Ermənistan Milli Assambleyasının hakim “Mülki müqavilə” fraksiyasından olan deputatı Vigen Xaçatryan Rusiyanın siyasətini kəskin tənqid edib.
O vurğulayıb ki, Rusiya müşahidəçilərinin (KTMT müşahidə missiyası) Ermənistan ərazisində olması Ermənistana qarşı yeni təcavüz üçün bəhanə ola bilər: “Moskva dəfələrlə İrəvana KTMT missiyasını şərti olaraq Ermənistan-Azərbaycan sərhədinə göndərməyi təklif edib, lakin Paşinyan Aİ-nin paramilitar missiyasına üstünlük verib”.
Deputat qeyd edib ki, Rusiya öz sülhməramlılarını və sərhədçilərini Ermənistan və Qarabağ ərazilərində yerləşdirməklə öz üzərinə müəyyən öhdəliklər götürüb. Lakin onlar sonra geri çəkilirlər: “Ruslar geri çəkiləndən sonra onların yerində Azərbaycan əsgərləri peyda olur. Bütün bunlar müəyyən narahatlıq doğurur. KTMT-dən olan “müşahidəçilər” də bunu edə bilər. Onlar ya onlara həvalə olunmuş ərazini tərk edə, ya da bu və ya digər sərhəd hadisəsi ilə bağlı son dərəcə ziddiyyətli açıqlamalar verə bilərlər”.
“Ona görə ki, Paşinyan hakimiyyətinin birdəfəlik Qərbin qucağına oturacağından ehtiyat edir”
Sözügedən məsələni “Bakı-Xəbər”ə şərh edən siyasi ekspert Elşad Həsənovun fikrincə, Xaçatryanın məlum fikirləri prinsipcə yeni deyil: “Məsələ ondadır ki, hakim partiya daxilində Rusiyanın Ermənistan siyasətini tənqid edən çoxsaylı deputatlar var. O cümlədən, Rusiyanın Ermənistandan çıxarılmasına çalışan deputatlar var. Onlar müxtəlif vasitələrlə çalışırlar ki, Rusiya oradan çıxıb getsin. Həmin tənqidlər də bütün bunların fonunda baş verir. Paşinyan hakimiyyəti yaxşı bilir ki, indi bunun üçün daha münasib fürsət var. Ən azından ona görə ki, Ukraynada müharibə şiddətlənir və bunun nə zaman bitəcəyi bəlli deyil. Ancaq Ermənistanın Rusiyadan asılılığını nəzərə alsaq, bu o qədər də real görünmür. Çünki hərbi və iqtisadi baxımdan Rusiyanın Ermənistana təsir imkanları çox böyükdür. O üzdən, bu çətindir. Ancaq buna baxmayaraq, Paşinyan komandasında təmsil olunanlar davamlı olaraq Rusiyanı tənqid edirlər. İctimai rəyi Rusiyaya qarşı körükləyirlər. Bununla belə, Ermənistan hakimiyyəti çalışır ki, Rusiyanı Avropa İttifaqı ilə əvəzləsin. Sərhəddə Avroittifaq müşahidə missiyasını yerləşdirir. ABŞ-la birlikdə gizli biolabaratoriyaların fəaliyyət göstərməsinə şərait yaradır. Məhz bunlardan çıxış edərək Paşinyan ötən ilin noyabrında KTMT-nin yekun sənədini imzalamaqdan imtina etdi. Bu ilin yanvarında keçirilən birgə təlimlərə qatılmadı. Nəticədə Ermənistanın Rusiya ilə münasibətləri daha da soyudu. Bütün bunları əlində əsas tutan Paşinyan hakimiyyətinin təmsilçiləri davamlı olaraq Rusiyanı tənqid edirlər. Bu minvalla Rusiyadan qopmağa çalışırlar. Bütün bunlara rəğmən, Rusiya Ermənistana yönəlik kəskin addımlar atmır. Ona görə ki, Paşinyan hakimiyyətinin birdəfəlik Qərbin qucağına oturacağından ehtiyat edir. Bütün bunlara baxmayaraq, Ermənistanın hərəkətləri Rusiyanı ciddi narahat edir. Sadəcə, Rusiyanın hazırkı durumu imkan vermir ki, Ermənistana yönəlik daha sərt tədbirlərə əl atsın. Bircə Kremlin təbliğat ruporları vasitəsilə Ermənistan hakimiyyəti kəskin tənqid olunur. Bütün hallarda Rusiya Ermənistanı əlində saxlamağa çalışır. Çünki yaxşı bilirlər ki, Ermənistan əldən çıxsa, Rusiya Cənubi Qafqazı itirəcək”.
Vidadi ORDAHALLI
