Firdovsi Şahbazov: “Ermənistan Azərbaycanla sürətli avtomobil və dəmir yolunun qurulmasında maraqlı olsaydı...”
Ermənistanın baş naziri Nikol Paşinyan hökumətin iclasında çıxışı zamanı deyib ki, mayın 14-də keçirilən Brüssel görüşü zamanı Azərbaycanla bir sıra mühüm məsələlərdə razılığa gəlmək mümkün olub.
Bununla bağlı Paşinyan qeyd edib ki, Azərbaycanla Ermənistan arasında sürətli avtomobil və dəmir yolunun yenidən qurulması ilə bağlı müsbət anlaşma formalaşıb: “Vurğulamalıyam ki, Brüsseldə Ermənistan-Azərbaycan sürətli avtomobil yolunun yenidən qurulması ilə bağlı müəyyən müsbət anlaşma formalaşıb. Lakin bu hissəyə hər hansı açıqlama verməyəcəyəm. Mən əvvəlki təcrübəni nəzərə alaraq, hələlik dəqiq məlumat verməyə tələsməyəcəyəm. Bir daha vurğulamaq istərdim ki, Ermənistan üçtərəfli bəyanatda nəzərdə tutulan kommunikasiyaların açılmasını həyata keçirməyə hazırdır”.
- “Görünən odur ki, kommunikasiyalarla bağlı İrəvana bu və ya digər formada beynəlxalq təzyiqlər var”
Sözügedən məsələ ilə bağlı fikirlərini “Bakı-Xəbər”lə bölüşən iqtisad üzrə fəlsəfə doktoru Firdovsi Şahbazov Paşinyanın son açıqlamasına birmənalı prizmadan yanaşmadı: “Paşinyan kommunikasiyaların açılması ilə bağlı dəfələrlə buna bənzər açıqlamalar verib, amma bunlar reallaşmayıb. Məsələn, 2021-ci ildə Paşinyan Gürcüstanda səfərdə olarkən bəyan etdi ki, Azərbaycanla avtomobil əlaqəsinin bərpa olunması mümkün ola bilər. Həmçinin qeyd etdi ki, Ermənistan və Azərbaycan arasında dəmiryolu xətlərinin çəkilməsi üçün İlham Əliyevlə prinsipial razılıq əldə edilib. Ancaq o vaxtdan keçən müddət ərzində Ermənistanın günahı üzündən bunların heç biri reallaşmadı. Ona görə də Paşinyanın məlum açıqlamasına ciddi yanaşmaq çətindir. Lakin görünən odur ki, kommunikasiyalarla bağlı İrəvana bu və ya digər formada beynəlxalq təzyiqlər var. Hətta Avropa İttifaqı bununla bağlı Ermənistana müəyyən maliyyə yardımı göstərəcəyini də vəd edib. Təki Ermənistan yolların açılması ilə bağlı konkret addımlar atsın. Ancaq hələ ki, Ermənistanın bu yöndə praktiki addımlar atması müşahidə olunmur. Ermənistan Azərbaycanla sürətli avtomobil və dəmir yolunun qurulmasında maraqlı olsaydı, bu vaxta qədər Meğri rayonunda infrastrukturu qurmaqla bağlı hansısa tədbirlər görərdi. Halbuki, Meğri rayonundan keçən avtomobil və dəmir yollarının uzunluğu heç 50 kilometr deyil. Bu da elə də böyük məsafə deyil. Ancaq buna baxmayaraq, Ermənistan bununla bağlı heç bir addım atmır. Belə baxanda, Meğridən keçən yolların yenidən qurulmasına elə də böyük vəsait lazım deyil. Ancaq Ermənistan bütün vasitələrlə bu ölkəni İranla birləşdirən dağlıq ərazidən keçən Tatev avtomobil yolunun genişləndirilməsinə çalışır. O üzdən hesab edirəm ki, Paşinyanın hər dediyinə ciddi yanaşmaq olmaz. Çünki dediyi sözün arxasında əməli iş yoxdur”.
Vidadi ORDAHALLI
