Özünü Qafqazda "insan hüquq və azadlıqları"nı "yüz faiz təmin edən dövlət" kimi qələmə verən Ermənistanda vətəndaş hüquqlarının pozulması adi hala çevrilib.
Xüsusən də övladları zorla Ermənistanın Azərbaycan torpaqlarına təcavüzünə cəlb edilən və onlara aid olmayan torpaqlar uğrunda ölən əsgərlərin ailəsinə, valideynlərinə qarşı Ermənistan hökuməti tərəfindən sərt siyasət yürüdülür. Valideynlər övladlarının yad torpaqlar uğrunda həlak olmasına görə işğalçı dövlətlərini ittiham edirlər. 44 günlük müharibədən sonra həlak olan və itkin düşmüş əsgərlərin ailələri Baş nazir Nikol Paşinyana və onun ailəsinə aqressiv yanaşırlar ki, nə üçün onların övladlarını qonşu ölkəyə qarşı təcavüzdə iştirak etməyə məcbur edib.
Məlum olduğu kimi, bir neçə gün əvvəl Paşinyanın oğlu Aşotun oğurlanmasına cəhd edildiyi barədə məlumat yayıldı.
Erməni mediası yazır ki, Ermənistan Baş nazirinin oğlunun oğurlanmasını təşkil etməkdə ittiham olunan 44 günlük müharibədə həlak olan əsgərin anası Qayane Akopyan (Martirosyan) bir ay müddətinə həbs edilib.
Vəkil Vaan Hovhannisyanın sözlərinə görə, qərarı bazar ertəsi ümumi yurisdiksiya məhkəməsi elan edib: "Məhkəmə həbsin qanuniliyi ilə bağlı şikayətimizi təmin etməyib və müstəntiqin həbslə bağlı vəsatətini təmin edib".
Qeyd edək ki, Ermənistanda müharibə zamanı ölən hərbçilərin yaxınları yenidən İrəvanda aksiya keçirir.
Aksiya iştirakçıları ölkənin Baş naziri Nikol Paşinyanın oğlunu qaçırmaqda şübhəli bilinərək həbs edilən Qayana Akopyanın azadlığa buraxılmasını tələb edirlər.
Aksiya hökumət binasının qarşısında keçirilir.
Xatırladaq ki, Paşinyanın oğlu küçədə 44 günlük müharibədə həlak olan hərbçilərin valideynləri ilə rastlaşıb. Onlar Aşotu maşına əyləşməyə dəvət edib. Aşot bunu qəbul etmədikdə onu öldürüb qəbiristanlığa aparacaqlarını deyiblər. Onlar Aşot Paşinyanı öz avtomobillərinə minməyə məcbur ediblər, lakin o, bir anlıq dayanan maşından düşə bilib. Bu zaman təşkilata məxsus digər bir avtomobil onu vurub. Nəticədə Paşinyanın oğlu ayağından zədə alıb. Hadisədən sonra Ermənistanda müharibə zamanı ölən hərbçilərdən birinin anası olan Q.Akopyan saxlanılıb. Məhkəmə mayın 20-si Akopyanın 1 ay müddətinə həbs olunmasına dair qərar verib. O, Aşot Paşinyanın qaçırılmasının təşkilində ittiham olunur.
Göründüyü kimi, Ermənistanda əsgər ailələrinə bu cür münasibət formalaşıb. Ermənistan hökuməti onun təcavüzkarlıq aktını həyata keçirən və həlak olan əsgərlərin analarına məhkəmə qurur...
"Nə üçün oğlunu işğalda iştirak etməyə göndərirdi ki, bu gün də özü həbs edilirdi?"
İSBAM sədri Samir Adıgözəlli "Bakı-Xəbər" şərhində bildirdi ki, Ermənistan hökumətinin öz vətəndaşına qarşı bu cür addım atması təəccüblə qarşılanmamalıdır: "Ermənistan hökumətinin belə bir addım atmasında təəccüblü bir hal yoxdur. İşğalçı dövlət vətəndaşdan öz işğalçılıq planlarını həyata keçirmək üçün istifadə edir. 44 günlük müharibədən sonra valideynlər Paşinyan hökumətini ittiham edirlər ki, onların övladlarının ölümünə səbəb olub. Çünki erməni cəmiyyəti daha istəmir ki, övladları təcavüzdə iştirak etsin. 44 günlük müharibə dövründə valideynləri erməni gənclərini xarici ölkələrə göndərirdi ki, müharibədə iştirak etməsinlər.
Bu gün Ermənistan ordusunda fərarilik, başıpozuqluq, rüşvətxorluq, korrupsiya, cinayətkarlıq hadisələri çox genişlənib. Ermənistan hökuməti öz işğalçılıq planlarını həyata keçirmək üçün gəncləri qurbana çevirdi. 44 günlük müharibədən sonra erməni əsgərlərinin ailəsi dərk etdi ki, övladları onlara aid olmayan torpaqlarda ölüblər. Hiss olunur ki, həlak olmuş əsgərlərin ailələrinə qayğı da yoxdur. Bu gün insanlar övladlarını əsgəri xidmətə göndərmək istəmir".
S.Adıgözəlli qeyd edir ki, uşaqlarının ölümündə hökumətlə yanaşı ailələrin də günahı var.
" Ölmüş erməni əsgərlərinin valideynlərinin aksiyalara başlaması, hökumətin işğalçılıq siyasətinə dirəniş göstərməsi bir az da dərinləşəcək.
Həbs edilən o qadına gəlincə, oğlunu nə üçün işğalda iştirak etməyə göndərirdi ki, bu gün də özü həbs edilirdi? İndi görsün ki, işğalçıya, təcavüzkara görə övladını qurban verməyə dəyməzdi. Artıq onlar öz övladlarını boş, mənasız yerə itirdiklərinin fərqindədirlər. Faktiki olaraq, Ermənistan hökuməti həlak olan əsgərlərin ailələrinə çox qəddarlıqla yanaşır ". S.Adıgözəlli qeyd etdi ki, indiyə qədər bir neçə dəfə əsgər ailələri hökumətin siyasətinə qarşı aksiya keçiriblər və həmişə də hökumət onlara sərt təpki göstərib.
Leyla QARAXANLI
