Babək Türkoğlu: “...Onu qorxudan etnik qruplar arasında yaranan birlikdir”
Hakimiyyəti itirməyin bircə addımlığında olan və son çırpıntəlarını yaşayan Tehran rejimi ağlasığmaz davranışlar sərgiləyir. Türklərə qarşı daim ayrı-seçkilik və düşmən siyasəti yürüdən mollakratiya indi də türklərlə başqa xalqlar arasında milli - etnik zəmində nifaq toxumu əkir, xalqları bir-biri ilə münaqişə etməyə sövq edir.
Əsas məqsədi isə, təbii ki, türklərin sayını azaltmaq, onların azadlıq, müstəqillik yollarını bağlamaqdır.
MOUZE teleqram kanalı məlumat yayıb ki, molla rejimi ölkə daxilindəki qarşıdurmaları yatırmağa azərbaycanlı hərbçiləri cəlb edir. Sarvan münaqişələrində ölənlərin çoxu Azərbaycan və Xorasan türkləridir. Xorasan və Azərbaycan türklərinin bəluclarla qarşıdurmada İslam Respublikasının anti-türk rejimi üçün öldürülməsi ilk dəfə deyil. Qeyd edilir ki, rejimin mediasında gənclərimizi bəluclarla döyüşməyə təşviq etməsinə imkan verməməliyik. Bunu da kanal yazıb.
- “Çalışır ki, süni surətdə etnik zəmində münaqişə yaratsın, bəlucların üzərinə türkləri, türklərin də üstünə bəlucları və başqa xalqları qaldırsın”
BAO sədrinin müavini Babək Türkoğlu "Bakı-Xəbər"ə şərhində dedi ki, bu mövzu ilə əlaqədar danışarkən, gəlin, ilk növbədə baş verənləri gözdən keçirək. “Bəlucların bir sünni cümə imamı vardı ki, öz xütbələrində, bəyanatlarında fars faşizminin zülmünə qarşı çıxırdı, insan haqlarından, hüquq bərbərliyindən, ədalətdən danışırdı və bu da milliyyətindən, məzhəbindən asılı olmayaraq insanlara xoş təsir bağışlayırdı. Rejim də bəluclara, onların yaşadıqları əraziyə nəzarəti itirməkdədir, oradakı hakimiyyəti çox sürətlə zəifləməkdədir. Dəfələrlə rejim Əbdülhəmid Mövləviyə qarşı terror aktı törətməyə çalışsa da, onu öldürməyə cəhd etsə də, lakin o güclü mühafizə oluduğu üçün bunu bacarmayıblar. Ancaq əllərindən gəldikcə o bölgəni nəzarət altına alıb bəlucları susdurmağa çalışırlar. Tehran rejiminin məqsədi müxtəlif etnik qruplar arasında toqquşmalar, qarşıdurmalar yaratmağa nail olmaq və bununla da öz hakimiyyətini saxlamaqdır. Çünki onu qorxudan etnik qruplar arasında yaranan birlikdir və bu birliyin də mövcudluğu faşist molla rejiminin sonunu gətirən vasitədir. Mollaları əndişələndirənlər budur. Ona görə də çalışır ki, süni surətdə etnik zəmində münaqişə yaratsın, bəlucların üzərinə türkləri, türklərin də üstünə bəlucları və başqa xalqları qaldırsın. Bəlucların sünni olmasından istifadə edib ölkədə şiə-sünni qarşıdurmasını alovlandırıb, bununla da molla rejiminin ömrünü bir az da uzatmaq istəyirlər. Bu səbəbdən də belə edirlər. Çox təəssüflər olsun ki, molla rejimi heç cür Azərbaycan türklərini rahat buraxmaq istəmir, bu məsələdə soydaşlarımızdan istifadə edib öz şər əməlini həyata keçirmək istəyir”-deyə B.Türkoğlu bildirdi.
O xatırlatdı ki, keçən il başlayan “Qadın, həyat, azadlıq” inqilabı zamanı nə qədər insan öldürüldü, qadınlara təcavüz edildi, gəncləri həbsə atdılar, bu gün də etirazlarda iştirak edən adamları edam edirlər. Bir daha təsdiqlənir ki, molla rejimi insan haqlarının, toplumun hüququnun pozulduğu bir rejimdir və İran bu sırada birinci yerdədir. “Həmin etirazlar zamanı molla rejimi insanları susdurmaq, haqq səsini boğmaq üçün özünə bağlı olan terror qruplarını Suriyadan, İraqdan və başqa bölgələrdən gətirmişdi. Onlar aşkar şəkildə camaatı qətlə yetiridi. Yadınıza gəlirsə, azərbaycanlılardan və başqa millətlərdən olan bəzi hərbiçilər, polislər xalqın tərəfinə keçib rejimə qarşı döyüşdülər.
Molla rejimi öz nəşrlərində azərbaycanlı hərbçilərin bəluclara qarşı guya qətliamlar törətdiyini yazmaqla etnik qarşıdurma yaratmaq istəyir. Fars molla rejimi öz faşist varlığını sürdürmək üçün, həmişəki kimi, yenə də din, məzhəb, millət faktorunu alətə çevirməkdədir. Təbii ki, Tehran rejiminin əlaltıları arasında bizim millətimizdən də olan manqurtlar var. Onlar rejimə xidmət edirlər. Amma bu o demək deyil ki, Azərbaycan xalqı orada rejimdən yanadır və molla rejiminin ayaqda qalması üçün gedib hansısa bir başqa qardaş etnik millətə qarşı çıxacaq. Belə deyil. Azərbaycan türkləri başqa millətlərlə də dostluğunu, qardaşlığını davam etdirir və hər kəsin mübarizəsi molla rejimini devirməkdən yanadır. Demokratiyanın, ədalətin, insan haqlarının molla rejiminə qalib gələcəyinə inamım tamdır”- deyə B.Türkoğlu vurğuladı.
Leyla QARAXANLI
