Məlum olduğu kimi, İsrail Prezidenti İsxak Hersoq Azərbaycanda rəsmi səfərdədir. Mayın 30-da Prezident İlham Əliyev və İsrail Dövlətinin Prezidenti İsxak Hersoq arasında təkbətək və geniş tərkibdə görüş keçirilib.
Görüşdən sonra prezidentlərin iştirakı ilə “Azərbaycan Səhiyyə Nazirliyi ilə İsrail Dövlətinin Səhiyyə Nazirliyi arasında səhiyyə və tibb elmi sahələrində 2023-2028-ci illər üçün Əməkdaşlıq Planı” imzalanıb. Daha sonra prezidentlər mətbuata bəyanatlarla çıxış ediblər.
O da məlumdur ki, bu ilin martında İsraildə səfirliyimiz açılandan sonra İran ölkəmizə qarşı olmazın yaramazlıqlar etdi. Molla rejimi buna isterik formada reaksiya verdi. Oradakı müxtəlif dairələr ölkəmizə yönəlik təhdidlərlə çıxış etdilər. Xüsusən də mətbuatda Azərbaycana qarşı kəskin qaralama kampaniyası aparıldı. Maraqlıdır, İsrail prezidentinin Bakıya gəlişindın sonra İranın Azərbaycana münasibətində nə dəyişiklik olacaq?
“Ancaq bütün bunlar nəyəsə təsir edə bilməyəcək və dövlətimiz gücləndikcə, Tehranın ölkəmizə təsir imkanları daha da azalacaq”
Məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayev buna bir neçə aspektdən yanaşdı: “Əvvəla, İsraillə Azərbaycan arasında çox sıx əlaqələr var. 44 günlük Vətən müharibəsi zamanı İsrailin Azərbaycana necə böyük dəstək verdiyinin şahidi olduq. Ondan əvvəlki və sonrakı müddətdə də yəhudi xalqı ilə bizim xalq arasında hər zaman dostluq münasibətləri olub. Əsrlər boyu yəhudilər Azərbaycanda dinc şəraitdə yaşayıblar. Hazırda İsraildə yaşayan yəhudilər iki ölkə arasında bir körpü rolunu oynayır. Bəli, İsraildə Azərbaycan səfirliyinin açılması İranda böyük ajiotaja səbəb oldu. İran dövlət rəsmiləri, mollalar Azərbaycana qarşı təzyiq dilində danışmağa başladılar və buna çox sərt reaksiya verdilər. Açıq-aydın göründü ki, İran dövləti İsrailin Azərbaycanla sıx əlaqələr yaratmasında maraqlı deyil. Bundan bir bəhanə kimi istifadə edərək, həm Azərbaycana, həm də İsrailə qarşı bir təbliğat mexanizmi qurdular. Eyni zamanda İran daxilində öz yaramazlıqlarını, iqtisadi-sosial sahədə kəskin problemləri ört-basdır etmək üçün Azərbaycanı bir günahkar kimi təqdim etməyə çalışdılar. Ancaq bütün bu qaralama kampaniyasına baxmayaraq, Azərbaycan İsraillə əlaqələri kəsmədi. Əksinə, daha da inkişaf etdirdi. Hesab edirəm ki, bu çox doğru qərar idi. Ona görə ki, Azərbaycan müstəqil dövlətdir. Azərbaycan öz siyasətini hansısa İran mollasının arzu və istəyinə görə müəyyən etmir. İndi də, məlum olduğu kimi, İsrail prezidenti Azərbaycana rəsmi səfərdədir. İki ölkə rəsmiləri arasında yüksək səviyyəli görüşlər keçirilir, sazişlər imzalanır və s. Elan olundu ki, Azərbaycanla İsrail arasında ticarət dövriyyəsi 1,7 milyard dollara çatıb. Müxtəlif sahələrdə, o cümlədən müdafiə sahəsində əməkdaşlıq daha da inkişaf etdiriləcək. Kənd təsərrüfatı sahəsində Azərbaycan İsrailin təcrübəsindən yararlanacaq. Çünki İsrailin aqrar sahədə çox üstün təcrübəsi var və bundan yararlanmaq lazımdır. Təbii ki, bütün bunları İran istəmir. O baxımdan səfərlə bağlı İranda ölkəmizə yönəlik növbəti qaralama kampaniyası başlayacaq. Nəticədə bəd əməllərini davam etdirəcəklər. Ancaq bütün bunlar nəyəsə təsir edə bilməyəcək. Dövlətimiz gücləndikcə, Tehranın ölkəmizə təsir imkanları daha da azalacaq. Bir sözlə, İsraillə əlaqələri daha da inkişaf etdirmək lazımdır”.
Vidadi ORDAHALLI
