Özünü “apostol” sözünə yamaq edən erməni Qriqoryan kilsəsi uzun illərdir ki, terror yuvasına çevrilib. Bütün dünyaya məlumdur ki, Eçmiədzin dini deyil, daha çox hərbi-siyasii mərkəz kimi davranır.
Bilirik ki, bu gün Ermənistandakı revanşizm, işğalçılıq ruhunun, Qarabağdakı separatçıların qanundan kənar hərəkətlərinin əsas “ilhamvericisi” Eçmiədzin kilsəsidir, katolikos II Qaregindir. Öz ümdə vəzifəsini unudub separatizmi alovlandırmağa çalışan kilsə Ermənistanla Azərbaycan arasında sülhlə bağlı müəyyən işartıların yarandığı bir vaxtda yenə də öz köhnə havasını çalır.
Erməni mediasının yazdığına görə, mayın 22-də Eçmiədzində katolikos II Qareginin sədrliyi ilə görüş keçirilib və görüşdə Ermənistan-Azərbaycan danışıqlar prosesi ilə bağlı bəyanatlar, eləcə də “Artsax”ın “vəziyyəti” müzakirə edilib. Görüşdən sonra erməni kilsəsi bəyanat yayıb. Bəyanatda vurğulanıb ki, Ermənistan Respublikasının baş naziri Nikol Paşinyanın mayın 22-də keçirdiyi mətbuat konfransında səsləndirdiyi bəyanatlar ictimaiyyətə təqdim edilən sülh gündəliyinin real məzmununu ortaya qoydu, bunda hakimiyyətin danışıqlar prosesində təhlükəli və rədd edilən mövqeləri ortaya çıxdı. “Artsax”ın və Ermənistanın bəzi sərhədyanı ərazilərinin sonrakı taleyi ilə bağlı Ermənistan Respublikasının mövqeyi bəlli olur.
Sülhün, əminamanlığın tərəfində durmalı olan, lakin bu vəzifəsini tamamilə unudan erməni kilsə şurası yenə “qan-qan” deyib və bildirib ki, heç bir “güzəşt” qəbul edilə bilməz, “Artsax”ı Azərbaycanın bir hissəsi kimi tanıyan Ermənistan hakimiyyəti istər-istəməz oradakı erməniləri, guya yeni “soyqırım və Vətəndən məhrumiyyət” qarşısında qoyacaq (?). Qriqoryan kilsəsi iddia edib ki, guya o torpaqlar erməni uşaqlarının qanı bahasına alınıb və ondan imtina edə bilməzlər.
Son bəyanatı ilə Erməni Qriqoryan kilsəsi tam özunü ifşa edib. Kilsə sülhə tərəfdar olmaq əvəzinə bəyan edib ki, heç bir guzəştə getmək olmaz, o torpaqları heç kim Azərbaycana verə və ora Azərbaycanın tərkibində qala bilməz. Guya Azərbaycanın tərkibində qalsa, bu artıq “genosiddir”. “O torpaqlar bizim oğulların qanı ilə alınıb. Heç kim onların taleyi ilə bağlı birtərəfli qərar verə bilməz” bəyanatı ilə çıxış edən erməni kilsəsi əməlli-başlı hərbi-siyasi mərkəz kimi çıxış edir.
Erməni kilsəsinin heç cür sülhə yaxınlaşmaması, yenidən münaqişəni alovlandırmaq istəyi ortadadır. Əlbəttə, erməni kilsəsini dayandırmaq və revanşizmi körükləməməyə məcbur etmək lazımdır.
Erməni kilsəsi Azərbaycanla müharibəyə hazırlığın "baş hərbi qərargahına" çevriib, bu halda Roma Papası niyə susur?
Aydın Quliyev: “Erməni kilsəsinin bu açıq-aşkar revanşist və müharibə qızışdırıcılığı çağırışına, Papa da daxil, heç kimin susmağa haqqı yoxdur...”
“Bakı-Xəbər” media qrupunun rəhbəri Aydın Quliyev öz rəsmi feysbuk səhifəsində katolikosun davranışlarına “Katolikos Qareginin bu fitnəsi cavabsız buraxıla bilməz...” adlı statusla münasibət bildirib: “Eçmiədzin kilsəsi Azərbaycanla yeni müharibə hazırllqlarının qeyri-rəsmi hərbi-siyası qərargahı rolunu üzərinə götürdü.
Bunun daha başqa bir adı yoxdur. Dünən Qareginin sədrliyi ilə Erməni kilsəsinin Ali Dini Şurasının qəbul etdiyi bəyanatı, ya müraciəti, ya da təxribatı yalnız belə şərh etmək olar.
Baxın, Ermənistanın siyasi rəhbərliyi yarı xoş, yarı zor sülh bəyanatları verdiyi halda, Brüssel və Vaşinqton Azərbaycanın sülh səylərinə ümidlə dəstək verdikləri halda, katolikos Qaregin hansı çağırışları edir?!..
Kilsənin 23 may 2023- cü il tarixli qan qoxulu bəyanatından "şedevr seçmələr" - "Arsax bizdən xəbərsiz Azərbaycana verilə bilməz", " Bizim övladlarımızın bu torpaqlarda qanı axdı", "Sülh xatirinə heç bir güzəştə imkan verməyəcəyik", " Arsaxın verilməsi ermənilərin yeni genosidini hazırlayır" və sair...
