İranın Milli Təhlükəsizlik Şurasının yeni katibi Ermənistanın 8 kəndi Azərbaycana verməsi xəbərini dəqiqləşdirməlidir.
Bunu ermənipərəst mövqeyi ilə tanınan iranlı ekspert Ehsan Movəhhedian Tvitter paylaşımında yazıb: “İranın Ali Milli Təhlükəsizlik Şurasının yeni katibinin ilk prioritetlərindən biri İranın Ermənistan və Gürcüstana tranzit marşrutu üzərindəki 8 kəndin Bakıya verilməsi xəbərinin həqiqiliyini araşdırmaq olmalıdır. Bununla İran-Ermənistan sərhədi praktiki olaraq kəsilir. Türk dünyası, NATO və sionistlərin planlaşdırdığı blokada Orta Dəhlizin açılmasını hərbi qarşıdurmasız mümkün edəcək.
Sonra isə Ermənistanın cənubu zorla, yaxud yeni sülhə məcburetmə yolu ilə işğal olunacaq ki, Bakının Sünikdəki (Zəngəzur) dəhliz üzərindən Naxçıvana və Türkiyəyə çıxışı təmin edilsin. 30 ildir ki, bu yola çıxışı olan İran isə marşrutdan kənarlaşdırılacaq”.
İran indi də burnunu bu məsələyə soxur. Azərbaycana məxsus 8 kəndin işğaldan azad olunması məsələsinin İrana nə dəxli var?
“30 ilə yaxın ərazilərimiz işğal altında qaldı və bu müddət ərzində bir dəfə sərhəd dəyişikliyindən danışmadılar”
Sözügedən məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayevin fikrincə, İrandan Azərbaycana qarşı istənilən təhdidi gözləmək olar: “Ermənistan-Azərbaycan münaqişəsində İranın hansı mövqe tutması aydındır. İran hər zaman fürsət düşən kimi, Azərbaycanın kürəyinə xəncər vurur. Bir zamanlar gizli saxladığı mövqeyi indi aşkar bəyan edir. Bu isə faktiki düşmənçilik siyasətidir. İşğal altında olan 8 kəndlə bağlı məlum yanaşma İranın Azərbaycanın ərazi bütövlüyünü qəbul etmədiyini göstərir. Bir yandan Ermənistanın yanında durur. İkinci tərəfdən sərhəd dəyişikliyinin əleyhinə olduğunu deyir. Üçüncü tərəfdən bu sərhədlərin Ermənistan lehinə olmasının tərəfdarıdır, Azərbaycan lehibə olmasının əleyhdarı olduğunu nümayiş etdirir. Faktiki olaraq, Azərbaycanın 8 kəndinin işğaldan azad olunmasına qarşı çıxır. İşğal altında olan Qazaxın 7 kəndinin, Naxçıvanın Kərki kəndinin İrana nə dəxli var? Bununla açıq-aşkar İran ermənipərəst mövqe sərgiləyir. Bunu da müxtəlif üsullarla, ayrı-ayrı dövlət rəsmiləri və yaxud da media, ictimai şəxslər vasitəsilə çatdırır. Faktiki olaraq, sözügedən kəndlər çox strateji yerlərdə yerləşir. Yəni vacib nəqliyyat xətləri həmin kəndlərdən keçir. İran narahatdır ki, həmin kəndlərin Azərbaycanın nəzarətinə keçməsi onların maraqlarına uyğun deyil. Halbuki, bu tamamilə absurd yanaşmadır. Bir sözlə, İran hər vasitə ilə Ermənistana kömək etmək və öz mənfur niyyətlərini həyata keçirmək istəyir. Bu həmin İrandır ki, 30 ilə yaxın ərazilərimiz işğal altında qaldı və bu müddət ərzində bir dəfə sərhəd dəyişikliyindən danışmadılar. İran işğal altında olan ərazilərimizdən narkotrafik məqsədilə istifadə edirdi. Bütün bunlar onu göstərir ki, İran hər zaman Azərbaycan dövlətçiliyinin əleyhinə olub. Bir sözlə, İran Azərbaycan və Türkiyə ilə düşmənçilik edir”.
Vidadi ORDAHALLI
