Prezident İlham Əliyev Vilnüsdə səfərdə olarkən bəyan edib ki, Xəzər və Baltik dənizlərinin birləşdirilməsi layihəsi gündəmdədir:
“Azərbaycan ərazisindən keçən tranzit yüklərin həcmi ildən-ilə artır və artacaq. Müasir infrastrukturumuz buna imkan yaradır. Xəzər dənizini, Cənubi Qafqazı Baltik dənizi ölkələri ilə birləşdirən nəqliyyat marşrutları da bəllidir. Sadəcə olaraq, biz birgə səylərlə həmin birləşmə layihələrini həyata keçirərək bu sahədə də uğurlu əməkdaşlığa nail olacağıq. Bu gün Litva və Azərbaycan öz regionlarında mühüm daşımalar qovşağıdır. Beləliklə, biz Xəzər və Baltik regionları arasında şəbəkə qurmalıyıq və bu, mümkündür”.
Sözügedən layihənin həyata keçirilməsi nə dərəcədə realdır və necə reallaşa bilər? Azərbaycanın iştirak etdiyi “Şimal-Cənub” Nəqliyyat Dəhlizi bununla necə uyğunlaşa bilər? Xəzərlə Baltik dənizlərinin birləşdirilməsi layihəsi sözügedən dəhlizin bir seqmenti ola bilərmi?
“Biz növbəti dövrlərdə bu dəhlizlər vasitəsilə daha çox yüklərin daşınmasına nail olacağıq”
Sözügedən məsələ ilə bağlı “Bakı-Xəbər”ə açıqlama verən millət vəkili Vüqar Bayramov hesab edir ki, prinsipcə sözügedən layihəni reallaşdırmaq mümkündür: “Ümumilikdə, regional nəqliyyat dəhlizlərinin reallaşdırılması Azərbaycan üçün prioritet istiqamətlərdəndir. Nəzərə almaq lazımdır ki, Azərbaycan Orta Dəhlizin reallaşmasına xüsusi töhfə verir. Digər tərəfdən, Rusiya-Ukrayna müharibəsindən sonra “Şimal-Cənub” Nəqliyyat Dəhlizinə yanaşma dəyişib. Məsələ ondadır ki, Rusiyadan Avropaya gedən yollar bağlanıb. Ancaq bu o demək deyil ki, həmin dəhliz sıradan çıxacaq. Çünki şimalda Baltik, Skandinaviya ölkələri var. Həmin ölkələr də praktik olaraq məhz bu dəhlizdən istifadə etmək və öz məhsullarını dünya bazarına çıxarmaqda maraqlıdılar. O baxımdan hesab edirəm ki, “Şimal-Cənub” Nəqliyyat Dəhlizi Baltik regionuna inteqrasiya oluna bilər. Orta Dəhlizlə “Şimal-Cənub” Nəqliyyat Dəhlizinin kəsişməsində yerləşən Azərbaycan özünün nəqliyyat və logistika imkanlarının möhkəmlənməsi, müxtəlif sektorlarda imkanların açılması üçün çox sayda real üstünlüklərə malikdir. Baltik ölkələri Azərbaycan vasitəsilə öz məhsullarını dünya bazarına çıxarması prioritet olaraq qalmaqdadır. Azərbaycan bu sahədə infrastrukturu genişləndirməklə, təkmilləşdirməklə həmin nəqliyyat dəhlizundən daha səmərəli şəkildə reallaşmasına dəstək olmağa çalışır. Biz növbəti dövrlərdə bu dəhlizlər vasitəsilə daha çox yüklərin daşınmasına nail olacağıq. Azərbaycan ərazisindən keçən marşrutlar ölkənin təhlükəsiz və effektiv tranzit üçün optimal şəraitin təmin olunması üzrə səyləri sayəsində getdikcə daha cəlbedici olur. Müasir nəqliyyat infrastrukturuna, o cümlədən dəmir yolu və şose yollarına, həmçinin dəniz yollarına malik Azərbaycan vəsaitə və vaxta əhəmiyyətli dərəcədə qənaət edir. O nbaxımdan, bu layihələrin perspektivi var”.
Vidadi ORDAHALLI
