Molla rejimi tərəfindən yaradılan “Azərbaycan tarixi” Teleqram kanalı Azərbaycan xalqını, tarixi dəyərlərimizi, tarixi şəxsiyyətlərimizi təhqir etməklə, onlar barədə əks fikirlər yaymaqla məşğuldur.
Bu kanalın əsas hədəflərindən biri müsəlman Şərqində ilk demokrtik respublika olan Azərbaycan Xalq Cumhuriyyətini (AXC), onun liderlərini, xüsusən də Məhəmməd Əmin Rəsulzdəni qaralamaq, bu şanlı tarix barədə yanlış təsəvvürlər formalaşdırmaqdır. Müstəqil Azərbaycanın varlığını gözü götürməyən molla rejimi 1918-ci ildə qurulan Cumhuriyyəti də həzm edə bilmir. Azərbaycan dövlətinin sağlam təməllər üzərində qurulması, öz tarixi keçmişinə sahib çıxması, özünü Cumhuriyyətin varisi elan etməsi mollakratiyanı bərk narahat edir. Ona görə də cumhuriyyətlə bağlı hədyanlar danışırlar, yalan məlumatlar yayırlar. Məsələn, uzun müddətdir ki, Cumhuriyyəti hədəfə alan bu teleqram kanalının adminləri mollaların əbasının altında gizlənib Cumhuriyyətə çamur atmaqla məşğuldur. Böhtançı kanal Azərbaycan Xalq Cumhuriyyətinin qurucusu M.Ə.Rəsulzadəni qaralamaqdan əl çəkmir. İddia edir ki, guya “ADR zamanında leqal əxlaqsızlıq yuvaları” açılıb (?). Hansısa qondarma vinson.az saytına “istinad” edən mollabaşlar anti-Azərbaycan, anti-türk təbliğatını həyata keçirmək üçün bu cür biabırçılıqlardan istifadə edir. Cumhuriyyətə, onun liderinə şər atan molla rejimi özünü gülünc vəziyyətdə qoyur... Kanal iddia edir ki, guya “ingilislər Bakıya ayaq basdıqdan 3 ay sonra, 27 fevral 1919-cu ildə fahişəxanaların açılması və fahişəliyin leqallaşdırılması barədə qanun qəbul etdilər...”
“İngilislərin Azərbaycanda açdığı leqal fahişəxanalar...” adı verdikləri üzdəniraq cızma-qarada iddia olunur ki, guya ADR höküməti 16 noyabrda General Thomsona “ingilis ordu birliklərini qəbul etmək və Bakıda yerləşdirmək üçün bütün addımların atıldığını” məruzə etdikdən sonra 17 noyabr günü ingilis qüvvələrinin Azərbaycana girməsinə heç bir problem qalmadı: “Hökümət bu qərarı gizli iclasda qəbul etmişdi və 17 noyabr səhəri bütün vətəndaşlarımızı ingilis ordusunu “dostanə” bir şəkildə qəbul etməyə çağırdı... Amma General Thomson vəziyyətin əleylərinə dəyişəcəyi ehtimalını nəzərə alaraq, İngiltərənin İranda işğal edilən ərazilərə polis nəzarəti rəisi Col Cockerell’i də Bakıya dəvət etdi. Col Cockerell ingilis müstəmləkə maşınının aparıcı “sürücülərindən” və müstəmləkə edilmiş ərazilərə təyin edilən xüsusi nəzarətçilərindən idi... Bakı limanına daxil olan ordunun tərkibində, 800 nəfəri hind olmaqla, 1800 ingilis əsgəri, həmçinin fransız və amerikan nümayəndələri də var idi. Ordunu ADR höküməti rəsmiləri qəbul etdi. Mərasimdə çıxış edən Xarici işlər nazirinin birinci müavini Adil Xan Ziyadxanov Azərbaycan xalqı adından belə dedi;“Qədim mədəniyyətə sahib Avropa millətlərinin uca və müqəddəs hədəflər naminə xalqımızı da öz aralarına qəbul edəcəklərinə sarsılmaz şəkildə ümid bəsləyirik...” Cavabında isə ingilis generalı belə cavab verdi; “İngilis, fransız və amerikan müttəfiq qüvvələrinin nümayəndəsi və komandanı olaraq sizi təbrik edirəm. Osmanlı ilə bağlanan müqaviləyə əsasən türk ordusundan nəzarəti təhvil aldığımızı bildirirəm...”
