Qasım Hacıyev: “Ermənilər İsa Məsihə abidə qoymaq iddiasına düşməklə qondarma qriqorianlığı xristianlığa yaxın etmək istəyirlər”
İrəvanın mərkəzində daşnaklara, faşist əlaltılarına, canilərə, terrorçulara heykəl qoyan, Qaregin Njdeni “qəhrəman” elan edib abidələrini ucaldan Ermənistan dövləti dünyada terror dövləti olaraq tanınır.
Terrorçulara abidə ucaltmaqda tayı-bərabəri olmayan ermənilər indi də İsa Məsihə abidə ucaltmaq niyyətindədirlər. Belə ki, bir zamanlar “İsa Peyğəmbər də erməni olub” iddiasında bulunan ermənilər xristianlığın banisinə Atis dağında heykəl qoymaq eşqinə düşüblər. Aysor.am-ın verdiyi xəbərə görə, İsa Peyğəmbərin abidəsini Tsarukyan fondu ucaltmaq istəyir. Amma Ermənistanın mədəniyyət elm, təhsil və idman naziri abidə ilə bağlı hələ qərar verilmədiyini deyir. O qeyd edib ki, müvafiq xəritələr Tsarukyan Fondu ilə razılaşdırılıb, lakin hələlik rəsmi proses başlanmayıb. Onun sözlərinə görə, abidənin ucalacağı ərazi nazirliyə aid deyil. Nazir deyib ki, iyun ayında Atis dağının zirvəsində yerləşən qədim qalanın ərazisində qazıntılara başlanılacaq: “Tsarukyan Fondu da hazır olduğunu bildirdi ki, qalanın yenidən qurulmasını həyata keçirmək mümkün olarsa, onlar mütləq müvafiq köməklik göstərəcəklər”.
Erməni mediası iddia edir ki, guya Atis dağının yamaclarında dövlət siyahısına daxil edilmiş, müxtəlif dövrlərə aid 20-yə yaxın tarix və mədəniyyət abidəsi var.
Erməni mediası yazır ki, Ermənistanın baş naziri Nikol Paşinyan Atis dağında İsa peyğəmbərin ən böyük heykəlinin ucaldılması barədə hökumətin razılıq verdiyini açıqlayıb.
Məlumata görə, 77 metrlik heykəlin hündürlüyü Braziliyadakı məşhur İsa heykəlindən də çox olacaq. Paşinyan bu heykəllə ölkəsinə çoxlu turist cəlb etməyi planlayır: "Biz hesab edirik ki, bu layihə önəmli layihə kimi daha irəli çəkiləcək ki, tez planlaşdırılsın. Heç bir ölkədə belə bir heykəl yoxdur".
Ermənistanda İsa Peyğəmbərə heykəl qoymaq hansı məqsədə xidmət edir? Niyə məhz indi bu heykəli qoymaq istəyirlər? İrəvanda faşist Njdeyə heykəl qoyanlar günahlarını anlayıb İsa Məsihəmi sığınmaq istəyirlər?
- “...Çox çalışırlar ki, Ermənistanı Qafqazda “xristianlığın dayağı” kimi qələmə verib...”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, ermənilərin İsa Məsihə abidə qoymaq istəyi heç də İsa peyğəmbərə sevgidən doğmur, onlar bununla özlərinin növbəti məkrli planlarını icra etmək istəyir. Q.Hacıyevin sözlərinə görə, çoxandır ki, ermənilər Ermənistanı Qafqazda xristianlığın “dayağı” kimi göstərmək istəyir, amma buna nail ola bilmirlər. “Ermənilər çox çalışırlar ki, Ermənistanı Qafqazda “xristianlığın dayağı” kimi qələmə verib özlərinə yeni imic qazansınlar. İllərdir saxta tarix yaratmaqla, cəfəndiyyatlar söyləməklə dünyanı aldadıblar. Təsəvvür edin ki, onların hər fəaliyyəti, hər addımı saxtadır, heç bir niyyətləri təmiz deyil. Njdeyə, daşnaklara, terrorçulara abidə qoymaqla bəlli dairələrin maraqlarına xidmət etdiyini və məqsədinin də terrora dəstək olduğunu ortaya qoyan Ermənistan dövlətinin birdən-birə İsa Məsihə tərəf baxması şübhəli görsənir. Burada mütləq bir saxtakarlıq var. Bilirsiz ki, ermənilər özlərini dünyada xristianlığı qəbul edən ilk “xalq” hesab edir, əslində isə onlar xristianlığı sonralar qəbul ediblər. Ermənilər İsa Məsihə abidə qoymaq iddiasına düşməklə qondarma qriqorianlığı xristianlığa yaxın etmək istəyirlər. İsa Peyğəmbərə heykəl qoymaqla özlərini Qafqazda xristianlığın “dayağı” kimi qələmə verib başqa xristian dövlətlərə daha da yaxınlaşmaq istəyirlər. Onlar bu abidəni tikəndə, çox ehtimal ki, xarici fondlardan pul istəyəcəklər. Yəni məqsədləri yenə də ianə toplamaqdır. Fikrimcə, İsa Peyğəmbərin abidəsindən sonra ermənilər yeni əfsanələr, nağıllar qoşacaqlar”.
Q.Hacıyev hesab edir ki, Ermənistanın həm İsa Peyğəmbərə, həm də daşnaklara və faşistlərə eyni gözlə yanaşması bu toplumun mahiyyətini göstərir. Professor Hacıyevə görə, ermənilər İsa Peyğəmbərin heykəlindən bir qalxan kimi istifadə etmək istəyirlər.
İradə SARIYEVA
