Emin Həsənli: “Paşinyan bilməlidir ki, Azərbaycanın maraqlarını ifadə etməyən heç bir təklif keçərli olmayacaq”
Nikol Paşinyan deyib ki, Ermənistan-Azərbaycan sərhədinin delimitasiya və demarkasiyası 1975-ci ildəki SSRİ Baş Qərargahının xəritələrinə əsasən aparılacaq. Onun sözlərinə görə, Rusiya tərəfi bir neçə dəfə bu xəritələrdən bəhs edib.
Paşinyan hesab edir ki, Ermənistanın mövqeyi dəyişməz olaraq qalır, o, SSRİ Baş Qərargahının 1975-ci ildəki xəritələrinə əsasən delimitasiya tərəfdarıdır: “İrəvan delimitasiyanın nəticələrinə görə qoşunların güzgüvari şəkildə geri çəkilməsində israrlıdır. Bu, təhlükəsizliyi təmin edəcək. Bu vəzifə artıq beynəlxalq birlik tərəfindən formalaşdırılıb və bu mühüm haldır. Bakının qoşunların çıxarılması ilə bağlı mövqeyinə gəlincə, hazırda heç bir irəliləyiş görmürük”.
Maraqlıdır, Paşinyan niyə məhz 1975-cu il xəritəsinə meyl edir? Orada Ermənistanın xeyrinə nə ola bilər? Qoşunların sərhəddən “güzgü üsulu” ilə geri çəkilməsini Azərbaycan qəbul edərmi?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, birincisi, həmin xəritələr dəqiqləşməlidir: “Yaxşı olardı ki, daha qədim xəritələrə müraciət edilsin. SSRİ formalaşmadan əvvəlki xəritələrdə daha aydın təsəvvür formalaşa bilər. Əslində, Ermənistan hamıdan gözəl bilir ki, ortaya çıxacaq mənzərə onlara sərf edən deyil. Çünki onlar türk birliyinə qarşı bir layihə dövlət kimi formalaşıb. Paşinyan son vaxtlar sərhəddən qoşunları geri çəkməkdən danışır. Belə ədalət axtarışındadırsa, niyə bunu rayonlarımız işğalda olanda etmirdi? Onun hələ də 10 mindən artıq separatçıdan ibarət silahlı qoşunu bizim ərazidədir. Niyə onlara silah-sürsat verir, hərbçilərə əmək haqqı verir? İndi bir neçə metr ərazi ilə bağlı iddia ortaya qoyur. Sərhədlər hələ dəqiq müəyyənləşməyibsə, qoşunların geri çəkilməsindən söhbət gedə bilməz. Yaxşı olar ki, Qarabağdakı silahlılarını oradan çıxarsın. Paşinyan deyirdi ki, “Qarabağ Ermənistandır”. Yəni bu gün bir qədər loyal mövqe tutmağa onu Azərbaycan ordusu vadar edir. Artıq dərk edir ki, Qarabağ Azərbaycanın daxili işidir. Hətta müharibədən sonra da kiçik xülyalara düşmüşdü, ancaq ordumuzun verdiyi cavablar onu tam yerinə oturtdu. Paşinyan bilməlidir ki, Azərbaycanın maraqlarını ifadə etməyən heç bir təklif keçərli olmayacaq. Hazırda şərtləri o yox, biz diqtə edirik”.
Ekspertin sözlərinə görə, SSRİ Baş Qərargahının çoxlu xəritələri var, onların bir çoxu nəşr olunub: “Ermənistan-Gürcüstan dövlətlərarası yolunun keçdiyi Qazaxın 7 və Naxçıvanın Kərki kəndi Ermənistanın 29.8 min kvadratkilometr ərazisinə daxil deyil. Bundan başqa, həmin xəritələrdə Gorus-Qafan yolunun bir hissəsi də Azərbaycan ərazisindən keçir. Artıq Azərbaycan həmin yola nəzarəti bərpa edib. 70-ci illərin və ya Paşinyanın dediyi kimi, 1975-ci ilin xəritələri əsasında demarkasiya işlərinin aparılması həm də anklavların geri qaytarılması deməkdir”.
Bu sferanı təmsil edən əksər ziyalılar iddia edir ki, sözügedən xəritə ilə ermənilər Azərbaycanı aldada bilməyəcəklər. Çünki Azərbaycan sərhəddə də üstün mövqelərə sahibdir.
Məhəmmədəli QƏRİBLİ
.jpg)