İngiltərə höküməti ilk gündən etibarən Abşeron petrol yataqlarının ingilis əsgərləri nəzarətində olacağını açıqladı. Bütün Azərbaycan vətəndaşlarına petrol rezervlərinə 16 km radiusdan yaxınlaşmaq qadağan idi.
Həmçinin yalnız ingilislər kimisə siyasi məhbus kimi həbs edə və hər hansı bir qəzetin nəşrini dayandıra bilərdilər”.
Bu kanal heç bir tarixi fakta, sənədə istinad etmədən bizə ləkə atır.
“Mollalar “siğə” adı altında qeyri-əxlaqi işlər görülməsinə rəvac verirlər ki, bu da insanlığa ziddir”
Məsələ ilə bağlı “Bakı-Xəbər”ə danışan AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi icmalçı Faiq Ələkbərli “Özünü İran İslam Respublikası adlandırlan şovinist fars molla rejiminin Azərbaycan dövlətinə, Azərbaycan türklərinə qarşı hər cür böhtanlar atması səbəbsiz deyil. Bütün bu böhtanların arxasında dayanan əsas məsələ məhz Azərbaycanın və türklüyün varlığıdır. Çünki şovinist molla fars rejimi üçün qəbul edilməz iki məsələ var: onlardan biri Azərbaycançılıq, digəri isə türklük məsələsidir. Bu iki məsələni qəbul etmirlər və əllərindən gələni edirlər ki, məhz bu iki ideyaya qarşı çıxsınlar. Biz bilirik ki, Məhəmməd Əmin Rəsulzadə iranlılığa qarşı azərbaycanlılığı, farslığa qarşı türklüyü irəli sürüb. 1918-ci ilin 28 mayında yeni yaranmış türk dövlətinə Azərbaycan adının verilməsi ariyançılar, İrançılar üçün ciddi bir zərbə olub. Onların Azərbaycanı, azərbaycançılığı, türkçülüyü, cumhuriyyəti və Rəsulzadəni hədəfə alması yeni məsələ deyil, 100-120 il bundan əvvələ diqqət yetirsək görərik ki, məhz aryançılar, İrançılar Azərbaycana və Türkiyəyə qarşı böyük bir hücuma keçiblər. Təbii ki, onlar bunu təkbaşına etmədilər. Qacarların son dönəmində prosesə başladılar, bu zaman da əsas hədəfləri türklük və Azərbaycan olub. Ona görə də, Azərbaycan Cumhuriyyətinə atılan çirkabın mahiyyətində Azərbaycanın, türklüyün varlığını həzm edə bilməmək dayanır. Bu gündən baxanda görürük ki, Cumhuriyyət demokratk, sivil, dünyəvi bir dövlət olub. Bu gün Cumhuriyyətin varisi kimi çıxış edən Azərbycan respublikası da bu yolu davam etdirir. Molla rejimi bizə qarşı öz çirkin niyyətlərini bildirmək üçün Cumhuriyyətə böhtanlar atır. Pəhləvilər dönəminə və indiki Tehran rejiminə baxdıqda görürük ki, onların mahiyyətində qeyri-əxlaqi məsələlər yer tutub, tutmaqda da davam edir. Pəhləvilər “demokratik” donu geyərək öz mahiyyətini zərdüştlük, ariançılıq ruhunda ifadə etdilər. Onlar gördülər ki, zərdüştülüklə, ariançılıqla qəsb etdikləri hakimiyyəti davam etdirə bilməyəcəklər, yenidən məhzəbçiliyə, yaxud sözdə islam dininə qayıtdılar. Əslində İran İslam rejimi dövründə də Pəhləvilər dönəmindən fərqlənməyən, sadəcə başqa bir maksa altında, şiəçilik, islam donunda yenə də Dəccallıq etdilər. Fars ənənələrin davam etdirilməsi üçün əllərindən gələni etdilər. Zərdüştlər dönəmində mövcud olan bəzi iyrənclikləri Pəhləvilər dönəmində dirçəltmişdilər. Bu onların mahiyyətidir”.
