“Rusiya Xarici İşlər Nazirliyinin rəsmi nümayəndəsi həmsöhbətim ola bilməz, mənim həmsöhbətlərim Rusiya Federasiyasının Prezidenti və Baş naziridir”. Bu sözləri parlamentdə Ermənistan Baş naziri Nikol Paşinyan Rusiyanın Xarici İşlər Nazirliyinin nümayəndəsi Mariya Zaxarovaya cavabında deyib.
“Hörmətli və dost Rusiyanın Xarici İşlər Nazirliyinin nümayəndəsi mənim sözlərimi şərh edə bilməz, o yalnız onları nəzərə ala bilər”, - deyə Baş nazir Mariya Zaxarovanın onun KTMT barədə səsləndirdiyi fikirləri şərh etməsinə cavab olaraq bildirib.
Qeyd edək ki, Zaxarova Paşinyanın KTMT-dən çıxış ilə bağlı açıqlamasından danışarkan, İrəvana sözlərlə manipuliyasiya etməyin təhlükəli olduğu ismarıcını göndərib: “Əgər bu, Ermənistanın KTMT-dən çıxması mövqeyinin lobbiçiliyi üçün bir nitq formasıdırsa, mənim fikrimcə, hər halda sözlərlə manipulyasiya etməyin təhlükəsini tam başa düşmək lazımdır. KTMT Ermənistandan necə çıxa bilər? Nədən söhbət getdiyi anlaşılmır. Nikol Paşinyanın bu sözlərlə nə demək istədiyi Rusiyada tam başa düşülmür”.
“Problem ondadır ki, Kreml Cənubi Qafqazla bağlı imperiya maraqlarından əl çəkmək istəmir”
Sözügedən məsələ ilə bağlı fikirlərini “Bakı-Xəbər”lə bölüşən siyasi şərhçi Qorxmaz İbrahimli hesab edir ki, Zaxarovaya sərt cavab Paşinyanın Rusiyadan qopmaq siyasətinin təzahürüdür: “Paşinyan 2018-ci ildə hakimiyyətə gələndən sonra Qərbə doğru siyasət aparmaqdadır. Əslində isə daha çox Rusiyadan qopmaq siyasəti yeridir. Çünki mövcud Ermənistan hakimiyyəti Rusiyanın məramını, gerçək niyyətini anlayır. Paşinyan hakimiyyəti də Ermənistanın inkişafı naminə Türkiyə və Azərbaycanla münasibətlərin yoluna qoyulmasının fərqindədir. Hətta kifayət qədər normal münasibətlər qurmağa çalışırlar. Bunu rəsmi şəkildə açıq deyə bilmirlər. Ona görə ki, Rusiyanın Ermənistanda çevriliş törədəcəyindən ehtiyat edirlər. Problem ondadır ki, Kreml Cənubi Qafqazla bağlı imperiya maraqlarından əl çəkmək istəmir. Ermənilərdən bir alət kimi istifadə etmək istədiklərini getdikcə daha çox anlayırlar. O üzdən, alət olmaq istəmirlər. Bütün bunlar, əlbəttə ki, Rusiyanı narahat edir. Zaxarova birinci dəfə deyil belə açıqlamalar verir. O, zaman-zaman bu və ya digər formada Paşinyanın yürütdüyü siyasəti tənqid edib. Rusiya mətbuatı da təbliğatını əsasən Paşinyan siyasətini tənqid üzərində qurub. Proseslərin gedişindən asılı olaraq bəzən tənqidin dozasını artırırlar, bəzən azaldırlar. Ona görə ki, Rusiya mətbuatı Kremlin imperiya siyasətini gerçəkləşdirməklə məşğuldur. Kremlin əsas təbliğat ruporu məhz ölkə mediasıdır. Ermənistan davamlı olaraq müstəqil siyasət yeritsə, Rusiyanın Cənubi Qafqazdan çıxarılmasına qismən nail olmaq mümkün olacaq. Çünki Rusiya region dövlətlərini toqquşdurmaqla regionu öz təsiri altında saxlamağa çalışır. Azərbaycanın 44 günlük Vətən müharibəsində qələbəsi, Türkiyənin regionda artan rolu o deməkdir ki, Rusiya bölgədə nüfuzunu itirməkdədir. Ermənistan hakimiyyəti də bunu anladığından öz balanslarını Qərbin hesabına dəyişmək istəyirlər. O üzdən, Paşinyanı anlayıram və hesab edirəm ki, Rusiyadan qopma siyasətini davam etdirməlidir. Biz isə bundan maksimum yararlanmalıyıq. Ancaq bu o demək deyil ki, Rusiyanın yanında yer almalıyıq. Biz balanslı siyasət yeridib milli maraqlardan çıxış etməliyik. Ermənistan-Rusiya münasibətləri pisdi deyə arxayın ola bilmərik. Çünki tarixdə belə şeylərin örnəyi çox olub və biz bundan dərs çıxarmalıyıq”.
Vidadi ORDAHALLI