Hara baxırsınız, cənab Roma papası? Heç bir əziz-ləziz tikənizi bu qana susamış erməni katolikosundan ayrı yeməyə bilərsiniz...Katolikos erməni kilsəsini saxtakarcasına ən qədim "xristian kilsəsi" adlandıranda həqiqətdə ən qədim xristian kilsələrinin tarixinə təhqir olan bu fakta dözümlü yanaşa bilərsiniz. Özünüzü sülh carçısı göstərmık üçün ildə bir dəfə xristian pansionat uşaqlarının kirli ayaqlarını əyilərək yuyub öpə bilərsiniz...
Ancaq Erməni kilsəsinin bu açıq-aşkar revanşist və müharibə qızışdırıcılığı çağırışına, Papa da daxil, heç kimin susmağa haqqı yoxdur...
Xalqları sülhə belə hazırlayırlar?
Bütün Rusiyanın patriarxı Aleksey Ata hardadır? Axı Aleksey Ata da dəfələrlə Azərbaycan və Ermənistan din xadimlərinə müraciətlə "xalqlarınızı sülhə, barışığa hazırlayın" deyib...Azərbaycanın hansısa din və konfessiya lideri nə vaxtsa belə yırtıcı bəyanatlar verdimi?
Elə isə erməni katolikosu Eçmiədzin kilsəsini yeni təcavüzkar müharibə ştabına çevirdiyinə görə layiqli cəzasını almalı deyilmi?
Şeyximiz Allahşükür həzrətlərindən də indiki an üçün gözləntimiz var. Dayanmaq olmaz, lazımsız təmkin vaxtl deyil. Dünyanın bütün mütərəqqi dindar elitasını toparlayıb, fitnə yuvasına çevrilmiş erməni kilsəsinin üstünə tökmək vaxtıdır...”
Qasım Hacıyev: “Azərbaycanda fəaliyyət göstərən bütün xristian dini icmalar II Qareginin mənfur niyyətlərinin qarşısını alması üçün Roma Papasına müraciət etməlidir”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, Roma papalarının 30 ildən çoxdur erməni kilsəsinin oyunbazlıqlarına, özünü terror yuvası kimi aparmasına səssiz qalması təəccüb və təəssüf doğurur. “Bizi düşündürən odur ki, Roma Papası niyə susur. İndiyə qədər erməni Qriqoryan kilsəsi, Eçmiədzin revnşizmi, separatizmi alovlandırmaqla, terroru və terrorçuları dəstəkləmək, silahlandırmaqla məşğuldur. Bu kilsə sülhün təminatçısı olmaq əvəzinə revnşizmi körükləyir, erməniləri qonşu ölkələrin ərazilərini işğal etməyə həvəsləndirir. El dili ilə desək, Eçmiədzin ermənilərin başına ip salıb onları oynadır. İndiyə qədər ermənilər Qriqoryan kilsəsindən heç bir xeyir görməsələr də, yenə də onun məkrli siyasətinə boyun əyirlər. Hesab edirəm ki, Qriqoryan kilsəsinin son bəyatından daha çox ermənilər narahat olmalıdır, çünki II Qaregin yenidən müharibə, qan istəyir, ona sülh sərf etmir”.
Q.Hacıyevin sözlərinə görə, Qarabağ erməni torpağı deyil və orada ölən, qanı tökülən ermənilər də xaricdəki erməni diasporunun, Qriqoryan kilsəsinin və vəzifə tutub mənsəb sahibi olmaq istəyən bir qrup şöhrətpərəst, terrorçu erməninin fitvasına uyanlardır, onlar öz torpaqlarında yox, işğal etdikləri torpaqda ölüblər. “Onlar fitvaya, şirnikləndirici vədlərə uyub Azərbaycan torpaqlarını işğal etməyə gəldilər və dərslərini aldılar. Erməni uşaqlarının tökülən qanının baiskarı birbaşa erməni kilsəsidir, çünki o gəncləri zorla müharibəyə, işğala vadar etdi. Azərbaycan heç zaman müharibə istəməyib, biz sülh istəmişik, indi də sülh istəyirik. Bütün dünyadakı ağıllı adamlar bilirlər ki, Qarabağ Azərbaycan torpğıdır. Bunu BMT də təsdiqləyib”-deyə bildirən professor Hacıyev qeyd etdi ki, erməni diaspor təşkilatları və Qriqoryan kilsəsi bütün Qafqazı qana qərq etmək istəyir və buna görə də dünyanın dini təşkilatları reaksiya verməlidir. “Roma katolik kilsəsi erməni Qrioqoryan kilsəsini dayandırmalıdır. Bir dini mərkəz ki, öz əsas vəzifəsini unudub siyasi çağırışlar etməklə, özünü “hərbi tərəf” kimi təqdim etməklə məşğuldur, o dini qurumla bağlı beynəlxalq səviyyədə qərar verilməlidir. Hesab edirəm ki, Azərbaycanda fəaliyyət göstərən bütün xristian dini icmalar II Qareginin mənfur niyyətlərinin qarşısını alması üçün Roma Papasına müraciət etməlidir. Erməni kilsəsi öz çirkin niyyətlərini çılpaqlığı ilə ortaya qoyub, onu dayandırmaq lazımdır”.
Q.Hacıyev əlavə etdi ki, dünyadakı digər xristian dini təşkilatlarının da erməni kilsəsinə təzyiq göstərməsi vacibdir, çünki o yalnız bu yolla revanşizmi körükləməkdən əl çəkə bilər, əks halda daha dəhşətli hallara yol verər.
İradə SARIYEVA