F.Ələkbərli dedi ki, Güney Azərbaycan türkləri və başqa türk xalqları tarixən qeyri-əxlaqi məsələlərdən uzaq durub, onlar türklüyə və islama xidmət ediblər. Azərbaycan türkünə, Cumhuriyyətinə böhtan atanların qeyri-əxlaqi mahiyyəti tarixən bizə məlumdur deyən F.Ələkbərli bildirdi ki, bu çamur bizə yapışa bilməz, çünki biz xalq olaraq ənənələrimizi, əxlaqi dəyərlərimizi yaşadırıq. “Azərbaycanlıların, türk xalqının əxlaqı öz ali keyfiyyətinə, yüksək dəyərinə görə hər zaman özünəməxsusluğu ilə seçilib. Əli bəy Hüseynzadə 1907-ci ildə “Füyuzat”dakı məqalələrində bu ariyançılara, İrançılar üzünü tutub deyirdi ki, bizlərlə sizləri birləşdirən ancaq isalam dinidir, yoxsa siz deyirsiz ki, zərdüştizmə, Sasani, Əhəmənilər dövrünə qayıdaq, o zaman sizinlə bizim aramızda heç nə qala bilməz. Çünki Əli bəy Hüseynzadə bilirdi ki, onların qayıtmaq istədiyi Zərdüştlük, Sasani və Əhəmənilər dövrü məhz qeyri-insani, qeyri-əxlaqi məsələlərlə bağlıdır. Farslar məhz türklərlə və başqa millətlərlə, o cümlədən də islam dini ilə qaynayıb-qarışdıqdan sonra qeyri-insani, qeyri-əxlaqi məsələlərdən müəyyən qədər uzaq durmağa başladılar. Dediyimiz kimi, Pəhləvilər dönəmində keçmişə qayıdıb tarixlərində olan əxlaqsızlığı dirçəltməyə çalışırdılar. O zaman Əli bəy Hüseynzadə deyirdi ki, siz keşmişinizə dönsəniz o zaman farslarla türkləri bir dövlətdə, bir arada tutacaq heç şey yoxdur. Onlar 1979-cu ildə sözdə islama, şiəliyə qayıtdılar, amma yenə də mahiyyətləri dəyişmədi. Bu baxımdan demək istəyirəm ki, Azərbaycan Xalq Cumhuriyyətinə iftira atan, qaralama kampaniyası aparan fars molla rejimi özü bu çirkin məsələlərin daşıyıcıdır. Mollalar “siğə” adı altında qeyri-əxlaqi işlər görülməsinə rəvac verirlər ki, bu da insanlığa ziddir. Bu rejim günlük, həftəlik siğələr edilməsinə şərait yaradır. Təbii ki, əsl türklər və əsl müsəlmanlar heç zaman qədim fars adət-ənənələrinə uymayıblar, o yolu getməyiblər. Bu gün də, gələcək də həm milli, həm bəşəri, həm də dini anlamda Cumhuriyyətlə, Cumhuriyyətin dəyərləri ilə bağlıdır. Amma molla rejiminin nə bu günü, nə də gələcəyi var. Məhz bunu bildikləri üçün belə böhtanlar atırlar. Cumhuriyyət dəyərləri şovinist fars molla rejiminin dəyərlərinə qalib gələcək”-deyə F.Ələkbərli qeyd etdi.
Əli TURABOV
