“Bu gün o bölgədə (Qarabağda) istənilən əməliyyatı keçirmək üçün hər bir imkanımız var”. Bunu Prezident İlham Əliyev Laçında bu rayondan olan sakinlərlə görüşdə bildirib.
Ölkə başçısının sözlərinə görə, yeganə yol separatçıların təslim olmasından keçir: “Yeganə yol qalıb - Azərbaycan qanunlarına tabe olmaq, Azərbaycanın loyal normal vətəndaşı olmaq, öz dıqnaqarası saxta dövlət atributlarını zibil yeşiyinə atmaq, “parlament”i buraxmaq. Guya orada “parlament” fəaliyyət göstərir, guya orada prezident var, guya nazir var, bunlar hamısı gülməlidir. Biz, sadəcə olaraq, dözüm göstəririk. Halbuki, hər kəs yaxşı bilir ki, bu gün o bölgədə istənilən əməliyyatı keçirmək üçün hər bir imkanımız var. Ona görə “parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və digərləri öz vəzifələrini artıq kənara qoymalıdırlar”.
Ümumilikdə, bu nə deməkdir? Sözügedən bəyanat həm də konkret hədədir. O baxımdan məlum xəbərdarlıq bundan sonra ermənilərə necə təsir göstərəcək?
“... artıq rus sülhməramlıları da onları xilas etmək gücündə deyil”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, bu, separatçılara edilən sonuncu xəbərdarlıqdır: “Məsələ ondadır ki, 44 günlük müharibədən sonra Qarabağa Rusiya sülhməramlıları yerləşəndə separatçılar arxayın oldular. Onlar elə düşünürdülər ki, Rusiya sülhməramlılarına görə Azərbaycan hansısa əməliyyatlara cəsarət etməz. Ancaq proseslərin gedişi onların gözləntilərini alt-üst etdi. Məsələn, 2022-ci ilin 24 martında Azərbaycan Ordusu Əsgəran istiqamətində Fərrux yüksəkliyini ələ keçirdi. Həmin yüksəklik olduqca böyük strateji əhəmiyyətə malikdir. Azərbaycanın bu uğuru ermənilər içərisində böyük şoka səbəb oldu. Həmin ilin avqustunda həyata keçirilən qisas əməliyyatı nəticəsində Qarabağ istiqamətində Sarıbaba, Qırxqız və Buzdux yüksəklikləri ermənilərdən təmizləndi. Nəticədə bütün əsas strateji yüksəkliklər nəzarətimizə keçdi. Separatçılar yenə bundan nəticə çıxarmadılar. Ötən ilin 12 dekabrında Azərbaycan yumşaq gücə əl ataraq QHT-lər vasitəsilə Xankəndi-Şuşa yolunda aksiya təşkil etdi. Bu ilin 23 aprelinə qədər davam edən aksiya zamanı həm Qarabağın sərvətlərinin qanunsuz talanmasının qarşısı alındı, həm də ora silah daşınması önləndi. Ən nəhayət, aprelin 23-də Laçın yolunun başlanğıcında nəzarət-buraxılış məntəqəsi quruldu ki, bu da halqanın qapanması demək idi. Nəzərə alsaq ki, Ermənistan Qarabağ daxil olmaqla Azərbaycanın ərazi bütövlüyünü tanıyıb, artıq heç bir qüvvə Azərbaycanın lokal əməliyyatlar aparmasına mane ola bilməz. O cümlədən, artıq rus sülhməramlıları da separatçıları xilas etmək gücündə deyil. O üzdən, onlar Prezident İlham Əliyevin xəbərdarlığından nəticə çıxarmalıdılar. Bu, onlara verilən sonuncu şansdır. Azərbaycan hər an Qarabağda lokal əməliyyatlar aparmaq imkanına malikdir və bu mümkündür”.
Vidadi ORDAHALLI
