Qətər Dövlətində işgüzar səfərdə olan Ermənistan prezidenti Vaaqn Xaçaturyan Qətər İqtisadi Forumunun təntənəli açılışında iştirak edib. Rəsmi mərasimdən sonra V.Xaçaturyan Qətər Dövlətinin Əmiri Şeyx Təmim bin Həməd Al Tani ilə görüşüb.
O, Ermənistanla ərəb dünyası ölkələri arasında sıx dostluq əlaqələrinin daim inkişafının vacibliyini və hər iki tərəfin bu istiqamətdə işləməyə hazır olduğunu vurğulayıb. Daha sonra Xaçaturyan Əmirə Cənubi Qafqazda baş verən regional hadisələr və Qarabağ problemi ilə bağlı ətraflı məlumat verib. V.Xaçaturyan vurğulayıb ki, Ermənistan regionda sülhün və qonşu dövlətlərlə mehriban qonşuluq münasibətlərinin yaradılması mövqeyinə sadiqdir.
Əmir qeyd edib ki, hazırda Qətərdən Ermənistana və əksinə həftədə 10 reys həyata keçirilir. Bu da iki ölkə arasında əməkdaşlıq potensialından xəbər verir. Təmim bin Həməd Al Tani, həmçinin, regionda sabitliyin və sülhün bərqərar olmasının əlaqələrin daha da inkişafına töhfə verəcəyini vurğulayıb. Qətərin Ermənistanda səfirliyinin açılması imkanları müzakirə edilib.
O da məlumdur ki, Qətər Türkiyə ilə çox yaxın münasibətlərə malikdir. İki ölkə arasında çox sıx dostluq münasibətləri var. O baxımdan Türkiyə imkan verəcəkmi Qətər Ermənistanda səfirlik açsın?
“Ola bilsin ki, iki ölkə arasında münasibətlər bütövlükdə Azərbaycanla imzalanacaq sülhə hesablanıb”
Məsələ ilə bağlı “Bakı-Xəbər”ə açıqlama verən media eksperti Yadigar Məmmədli hesab edir ki, Ermənistanla Qətər arasında bu cür yaxınlaşma məntiqə uyğun deyil: “Ən azından ona görə ki, Ermənistan müsəlman abidələrinə divan tutub. Söhbət Ermənistan ərazisində və işğal dövründə Qarabağdakı abidələrdən gedir. Ona görə də belə bir dövlətdə Qətər səfirliyinin açılması doğru deyil. Üstəlik bu, müsəlman həmrəyliyinə ziddir. Eyni zamanda Qətər Türkiyə amilini nəzərə almalıdır. Çünki iki ölkə arasında çox yaxın əlaqələr mövcuddur. Qətərin ən çətin zamanlarında Türkiyə bu dövlətin yanında olub. O üzdən, Ermənistanla münasibətlərin inkişafında Qətərlə Türkiyə arasında bir sinxronluq olmalıdır. O da ola bilər ki, bütün bunlar Türkiyənin razılığı ilə həyata keçirilir. Yəni Azərbaycanla Ermənistan arasında münasibətlərin normallaşdırılması ilə bağlı intensiv danışıqlar gedir. Ola bilsin ki, bütün bunlar nəzərə alınmaqla həyata keçirilir. Yəni Azərbaycanla Ermənistan arasında sülh sazişinin imzalanması, sərhədlərin demarkasiyası bu yöndə münasibətlərin normallaşması üçün yaşıl işıq yandırır. Belə bir versiya da istisna deyil. Ola bilsin ki, Qətərlə Ermənistan arasında münasibətlər bütövlükdə Azərbaycanla imzalanacaq sülhə hesablanıb. O mənada ki, Azərbaycanla sülh sazişindən sonra Qətərlə Ermənistan arasında əlaqələr inkişaf etsin. İrəvanda Qətərin səfirliyi fəaliyyətə başlasın və s. Bu da ola bilər”.
Vidadi ORDAHALLI
