Az qala yüz ildir Ağrı dağına qarşı iddia irəli sürən və ona “Ararat” adı qoyub özününküləşdirmək istəyən ermənilərin, Ermənistan adlı dövlətin bu cəhdləri artıq iflasa uğrayıb. Çoxları üçün qəribə görsənsə də, Ermənistanın baş naziri Nikol Paşinyan Ağrı dağının Ermənistana deyil, Türkiyəyə məxsus olduğunu etiraf edib.
Aysor.am-ın verdiyi məlumata görə, N.Paşinyan mayın 22-də keçirdiyi mətbuat konfransında ölkəsində ən hündür dağın Ararat (Ağrı dağı) deyil, Araqats olduğunu deyib: “Ararat və Araqatsdan söz düşmüşkən, mən Ermənistanın suveren ərazisi olan və ya olmayan ərazilərdən danışıram. Araqat Ermənistanda, Ağrı dağı isə Türkiyədədir. Türkiyə ilə bizim dəqiq müəyyən edilmiş sərhədimiz var. Pisdir, yoxsa yaxşıdır? Əlbəttə yaxşıdır”.
Paşinyan Ağrı dağı ilə bağlı məsələyə Türkiyə tərəfdən baxmağı təklif edərək, “Ağrı dağı Türkiyənin beynəlxalq səviyyədə tanınmış ərazisindədir. Ermənistanda uşaqlar bunu necə bilirlər?” deyə bildirib və bunu hökumətin təhsil siyasətinin nəticəsi kimi qiymətləndirib.
Paşinyan deyib ki, uşaqlar Ermənistanın ən yüksək dağını Araqats yox, Ararat adlandırırlarsa, bu, Ermənistanın Türkiyəyə qarşı ərazi iddiaları olması deməkdir.
Onun sözlərinə görə, belə halda Türkiyə Ermənistanın inkişafına kömək etməz və onu məhv etmək üçün hər şeyi edər:“İndi isə sual verirəm: Ermənistanda ən yüksək dağ hansıdır? Cavab: Araqats".
Məlumat üçün deyək ki, Paşinyanın Ermənistanın ən yüksək dağı hesab etdiyi və “Araqats” adlandırdığı dağ Alagöz dağıdır, bu dağ da Azərbaycan türklərinə məxsusdur. Alagöz dağı, Alagöz yaylası qədim türklərin, Qərbi azərbaycanlıların tarixində, folklorunda, etnoqrafiyasında xüsusi yerə malikdir. Alagöz dağı indiki Ermənistanın, yəni Qərbi Azərbaycanın ən yüksək dağıdır. Hündürlüyü 4090 metrdir, İrəvan şəhərindən 40 km şimal-qərbdə yerləşən sönmüş bir stratovulkandır. İrəvan xanlığı ərazisində olmuş Alagöz dağı sonradan ermənilər tərəfindən “Araqats” adlandırılıb.
“Ermənilər bu əraziləri ələ keçirəndən sonra adları dəyişdilər, abidələri məhv etdilər, saxtalaşdırma işləri apardılar”
AVCİYA-nın vitse-prezidenti, professor, siyasi şərhçi Məhərrəm Zülfüqarlı “Bakı-Xəbər”ə şərhində “Paşinyanın son çıxışları onu göstərir ki, Ermənistanın baş naziri artıq Ağrı dağı ilə bağlı həqiqəti bilir və onu etiraf edir. O dərk edir ki, qonşulara qarşı ərazi iddiaları Ermənistana heç də yaxşı heç nə vəd etmir. Ona görə də bu iddiadan əl çəkilməsini təklif edir. Bu müsbət haldır. Dəfələrlə deyilib ki, əgər bir ölkənin gerbində qonşu ölkənin dağı əks olunubsa və dağın adı Ağrı dağı olsa da, “Ararat” adlandırılırsa, bu artıq BMT nizamnaməsinə, beynəlxalq hüquqa ziddir, qonşuya qarşı ərazi iddiasıdır. Paşinyanın bu etirafına Ermənistanda necə qiymət verəcəklər, böyük dövlətlər buna necə baxacaq, bu başqa məsələdir. Əlbəttə, Rusiya, Fransa kimi ermənipərəst dövlətlər çalışacaqlar ki, Ermənistanın Türkiyə və Azərbaycanla münasibətlərinin yaxşılaşmasına imkan verməsinlər, yenə də saxta fikirlərə, iddialara yer versinlər, düşmənçiliyi qızışdırsınlar, bulanlıq suda balıq tutmaqla məşğul olsunlar”.
M.Zülfüqarlı hesab edir ki, erməni cəmiyyəti işğalçı dövlətin vətəndaşı olmaqdan bezib və saxta iddiaların onları hansı rəzil duruma saldığını, illərdir böyük dövlətlərin xeyrinə işlədiklərini bilirlər. “44 günlük müharibəyə qədər “Qarabağ Ermənistandır” deyən Paşinyan Qarabağı Azərbaycan ərazisi, Ağrı dağını isə Türkiyənin ərazisi olaraq tanıyır, qəbul edir...
Alagöz dağının “Araqats” adlandırılması yolverilməzdir və bu növbəti erməni saxtakarlığına xidmət edir. İndiki Ermənistan ərazisi İrəvan xanlığının ərazisidir. 1828-ci il 21 mart tarixindən sonra işğalçı Çar Rusiyası İrəvan, Naxçıvan xanlıqlarını və Ordubad mahalını birləşdirərək “erməni vilayəti” yaratdı. Ermənilər bizim ərazilərə Türkmənçaydan sonra köçürülüblər. Ora tarixi Azərbaycan torpaqlarıdır. Ermənilər bu əraziləri ələ keçirəndən sonra adları dəyişdilər, abidələri məhv etdilər, saxtalaşdırma işləri apardılar. Alagöz dağının adının saxtalaşdırılması da o dövrə düşür. Ermənilər özləri də yaxşı bilir ki, indiki Ermənistan ərazisi onların olmayıb. Onları bura Azərbaycan torpaqlarını işğal edən Çar Rusiyası köçürüb. Çar Rusiyası sayəsində burada məskunlaşıblar. Çar devriləndən sonra daşnak respublikası qurublar, Sovetlər dövründə isə torpaqlarımızı geniş şəkildə işğal etməyə başlayıblar”.
M.Zülfüqarlı dedi ki, bizim toponimlərimizin saxtalaşdırılması işinə Çar Rusiyası dövründə başlanılıb, sonradan da davam etdirilib. O hesab edir ki, ermənilərin saxtalaşdırdığı toponimlərin qədim adlarını bərpa etməli və onu dünyaya çatdırmalıyıq.
İradə SARIYEVA
