Bir neçə gün əvvəl ABŞ-ın Kaliforniya ştatında sui-qəsdə məruz qalan Gunaz.TV – nın rəhbəri Əhməd Obalı ilə bağlı aparılan cinayət işində yeniliyin oldiğu bildirilir. ABŞ-ın “The New York Sun” saytı bununla bağlı sensasion xəbər yayıb.
Bildirilir ki, polis olayın araşdırılması zamanı sürpriz nəticə ilə rastlaşıb. Belə ki, Əhməd Obalıya qarşı hücumu onun oğlunun təşkil etməsinə dair versiya ortaya çıxıb. Sitat: “Obalı özü ifadəsində oğlu tərəfindən təhdid edildiyini deyib. Kaliforniyada iranlı dissidentə müəmmalı hücumda dostları və ailəsi İranı günahlandırır. Polis hesabatında iddia edilir ki, zorakı hücumun arxasında dissidentin oğlu dayanır, baxmayaraq ki, bu hesabat əyani sübutlarla ziddiyyət təşkil edir. Polis müstəntiqləri başqa cür iddia edirlər: İş siyasi motivli deyil, ailədaxili mübahisədən qaynaqlana bilər”.
San Xose polis departamentinin polis rəisinin ofisi tərəfindən yayılan press-relizdə deyilir ki, “qurban oğlunu əvvəlki gecə ona hücum edən şübhəli kimi tanıyıb”. Çox maraqlıdır ki, Əhməd Obalıya hücumla bağlı yayılan ilkin məlumatlarda onunla birlikdə oğlu Dənizin də döyüldüyü bildirilib. Hətta oğlunun ağır vəziyyətdə xəstəxanadan fotoları da yayılıb. Belə olan təqdirdə, ABŞ mediasının Obalıya hücumun təşkilatçısı kimi onun oğlunun adını hallandırması nə dərəcədə inandırıcıdır?
Politoloq Yeganə Hacıyeva “Bakı-Xəbər”ə açıqlamasında bildirdi ki, bu məlumatın heç bir əsası yoxdur: “Obalının oğludur, həbs edilməyib, o da xəstəxanadadır. Həmin yazını isə oxumağı tövsiyə edirəm. İranda azərbaycanlıların cəmi 16 % olduğu iddia edilən yazının hər abzası İranın xeyrinə şərh edilir. Yazıda Məhsa Əmininin öldürülməsı səbəbi belə mübahisələndirilir. Amma dərgidə hər həftə İran şahının “varis” oğlunun xeyrinə yazılar gedir. Odur ku, bu da təəccüblü deyil. Son onillikdə Azərbaycan cəmiyyətində daha çox Qərbyönümlü kimi tanınan şəxslərin, QHT və media təsisatların həssas günlərdə İranın Azərbaycanda nüfuz agentləri kimi çıxış etməsi adi hal olub. İntensiv şəkildə Qərb institutları ilə əməkdaşlıq edənlərdə ABŞ və Avropa fondlarından qrantlar alıb İranın maraqlarına xidmət etmək adəti formalaşıb. İranın Gəncədə, Nardaranda təşkil etdiyi hadisələr zamanı təşkilatçı və iştirakçı kimi həbs olunanlar ölkədəki Qərb institutlarına bağlı, insan haqları müdafiəçiləri şəbəkəsi tərəfindən müdafiə olunurlar. Bəlli QHT, KİV və hüquq müdafiəçilərindən ibarət şəbəkə İran təxribatlarında yer almış şəxslərin müdafiəçisi qismində çıxış edir. Yanvar ayında səfirliyimizə terror hücumu ilə bağlı məişət zəminində hücum kimi təbliğat aparanlar indi də ABŞ-da bir dissident tv-nın rəhbərinə hücumu məişət zəminində oğlunun döyməsi kimi qələmə verirlər. Onda da Qərbdə sığınacaq tapmış çoxsaylı azərbaycanlı mühacirlər , QHT və KİV təmsilçilərinin əksəriyyəti, daxildəki qərbyönümlü siyasi, QHT və digər simalarla birgə səfirlikdəki terroru məişət zəminində cinayət kimi təqdim edən təbliğatla səfərbər olunmuşdular. Bu baxımdan da, yayılan bu məlumatı İranı sudan quru çıxarmaq cəhdi kimi qiymətləndirirəm”.
Məhəmmədəli QƏRİBLİ
