Rusiya Zəngəzurda konsulluq açacaq. Bu barədə Rusiya Xarici İşlər Nazirliyinin MDB ölkələri üzrə 4-cü departamentinin direktor müavini Sergey Paltov Moskvada erməni və rusiyalı ekspertlərin dəyirmi masasında bildirib.
Onun sözlərinə görə, mayın 25-də Moskvada keçirilən Paşinyan-Putin ikitərəfli görüşündə Ermənistan tərəfi Rusiya tərəfinin Zəngəzur vilayətində konsulluğunun açılmasına razılıq verib.
Rusiyalı diplomat onu da qeyd edib ki, konsulluğun yaradılması prosesində ən azı bir il tələb olunacaq uzun dövlət prosedurları olmadan, sadələşdirilmiş yolla getmək qərara alınıb.
Paltovun sözlərinə görə, Zəngəzur vilayətinə yerində işləmək üçün adamların göndərilməsi barədə qərar qəbul edilib:
"Ona görə ki, onlar artıq orada işləməyə başlasınlar və təkcə Ermənistan-Rusiya dostluğunun qorunub saxlanmasına deyil, həm də Ermənistanın bu strateji əhəmiyyətli regionunun təhlükəsizliyinə töhfə versinlər. Ümid edirəm ki, iyunda səfərimiz səmərəli olacaq".
Maraqlıdır, İranın ardınca indi də Rusiya Zəngəzurda konsulluq açmaq niyyətinin olduğunu bildirdi. Bu, Rusiyanın nəyinə lazımdır?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Rusiyanın Zəngəzurda konsulluq açmaq istəyi bölgənin əhəmiyyətinin günü-gündən önəmli olması və bir sıra dövlətlərin həmin əraziyə xüsusu diqqəti artırması ilə əlaqədardır: “Bunun da başlıca səbəbi Zəngəzur dəhlizinin açılma perspektivi, Qarabağ münaqişəsinin Azərbaycanın ərazi bütövlüyünün təmin edilməsilə bitməsi ilə əlaqəlidir. Zəngəzurda ilk konsulluğu İran açdı. Hindistan və Çinin də bölgəyə marağı günü-gündən artır. Hindistan-Ermənistan münasibəti daha da yaxınlaşmaqdadır. İranın və Hindistanın Fars Körfəzi- Qara Dəniz nəqliyat dəhlizini reallaşdırmaq istiqamətində atdıqları addımlar davam edir və məqsəd Hindistandan Avropaya qədər uzanacaq, Azərbaycanı kənarda qoyacaq layihəni reallaşmaqdır. Bu dəhlizin Ermənistandan keçməsi üçün ciddi səylər göstərilir. Bunu ilk növbədə İran və Ermənistan istəyir. Bölgəni əhəmiyyətli edən bu cür amillərdi. Rusiya bütün bunları nəzərə alır. Əvvəlcə həmin ərazidə hərbi mövcudluğunu təmin etmək istədi. Öz hərbi postunu yaratdı. Ermənistandakı 102-ci hərbi bazasının iki məntəqəsini Zəngəzura köçürdü. Bu ilin əvvələrinfən başlayaraq mediada Rusiyanın Zəngəzurda konsulluq açmaq niyyətlərinin olduğundan söz açıldı. Əvvəl Rusiya bunu təkzib etdi, indi isə hər şey ortadadır. Moskva bu istəyini tez bir zamanda reallaşdırmaq istəyir. Bunun bir səbəbi də Avropa Birliyinin bölgəyə yerləşdirdiyi müşahidə missiyası ilə bağlıdır. Rusiya bunu çox ciddi etirazla qarşılayır. Güman etmək olar ki, digər dövlətlər də Zəngəzurda öz konsulluqlarını açmaq istiqamətində addımlar atacaqlar. Bu işdə Ermənistan da xüsusi fəallıq göstərir. Güman edir ki, diplomatik nümayəndəliklərin açılması Ermənistanın təhlükəsizliyini bir az da gücləndirə bilər. Onlar anlayır ki, Azərbaycanın günü-gündən artan hərbi imkanları, Türkiyə ilə sıx əməkdaşlığı daim bölgədə gərginlik yaradan Ermənistan üçün yaxşı nəsə vəd etmir. Qədim Azərbaycan ərazisi olan Zəngəzurun strateji əhəmiyyətinin günü-gündən artması böyük gücləri həmin ərazidə daha da fəlaşmağa sövq edir. Azərbaycanın Zəngəzur dəhlizi ilə bağlı atdığı addımlar isə bölgəyə yaxşı iqtisadi əməkdaşlıq perspektivləri vəd edir. Bundan bölgənin bütün ölkələri, o cümlədən Ermənistanın özü də fayda götürmüş olacaq”.
Məhəmmədəli QƏRİBLİ
