbaycan arasında sülh müqaviləsinin bağlanmasına əngəl yaradır: “Digər tərəfdən, regionda vəziyyətin qəlizləşməsinə səbəb olan çağırışlardır. Onlar doğrudan da düşünürlər ki, vəziyyət burda ermənilərin xeyrinə olmayacaq. 30 il ərzində Azərbaycana qarşı, Azərbaycanda yaşayan dinc əhaliyə qarşı Ermənistan və havadarları tərəfindən milli, dini, etnik zəmində soyqırımlar olub. Çox təəssüflər olsun ki, beynəlxalq aləmdə bu sahədə nə fərqli bir tribuna yaradıldı, nə də fərqli reaksiya verildi. Bütün bəşəriyyətin gözü qarşısında bu insanlar məsuliyyətə cəlb olunmalı idi ki, digərlərinə də dərs olsun. Amma artıq Azərbaycanın 44 günlük zəfərindən sonra təkcə Ermənistan yox, Ermənistana havadarlıq edən bir sıra ölkələr də təşvişə düşüblər. Təbii ki, burada müəyyən dini faktorlar var. Amma düşünürəm ki, indiki halda həm polkovnikin, həm Zatulinin bu şəkildə çağırışları yenidən regionda müharibəni hazırlama planı kimi görünür. Əgər regionda vəziyyət yenidən gərginləşəcəksə, beynəlxalq aləmdə sülh üçün ciddi bir təhlükə yaranacaq. Bu insanlar bəşəriyyət əleyhinə olan müharibəni qızışdırmağa çağırışlar edirlər. Digər tərəfdən burada başqa faktorlar da var. Onların çağırışlarında sadə insanların görmədiyi nüanslar var. Terrorçuluğun planlaşdırılması kimi də hesab edə bilərik bu addımları. Buna görə də, cinayət işinin açılması üçün kifayət qədər əsas var. Həmçinin regionda ictimai təhlükəsizliyi pozmaq üçün çağırışlar edirlər. Bütün bunlar hamısı həm də burda milli, irqi, sosial nifrət və düşmənçiliyin yaranması üçün zəmin sayılır. Bu baxımdan Azərbaycan tərəfi və prokurorluq onların çağırışlarına uyğun cinayət tədbiqinə başlaya bilər. Düşünürəm ki, bu çox vacib haldır. Bütün dünya artıq Qarabağ və Ermənistan arasında sülhün təyin olunmasında maraqlıdır, beynəlxalq səviyyədə görüşlər keçirilir. ABŞ, Rusiya, Türkiyə kimi ölkələr bu sahədə öz maraqlarını göstərirlər. Təbii ki, Azərbaycan öz ərazisində digər hərbi qüvvələrin yerləşdirilməsinin əleyhinədir. 2020 - ci il 10 noyabrda biz üçtərəfli qərarla razılaşdıq. Razılaşdıq ki, bölgədə təhlükəsizliyi qorumaq üçün Rusiya sülhməramlıları burda olsun. Amma müddət bitdikdən sonra Azərbaycan tərəfi heç bir vəchlə rus sülhməramlıların orda saxlanmasına imkan verməyəcək. Əgər bu baş verərsə, müxtəlif qüvvələr sülhməramlıların orda qalmasına maraq təşkil edəcəksə, biz antiterror əməliyyatına başlayacağıq. Mən bunu səlahiyyətli şəxs kimi yox, Azərbaycan vətəndaşı, veteran kimi deyirəm. Azərbaycan ərazisində bu gün də rus sülhməramlılarına söykənən terror qrupları var. Onlar Azərbaycanın ərazisi üçün, orda yaşayan Azərbaycan vətəndaşları üçün təhdiddən başqa bir şey deyil. Ona görə demək istəyirəm ki, Azərbaycanın kifayət qədər hərbi imkanları, beynəlxalq hüquqa söykənən arqumentləri var. Biz öz ərazimizdə bütövlükdə sülhü təmin etmək üçün hərbi addımlar atacağıq. Heç kim bunu bizə qadağan edə bilməz. Əgər onlar doğrudan da istəyirlər ki, belə hallar baş verməsin, o zaman sakit dayansınlar. Azərbaycanın ərazi bütövlüyü ilə bizi imtahana çəkməsinlər”.
Məhəmmədəli QƏRİBLİ
