Ermənistanın baş naziri Nikol Paşinyanın Qarabağı Azərbaycanın tərkibində tanıya biləcəyi ilə bağlı açıqlamasından sonra ona müxalif qüvvələr arasında bir hərəkətlənmə müşahidə edilməkdədir. Bu sırada erməni diasporu da yer almaqdadır. Xüsusən də Rusiyadakı erməni diasporu ilə Paşinyan iqtidarı arasında münasibətlərin gərginləşməsi müşahidə edilir.
Baş verənlərlə bağlı “armenianreport” portalı yazır: “Ermənistan hakimiyyəti ilə diaspor arasında münasibətlər heç vaxt sadə olmayıb. Əksinə, onlar həmişə mürəkkəb və ziddiyyətli olub. İrəvan uzun illər dövlətin müəyyən problemlərini həll etmək üçün diasporun həm siyasi, həm də maliyyə və iqtisadi potensialından istifadə etməyə ümid edirdi. Öz növbəsində, Ermənistana kömək edən diaspor təkcə minnətdarlıqla deyil, həm də fəaliyyətini Ermənistan hakimiyyətinə müəyyən təzyiq rıçaqları əldə etmək üzərində qurub. Bu, gec-tez münaqişəyə gətirib çıxaracaqdı. Bu, bu gün gördüyümüz Paşinyan hökuməti ilə Rusiyadakı erməni diasporunun yüksək təbəqəsi arasında böyük qalmaqala çevrilmiş haldır. Bilindiyi kimi, Nikol Paşinyanın ölkə rəhbərliyinə gəldiyi ilk günlərdən Moskva ilə münasibətləri yaxşı deyildi. Bu başadüşüləndir - o, İrəvanda itaətkar prezidentləri - Köçəryanı, Sarkisyanı görməyə alışmış Kremlin sayəsində deyil, Rusiyanın iradəsinin əksinə olaraq dövlət başçısı oldu. Bundan əlavə, Paşinyanın keçmişi də Moskvanı əndişəyə salırdı, çünki o, Ermənistanın Aİİ və KTMT-dən çıxmasının tərəfdarı idi. Sonra o, baş nazir kürsüsünə oturaraq, əsas dayağı moskvalılar olan köhnə, oğurluqla məşğul olmuş keçmiş hakimiyyət təmsilçiləini tamamilə sıxışdırmağa başladı. Buna cavab olaraq Moskva Paşinyana meydan oxuyaraq Azərbaycanı dəstəkləməyə başladı və nəticədə Qarabağ Bakının nəzarətinə qayıtdı. Lakin bu, ruslar üçün kifayət etmədi - bir tərəfdən onlar Ermənistanda hökumət əleyhinə səmərəsiz mitinqlər təşkil etməyə, şirnikləndirilmiş media və Teleqram kanallarında “çirkin” məqalələr hazırlamağa başlayan beşinci kolonuna dəstəyini gücləndirdilər, digər tərəfdən Rusiya Federasiyasındakı erməni diasporunun elitasını Paşinyanın üzərinə qaldırdılar. Sonuncu halda çox cəhd etmək lazım deyildi - Ara Abramyan və Rusiya Ermənilərinin “Cib İttifaqı” kimi erməni diasporunun bossları çoxdan Rusiya xüsusi xidmət orqanlarının qarmaqlarındadırlar və buna görə də tapşırıqları yerinə yetirməyə hazırdırlar. Kuratorlarının istənilən sifarişi onlar tərəfindən mütləq yerinə yetirilir.
Elə bu səbəbdən Rusiyada erməni diasporu ultimatum tələbi ilə çıxış etdi - Paşinyan dərhal istefa verməlidir. Rusiya-Ermənistan Təşkilatlarının Koordinasiya Şurasının yaydığı bəyanatda xüsusilə qeyd edilir: “... Nikol Paşinyanın Qarabağın Azərbaycanın tərkib hissəsi olması barədə bəyanatı təkcə Qarabağ ermənilərinin yox, həm də Ermənistan Respublikasının sakinlərinin, eləcə də dünyanın 8 milyonun erməni diasporu, o cümlədən 3 milyondan çox Rusiya ermənisinin maraqlarına xəyanətdir. Nikol Paşinyanın başçılıq etdiyi satqın Ermənistan hökuməti faktiki olaraq Azərbaycan-Türkiyə tandeminin maraqlarına xidmət etməyə başlayıb. Yuxarıda deyilənlərə əsaslanaraq, biz Rusiyanın ictimai-siyasi elitasına müraciət edib, min ildən artıqdır rus xalqının sıx əlaqədə olduğu qardaş erməni xalqına yardım göstərmək üçün lazımi tədbirlərin görülməsini xahiş edirik; Ermənistanın indiki hakimiyyətinə isə deyirik – dərhal istefa verin”.
Beləcə, Rusiyadakı diaspor Paşinyana qarşıdır. Bəs siz indiyə kimi özünüz harda idiniz, satqınlar, Rusiya Azərbaycana milyardlarla dollar dəyərində silah verəndə? 44 günlük müharibədə Moskva öz öhdəliyini yerinə yetirmədiyi halda niyə ağızlarınız bağlı idi? Qorxurdunuz ki, yaxanızdan tutub cibinizdən bütün pullarınızı silkələyəcəklər, elit daşınmaz əmlakınızı əlinizdən alacaqlar, Ermənistana deportasiya edəcəklər? Federal kanallarda Ermənistana rus təbliğatçıları hədyan yağdıranda siz harada idiniz? “Qardaş” erməni xalqı üçün Rusiyanın ictimai-siyasi elitasından nə kömək istəyirsiniz? Bura qoşun yeridilməsi və rusiyapərəst rejimin qurulmasınımı? Gözləməyin. İndi siz öz vətəninizdə deyil, yad ölkədə olmaqla Ermənistanda vətəndaş qarşıdurmasına səbəb olaraq hökuməti istefaya çağırırsınız. Kim sizə belə haqqı verib? Siz bu hökuməti seçmədiniz və onun taleyini həll etmək sizin ixtiyarınızda deyil. Yoxsa Ermənistana verdiyiniz maliyyə yardımına görə buna haqqınız olduğunu düşünürsünüz? Paşinyanın istefasını və yeni müharibəni istəyirsiniz? Xahiş edirəm, özünüz də bura gəlin, oğullarınızı erməni ordusuna göndərin və döyüşün! Yox, gəlməyəcəksiniz. 2020-ci ilin payızında necə gəlməmək olardı? Sizdən neçə nəfər döyüşməyə gəldi? Rusiya-Ermənistan Təşkilatlarının Koordinasiya Şurasının rəhbərliyinin əksəriyyətini çətin 90-cı illərdə Ermənistandan qaçan yeni miqrant dalğası təşkil edir. Bəs niyə ölkədə qalıb onun ayağa qalxmasına kömək etmədiniz? Siz doymuş bir həyat üçün qaçdınız. Ona görə də Ermənistan vətəndaşlarının nə etməli olduğunu, necə yaşamalı olduğumuzu və kimi seçib, kimi işdən çıxaracağımızı söyləmək sizə, Kremlpərəst “mələklərə” düşmür. Sizin buna haqqınız yoxdur. Siz Rusiya xüsusi xidmət orqanlarının muzdluları və məxfi agentlərisiniz”.
Tahir TAĞIYEV
